Read Bibliya Yera 1951 Yosuwa 4 Bible Online

Yosuwa 4 - Bibliya Yera 1951 bible

Yosuwa 4

¹Iryo hanga ryose rimaze kujabuka Yorodani, Uhoraho abarira Yosuwa,

²ati Musobanure ba bagabo cumi na babiri mu bantu, umwe‐umwe mu miryango yose,

³mubabarire, muti Ni mutore amabuye cumi n’abiri ngaha nyene muri Yorodani, ah’ abaherezi bahagaze, muyajabukane muyarambike aho muja kurāra iri joro.

⁴Nuko Yosuwa ahamagaza ba bagabo ukw ar’ icumi na babiri yarobanuye mu Bisirayeli, umwe‐umwe mu miryango yose;

⁵arababarira, ati Ni muje imbere y’ isandugu y’Uhoraho Imana yanyu muri Yorodani, umuntu wese yāndūre ibuye, muyashire ku rutugu, nk’ukw igitigiri c’imiryango y’ Abisirayeli kingana;

⁶kugira ngw az’ abe ikimenyamenya muri mwebge. Hanyuma mu bihe bizoza, abana banyu ni babaza, bat’ Aya mabuye yerekana iki?

⁷muze mubishure, muti N’ukw amazi ya Yorodani yīmiriwe, akitandukaniriza imbere y’isandugu y’isezerano ry’ Uhoraho; mut’ Igihe yarikw irajabuka Yorodani, amazi yarwo yarīmiriwe; muti Kand’ aya mabuye yabereyeho kuba icibutso c’Abisirayeli gushitsa ibihe vyose.

⁸Nukw abo bagabo b’Abisirayeli bakora nk’uko Yosuwa yababariye, bāndūra amabuye cumi n’abiri muri Yorodani, nk’uk’ Uhoraho yabariye Yosuwa, angana n’igitigiri c’imiryango y’Abisirayeli; barayajabukana, bayashikana aho bagiye kurāra, bayaturaho.

⁹Yosuwa na we ashinga amabuye cumi n’abiri nyene muri Yorodani, ah’ abaherezi bareruye isandugu y’ isezerano bahagaze: kandi ni ho akiri na bugingo n’ubu.

¹⁰Kukw abo baherezi bareruye iyo sandugu bari bahagaze muri Yorodani, gushitsa ah’ ivyo Uhoraho yabariye Yosuwa kubgira abantu vyarangiriye vyose, bihwanye n’ivyo Mose yari yarabariye Yosuwa vyose: nuko ni kw abantu bihuse, barajabuka.

¹¹Maz’ abantu bose bamaze kujabuka, isandugu y’ Uhoraho irajabuka, ireruwe n’ abaherezi, abantu barorēra.

¹²Kand’ Abareyubeni n’Abagadi n’igihimba c’umuryango wa Manase ni bo bagiye imbere y’ abandi Bisirayeli mu kujabuka, bītwaje ibirwanishwa, nk’uko Mose yari yarababariye.

¹³Ingabo zabo zari nk’ibihumbi mirongwine, zītwaje ibirwanishwa, ziteguye kurwana, zica imbere y’Uhoraho mu kiyaya c’i Yeriko.

¹⁴Kur’ uwo musi Uhoraho akuza Yosuwa imbere y’Abisirayeli bose, baramwubaha imisi yose yamaze akiriho, nk’uko bubaha Mose.

¹⁵Uhoraho abarira Yosuwa,

¹⁶ati Barira abaherezi bareruye isandugu y’Ibishinga intahe bave muri Yorodani.

¹⁷Nuko Yosuwa abarira abaherezi, ati Ni mudūge, muve muri Yorodani.

¹⁸Maz’ abaherezi bareruye iyo sandugu y’ isezerano ry’Uhoraho bavuye muri Yorodani, bashitse i musozi, amazi ya Yorodani asubira gutemba aho yahora, arenga inkombe, nk’uko yar’ asanzwe.

¹⁹Abantu bādūze bava muri Yorodani ku musi w’icumi w’ ukwezi kwa mbere, basagaza i Gilugali ku ruhande rw’i burasirazuba rw’i Yeriko.

²⁰Ya mabuye cumi n’abiri bakūye muri Yorodani Yosuwa ayashinga i Gilugali.

²¹Maz’ abarira Abisirayeli, ati Mu bana banyu, ni hagira abazobaza ba se mu bihe bizoza, bat’ Aya mabuye n’ay’ iki?

²²muze mubabarire, muti N’ukw Abisirayeli bājabutse uru Yorodani nk’abaca ku musozi.

²³Ati Kuk’ Uhoraho Imana yanyu yakamije amazi yarwo imbere yanyu, kugeza muhejeje kujabuka, nk’uko yagize Ikiyaga Gitukura, igihe yagikamiriza imbere yacu kugeza duhejeje kujabuka;

²⁴kugira ngw amahanga yose yo mw isi amenye yuk’ ukuboko kw’Uhoraho gukomeye, batinye Uhoraho Imana yanyu ibihe vyose.