Read Bibliya Yera 1951 Yosuwa 6 Bible Online

Yosuwa 6 - Bibliya Yera 1951 bible

Yosuwa 6

¹Kand’ i Yeriko bari biyugaranye bahadadiye kubgo gutinya Abisirayeli; nta warenga irembo, kandi nta washika imbere.

²Uhoraho abarira Yosuwa, ati Rāba, ngabuye i Yeriko mu maboko yawe, bo n’umwami waho n’abahizi baho b’ibishirīra.

³Muze muzenguke ico gisagara, mwese ab’ ingabo, mukizenguke rimwe‐rimwe ku musi kumara imisi itandatu.

⁴Kand’ abaherezi ndwi baze bajane inzamba ndwi z’amahembe y’impfizi z’intama, bagende imbere y’isandugu; maze ku musi ugira indwi muze muzenguke ico gisagara ibihetangabo ndwi; kand’ abo baherezi baze bagende baravuza izo nzamba.

⁵Maz’ ayo mahembe y’impfizi z’intama ni bayavuza ijwi rirandiriye, mukumva ijwi ryayo, abantu bose bace bīha akāmo icarimwe: maz’ uruzitiro rw’amabuye rw’ico gisagara ruzoca ruhomvokera hasi, abantu bose bace barengagira, umuntu wese aho yar’ atumbereye.

⁶Nuko Yosuwa mwene Nuni ahamagaza abaherezi, arababarira, ati Ni murerure isandugu y’isezerano, maz’ abandi baherezi ndwi bajane inzamba ndwi z’amahembe y’impfizi z’intama, bagende imbere y’isandugu y’Uhoraho.

⁷Maz’ abarira abantu, ati Ni mushireko, mugende, muzenguke ico gisagara; abafise ibirwanishwa abe ari bo baja imbere y’isandugu y’Uhoraho.

⁸Nuko Yosuwa amaze kubarira abantu, ba baherezi ndwi bashirako baragenda, batwaye za nzamba ndwi, bar’ imbere y’Uhoraho, bagenda barazivuza; isandugu y’isezerano ry’Uhoraho ibaja inyuma.

⁹Abītwaje ibirwanishwa baja imbere ya ba baherezi bagenda baravuza inzamba, inyuma haza abīmirije ya sandugu, za nzamba bakiriko barazivuza.

¹⁰Ariko Yosuwa abarira abantu, ati Ntimuze muvuze akāmo, canke ngw ijwi ryanyu ryumvikane, canke ngo hagire ijambo na rimwe riva mu kanwa kanyu, gushitsa ku musi nzobabaririra kwitera hejuru: ni ho muzoca mwiha akāmo.

¹¹Nukw atuma iyo sandugu y’Uhoraho izenguka ico gisagara, ikakizenguka rimwe; bagaheza bagasubira aho bashagaje, bakarāra ngaho.

¹²Bukeye Yosuwa azinduka mu gatondo kare, abaherezi barerura isandugu y’Uhoraho.

¹³Maze ba baherezi ndwi batwaye za nzamba ndwi, baja imbere y’isandugu y’Uhoraho, bakomeza kugenda barazivuza; abītwaje ibirwanishwa baja imbere yabo, inyuma haza abīmirije ya sandugu y’Uhoraho, za nzamba bakiriko barazivuza.

¹⁴Kur’ uwo musi ugira kabiri bazenguka ico gisagara rimwe nyene, basubira aho bashagaje. Uko ni ko bāgenjeje kumara imisi itandatu.

¹⁵Maze ku musi ugira indwi, bazinduka mu gaturuturu, bazenguka ico gisagara nk’uko bahora, bashitsa ibihetangabo ndwi: kur’ uwo musi gusa ni ho bākizengutse gushikana indwi.

¹⁶Maze ku muzenguko ugira indwi, ba baherezi bakiriko baravuza za nzamba, Yosuwa abarira abantu, ati Ni mwihe akāmo, kuk’ Uhoraho abahaye iki gisagara.

¹⁷Ati Kand’ igisagara n’ibiri muri co vyose bicitse inyegu y’Uhoraho; mugabo Rahabu, umwe maraya, abe ari we arokoka, bo n’abari mu nzu yiwe bose, kuko yanyegeje za ntumwa twatuma.

¹⁸Ariko mwebge muzire akaziri ntimugire ico mukorako mu vyabaye inyegu y’ Uhoraho; kuko ni mwavyifuza, mukabikorako, muzoba muzaniye umuvumo n’ivyago Abisirayeli aho mushagaje.

¹⁹Arikw amafeza yose n’amazahabu n’ibintu vyose vyo mu miringa n’ivyo mu vyuma bibaye ivyera vy’Uhoraho: bizoja mu bushinguro bgiwe.

²⁰Nuko za nzamba zivuze, abantu biha akāmo: mbere bacumva ijwi ryazo, baciye biha akāmo icarimwe, inzitiro zica zihomvokera hasi, abantu baca bararengagira, bītera mu gisagara, umuntu wese aho yar’ atumbereye, barakinesha.

²¹Bageseza ivyari mur’ ico gisagara vyose, bicisha inkota abagabo n’abagore, abato n’abashaje, n’inka n’intama n’indogoba.

²²Maze Yosuwa abarira ba bantu babiri bāja gutata igihugu, ati Ni mwinjire mu nzu ya wa mugore maraya, mumusohorane n’ab’ afise bose, nk’uko mwamurahiye.

²³Nukw iyo misore yagiye gutata igihugu irinjira, isohokana Rahabu na se na nyina na basaza be n’abo bafise bose; bajana umuryango wiwe wose, babashikana inyuma y’ah’ Abisirayeli bashagaje.

²⁴Igisagara bagitōngōza umuriro, n’ivyari muri co vyose; arikw amafeza n’amazahabu n’ibintu vyo mu miringa n’ivyo mu vyuma, ni vyo bashize mu bushinguro bgo mu ngoro y’Uhoraho.

²⁵Nuko Yosuwa arokora Rahabu umwe maraya, n’inzu ya se, n’abo yar’ afise bose; aba mu Bisirayeli gushitsa na bugingo n’ubu, kuko yanyegeje za ntumwa Yosuwa yatumye i Yeriko kuhatata.

²⁶Ico gihe Yosuwa aca amahani abantu, aravuga, ati Ni hagira umuntu ahaguruka, akazokwubaka iki gisagara c’i Yeriko, aravumwe imbere y’Uhoraho. Igihe azokwubaka itanguriro ryaho azobura umwana wiwe w’imfura, kand’ igihe azotera ibikingi vy’amarembo yaho azobura umwana wiwe w’ umuhererezi.

²⁷Nuk’ Uhoraho yabana na Yosuwa; aba rurangiranwa mur’ ico gihugu cose.