Read Bibliya Yera 1951 Abacamanza 1 Bible Online

Abacamanza 1 - Bibliya Yera 1951 bible

Abacamanza 1

¹Yosuwa amaze gupfa, Abisirayeli babaza Uhoraho, bati Muri twebge ni nde azobanza kuja gutera Abanyakanani ngw abarwanye?

²Uhoraho arishura, at’ Abayuda ni bo bazobanza gutera: kand’ ico gihugu ndakigabuye mu maboko yabo.

³Nukw Abayuda babarira ab’i wabo b’Abasimeyoni, bati Ni muze mufatanye natwe dutere Abanyakanani, dushikīre umugabane wacu twaheshejwe n’ubupfindo; natwe tuzofatanya namwe ngo mushikīre uwanyu. Nukw Abasimeyoni bajana na bo.

⁴Nukw Abayuda badūga gutera, maz’ Uhoraho agabura Abanyakanani n’Abaferizi mu maboko yabo, i Bezeki bahatsinda ibihumbi cumi mu ngabo zabo.

⁵Basanga Adoni‐bezeki i Bezeki nyene, baramurwanya, banesha Abanyakanani n’Abaferizi.

⁶Ariko Adoni‐bezeki arahunga, baramukinagiza, baramufata, bamuca intoke z’ibikumu n’amano manini.

⁷Adoni‐bezeki aravuga, at’Abami mirongwirindwi naciye ibikumu n’amano manini bāhora batoragura utwo barya musi y’ameza yanje: uko nabagiriye ni kw Imana inshubirije mu nkōko. Nuko bamujana i Yerusalemu, agwayo.

⁸Maz’ Abayuda batera Yerusalemu, barahatsinda, baharanduza inkota; ico gisagara bagiha impumbi.

⁹Maze baramanuka, batera Abanyakanani, uhereye ku baba mu mugamba n’ababa i bumanuko n’ababa mu gihugu c’ imisozi iciye bugufi.

¹⁰Baraheza baja gutera Abanyakanani baba i Heburoni; Heburoni kera hitwa Kiriyati‐Araba: maze bica Sheshayi na Ahimanu na Talumayi.

¹¹Nuko bavayo, baja gutera ab’i Debira; Debira kera hitwa Kiriyati‐seferi.

¹²Kalebu aravuga, at’ Umuntu azotera i Kiriyati‐seferi akahanesha, nzomushingira umwana wanje Akisa.

¹³Otiniyeli mwene Kenazi, murumuna wa Kalebu, arahanesha; araheza amushingira umukobga wiwe Akisa.

¹⁴Maz’ agishika i w’umugabo wiwe, aramwinginga ngw asabe se itongo; Akisa ava ku ndogoba yiwe, Kalebu aramubaza, at’ Ugomba iki?

¹⁵Aramwishura, ati Ntabara ungabire: ko wandungitse mu gihugu cumye[1], mpa n’amariba y’amazi. Nuko Kalebu amuha amariba yo haruguru n’ayo hepfo.

¹⁶Maz’ abo mu ruvyaro rwa wa Munyakeni, muramu wa Mose, badūgana n’Abayuda bavuye mu gisagara co mu bigazi, baja mu bugaragwa bg’i Buyuda, ahahera i bumanuko bg’i Arada, babanayo na bene ho.

¹⁷Bukeye Abayuda bafatanya n’ab’i wabo b’Abasimeyoni, banesha Abanyakanani bāba i Sefati, barahageseza; ni kwo kwita ico gisagara Horuma.[2]

¹⁸Abayuda banesha i Gaza n’impande zaho zose, na Ashikeloni n’impande zaho zose, na Ekuroni n’impande zaho zose.

¹⁹Uhoraho yari kumwe n’Abayuda; birukana ababa mu gihugu c’umugamba, ariko ntibashobora kwirukana ababa mu biyaya, kuko bari bafise imikogote y’ivyuma.

²⁰Kalebu bamuha Heburoni nk’uko Mose yari yaravuze; ahirukana bene Anaki ukw ari batatu.

²¹Arikw Ababenyamini ntibirukanye Abayebusi bāba i Yerusalemu; nukw Abayebusi babana n’Ababenyamini i Yerusalemu gushitsa na bugingo n’ubu.

²²Ab’ umuryango wa Yosefu na bo baradūga ngo batere i Beteli; kand’ Uhoraho yari kumwe na bo.

²³Batuma abaja gutata i Beteli; ico gisagara kera citwa Luzi.

²⁴Abo batasi babona umuntu avuye mur’ ico gisagara, baramubarira, bat’ Enda se twereke akanyuro twocamwo ngo dushike mur’ iki gisagara, natwe tuzokwibuka.

²⁵Aca abereka aho baca ngo bagishikemwo; ni kwo kuranduza inkota ico gisagara, ariko wa mugabo n’abo mu rugo rwiwe bose barabareka.

²⁶Uwo muntu araheza aragenda, aja mu gihugu c’Abaheti, yubakay’ igisagara, acita Luzi: ni ryo zina ryaco na bugingo n’ubu.

²⁷Arikw Abamanase ntibirukanye ab’i Beti‐sheyani cank’ ab’i Tanaki cank’ ababa i Dori, cank’ ababa Ibuleyamu, cank’ ababa i Megido, cank’ abo mu dusagara twagenda tuhakūkira, kukw Abanyakanani bāgataye kuva mur’ ico gihugu.

²⁸Maz’ Abisirayeli bamaze guhama, bashinga Abanyakanani ibikebere, ntibabirukana ngo babaherengeteze.

²⁹Abefurayimu na bo ntibirukanye Abanyakanani baba i Gezeri, arikw Abanyakanani babana na bo ngaho nyene i Gezeri.

³⁰N’Abazebuloni na bo ntibirukanye ababa i Kitironi cank’ ababa i Nahalolo; arikw abo Banyakanani babana na bo, bashingwa ibikebere.

³¹N’Abasheri na bo ntibirukanye ababa ahitwa Ako, cank’ ababa i Sidoni, cank’ ab’i Ahulaba, cank’ ab’i Akuziba, cank’ ab’i Heliba, cank’ ab’i Afeka, cank’ ab’i Rehobu;

³²arikw Abasheri babana n’Abanyakanani, ben’ ico gihugu, ntibabirukana.

³³N’Abanafutali na bo ntibirukanye ababa i Beti‐shemeshi, cank’ ababa i Beti‐anati, arikw Abanafutali babana n’Abanyakanani, ben’ ico gihugu; mugabo, ababa i Beti‐shemeshi n’i Beti‐anati bashingwa ibikebere.

³⁴Abamori bagenda barasegenya, basunika Abadani gushitsa mu gihugu c’umugamba, ntibābakundira kumanuka mu kiyaya,

³⁵arikw abo Bamori bāgataye kuva ku musozi Heresi n’i Ayaloni n’i Shalubimu; arikw ab’ inzu ya Yosefu bamaze gukomera bashinga abo Bamori ibikebere.

³⁶Kand’ urubibe rw’Abamori rwāhēra ku mudūgo w’i Akurabimu rugashitsa i Sela rugasubiza amajaruguru.