Read Bibliya Yera 1951 Abacamanza 10 Bible Online

Abacamanza 10 - Bibliya Yera 1951 bible

Abacamanza 10

¹Hanyuma ya Abimeleki haza Tola mwene Puwa, Puwa wa Dodo, wo mu muryango wa Isakari, arahaguruka akiza Abisirayeli. Yaba i Shamiri mu mugamba w’Abefurayimu.

²Amara imyaka mirongwibiri n’itatu ar’ umucamanza mu Bisirayeli; apfuye, bamuhamba i Shamiri nyene.

³Hanyuma yiwe hahaguruka Yayiri w’Umugileyadi; amara imyaka mirongwibiri n’ibiri ar’ umucamanza mu Bisirayeli.

⁴Kandi yar’ afise abahungu mirongwitatu, bagendera ku ndogoba mirongwitatu nyene, kandi bari bafise ibisagara mirongwitatu vyitwa Havoti‐yayiri, kandi ni ko bicitwa na bugingo n’ubu; biri mu gihugu c’i Gileyadi.

⁵Yayiri apfuye, bamuhamba i Kamoni.

⁶Maz’ Abisirayeli bongera gukora ivyo Uhoraho abona kw ari bibi, basaba za Bayali na za Ashitaroti, n’imana z’i Siriya n’iz’ i Sidoni n’iz’ i Mowabu n’iz’ Abamoni n’iz’ Abafilisitiya; bata Uhoraho, ntibaba bakimusaba.

⁷Uburake bg’ Uhoraho buziriringira Abisirayeli, abagabura mu maboko y’Abafilisitiya no mu y’ Abamoni.

⁸Mur’ uwo mwaka bacuranguza Abisirayeli, barabahahaza; bamara imyaka cumi n’umunani bagirira nabi Abisirayeli bose bo hakurya ya Yorodani mu gihugu c’Abamori i Gileyadi.

⁹Hanyuma Abamoni bajabuka Yorodani baja gutera n’Abayuda na bo n’Ababenyamini n’ab’ umuryango w’Abefurayimu, bituma Abisirayeli babura epfo na ruguru.

¹⁰Maz’ Abisirayeli batakambira Uhoraho, bati Twagucumuyeko, kuko twakuvuyeko ari wewe Imana yacu, tugasaba za Bayali.

¹¹Uhoraho yishura Abisirayeli, ati Mbega si jewe nagenda mbakiza Abanyegiputa n’Abamori n’Abamoni n’Abafilisitiya?

¹²Kandi hamwe Abasidoni n’Abamaleki n’Abamayoni bābahahaza, mukantakambira, nagenda mbarokora nkabakūra mu maboko yabo.

¹³Yamara, ko mwamvuyeko, mukaja gusaba izindi mana, ni co gituma ntongera kubakiza.

¹⁴Ni mugende mutakambire za mana mwitoranirije, abe ari zo zibakiza mu gihe c’amagorwa yanyu.

¹⁵Abisirayeli bishura Uhoraho, bati Twaracumuye koko, none n’utugire uk’ ugomba: mugabo, wemere kudukiza iri rimwe gusa.

¹⁶Baraheza bakūraho izo mana z’inyamahanga, basubira gusaba Uhoraho, na we aca agira ikigumbagumba mu mutima kubgo kubona imibabaro y’Abisirayeli.

¹⁷Maz’ Abamoni bakoranira hamwe, basagaza i Gileyadi, Abisirayeli na bo barakorana, basagaza i Misipa.

¹⁸Abantu baravugana, ari bo bakuru b’i Gileyadi, bati Ni nde yotangura gusomboroza Abamoni? Uwoboneka azohabga ubukuru mu b’i Gileyadi bose.