Read Bibliya Yera 1951 Abacamanza 11 Bible Online

Abacamanza 11 - Bibliya Yera 1951 bible

Abacamanza 11

¹Maze hāri Yefuta w’Umugileyadi, kandi yar’ umuhizi w’inkomezi; yari yavutse kuri maraya, yamuvyaweko na Gileyadi.

²Ariko muka Gileyadi bari baravyaranye abandi bahungu; abo bamaze gukura, bāri bārirukanye Yefuta, bati Nta co uteze mu vya data, kuko wavutse ku mugore w’ icangazi.

³Maze Yefuta aca ahunga bene se, aragenda aba mu gihugu c’i Tobu; abantu b’ imburakimazi bakoranira kuri we, bakagenda bambura abantu.

⁴Igihe kiragera, Abamoni ni kwo gutera Abisirayeli.

⁵Maze babateye, abakuru b’i Gileyadi baragenda ngo bakūre Yefuta mu gihugu c’i Tobu;

⁶baramubarira, bati N’uze ube umugabisha wacu, tubone kurwanya Abamoni.

⁷Yefuta yishura abakuru b’i Gileyadi, ati Mbega si mwebge mwanyanse, mukanyirukana mu rugo rwa data? None muhenga mugowe mukaza iyo ndi?

⁸Maz’ abakuru b’i Gileyadi baramwishura, bati Noneh’ igitumye tuza iy’ uri n’ukugira ng’ ujane natwe, urwanye Abamoni; uzoheza ube umukuru wacu, uganze ababa i Gileyadi bose.

⁹Yefuta arababaza, ati None ni mwansubiza i wacu kurwana n’Abamoni, Uhoraho akampa kubatsinda, nzoheza mbe umukuru wanyu koko?

¹⁰Abo bakuru b’i Gileyadi baramwishura, bat’ Uhoraho abaye icabona hagati yacu, yuko tuzoshitsa ivyo uvuze.

¹¹Nuko Yefuta ajana n’abo bakuru b’i Gileyadi, abantu bamugira umugabisha wabo n’umukuru wo kubaganza; Yefuta asubira muri ya majambo yiwe yose imbere y’Uhoraho i Misipa.

¹²Maze Yefuta atuma intumwa ku mwami w’Abamoni, muti Ngo Mupfa iki, gitumye umukūriye hasi, ukaza gutera igihugu ciwe?

¹³Umwami w’Abamoni yishura intumwa za Yefuta, uti N’ukw Abisirayeli, bamaze kuva muri Egiputa, banyaze igihugu ciwe uhereye ku ruzi Arunoni ugashitsa kuri Yaboki no kuri Yorodani. Uti None rero, n’umusubize ivyo bihugu ku neza.

¹⁴Yefuta yongera gutuma intumwa ku mwami w’Abamoni,

¹⁵ziramubgira, ziti Yefuta ngw Abisirayeli si bo bānyaze igihugu c’i Mowabu cank’ igihugu c’Abamoni,

¹⁶ut’ Arikw Abisirayeli, igihe bādūga bava muri Egiputa, bāciye mu bugaragwa bashika ku Kiyaga Gitukura; hanyuma bashika i Kadeshi.

¹⁷Ut’ Abisirayeli baraheza batuma intumwa ku mwami wa Edomu kumwinginga ngw abareke bahite mu gihugu ciwe, arik’ umwami wa Edomu ntiyabakundira. Uti Batuma no ku mwami w’i Mowabu nk’uko nyene, na we nyene aranka. Uti Nukw Abisirayeli baguma i Kadeshi.

¹⁸Uti Hanyuma baca mu bugaragwa, bagendana urubibe rw’igihugu ca Edomu n’ic’ i Mowabu, bashika ku ruhande rw’i burasirazuba rw’igihugu c’i Mowabu, basagaza hakurya ya Arunoni; ut’ Ariko ntibārenze urubibe rw’i Mowabu, uti Kuko Arunoni ari rwo rwar’ urubibe rwaho.

¹⁹Uti Maz’ Abisirayeli batuma intumwa kuri Sihoni umwami w’Abamori yaba i Heshiboni, uti Kumwinginga ngw abareke bahite mu gihugu ciwe, baje mu cabo.

²⁰Ut’ Ariko Sihoni ntiyabashirwako ngw abareke bahite mu gihugu ciwe; ut’ Arikw akoranya ingabo ziwe zose, abategera i Yahasi, arabarwanya.

²¹Uti Maz’ Uhoraho Imana y’ Abisirayeli agabura Sihoni n’ ingabo ziwe zose mu maboko y’Abisirayeli, barabatsinda. Uti Nukw Abisirayeli bashikīra igihugu cose c’Abamori bāba mur’ ico gihugu.

²²Bashikīra igihugu cose c’Abamori, uhereye kuri Arunoni ugashitsa kuri Yaboki, uhereye no mu bugaragwa ugashitsa kuri Yorodani.

²³Uti Non’ Uhoraho Imana y’Abisirayeli, ko yasohoye Abamori ngo babise abantu biwe b’Abisirayeli, uti None ni wewe wohabāka?

²⁴Uti Non’ igihugu imana yawe Kemoshi yoguha, ntiwocegukira? Uti Na bo n’uko, igihugu Uhoraho Imana yabo yasohoyemwo bene co bose ngo bababise, bāracegukiye.

²⁵Uti Mbeg’ uraruta Balaki mwene Sipori umwami w’i Mowabu? Uti Har’ aho yigeze aja impaka n’Abisirayeli? Uti Har’ aho yarwanye na bo?

²⁶Ut’ Abisirayeli ko bamaze imyaka amajana atatu baba i Heshiboni no mu dusagara tuhakūkira, n’i Aroweri no mu dusagara tuhakūkira, no mu bisagara vyose vyo kuri Arunoni; uti None n’iki cababujije kubisubirana mur’ ico gihe cose?

²⁷Uti We nta co agukoreye, ni wewe umugiriye nabi k’uje kumutera. Ut’ Uhoraho Umucamanza uyu musi ni yerekane Abisirayeli n’Abamoni abatsinze ab’ ari bo.

²⁸Arik’ umwami w’Abamoni ntiyaruha yumva amajambo Yefuta yamutumyeko.

²⁹Maze Mpwemu w’Uhoraho aza kuri Yefuta, na we anyuranganya i Gileyadi no mu bg’aba Manase, aca i Misipe h’i Gileyadi, avay’ aragenda ngw aje mu Bamoni.

³⁰Maze Yefuta asezeranira Uhoraho isezerano, ati Ni wagabura Abamoni mu maboko yanje,

³¹ngatabaruka amahoro mvuye kurwana na bo, ūzobanza gusohoka mu nzu yanje kunsanganira, azoba uwawe, Uhoraho, nanje nzomutanga kw ikimazi c’ukwoswa.

³²Nuko Yefuta ajabuka mu Bamoni, arabatera; Uhoraho abagabura mu maboko yiwe.

³³Arabatikiza uhereye i Aroweri ugashitsa i Miniti, atsinda ibisagara mirongwibiri, arinda ashitsa i Abeli‐keramimu; kaba agatikizo gakomeye. Uko ni kw Abamoni bāmazwe igabo n’Abisirayeli.

³⁴Maze Yefuta aratabaruka, aja i Misipa; ashitse i we, umwana wiwe w’umwigeme asohoka kumusanganira afise udushāko tw’ ingoma, arikw aratamba, atārīka. Kand’ uwo mwana wiwe yar’ ikinege: nta muhungu nta mwigeme wundi yar’ afise, atar’ uyo gusa.

³⁵Amubonye, yitantamurirakw impuzu ziwe, ati Mbonye ibara, mwana wanje! Urambabaje, ungiriye nabi! Kuko navyīkūriye mu kanwa, nkabibarira Uhoraho, none sinshobora kwivuguruza.

³⁶Aramwishura, ati Data, ko vyakwīvīriye mu kanwa ukabibarira Uhoraho, n’ungenze nk’uko wavuze; kazima Uhoraho yaguhaye kwīhōra abansi bawe b’Abamoni.

³⁷Kand’ abarira se, ati Mugabo har’ ico ngusaba: ube urandetse amezi abiri, ngende ku misozi, twe na bagenzi banje, ndirire ubukumi bganje.

³⁸Se aramwishura, ati Genda. Aramusezera ngw aje kumara amezi abiri. Ajana na bagenzi be, aririra ubukumi bgiwe mu misozi.

³⁹Maz’ amezi abiri ashize, agaruka kwa se, na we amugenza nk’ukw isezerano yasezeranye riri; kandi ntiyari yarīgeze kumenya icitwa umugabo. Bica biba umugenzo mu Bisirayeli, uk’ umwaka utashe:

⁴⁰abigeme b’Abisirayeli bama bagenda kwibuka uwo mukobga wa Yefuta w’Umugileyadi, bamuririra imisi ine mu mwaka mu mwaka.