Read Bibliya Yera 1951 Abacamanza 12 Bible Online

Abacamanza 12 - Bibliya Yera 1951 bible

Abacamanza 12

¹Maz’ Abefurayimu barakorakorana, baja i burārūko, babaza Yefuta, bati N’iki catumye uja kurwana n’Abamoni, ntudutabaze? Tuzoguturirira mu nzu!

²Yefuta arabishura, ati Twe n’abantu banje twari tugishāmiranye n’Abamoni, maze ngo ndabatabaze ntimwāza kudutabara ngo muturwanire.

³Maze mbonye ko mwanse kudutabara nca nīrya uko ndi, ndajabuka ndwana n’ Abamoni, Uhoraho abagabura mu maboko yanje. None n’iki gitumye uyu musi muza kurwana nanje?

⁴Maze Yefuta akoranya ingabo zose z’i Gileyadi, barwana n’Abefurayimu; Abagileyadi banesha Abefurayimu, barabica, kuko bavuze, bati Mur’ incīke z’ Abefurayimu, mwa Bagileyadi mwe, mwacitse ku Befurayimu no ku Bamanase!

⁵Abagileyadi bazibira ivyambu vya Yorodani ngo batege Abefurayimu; maz’ ūcitse wo mu Befurayimu yahashika, ati Ndeka njabuke, Abagileyadi bakamubaza, bat’ Ur’ Umwefurayimu? Yavuga, at’ Oya!

⁶bagaca bamubarira, bati None rero vuga Shiboleti. Na we akavuga, ati Siboleti; kukw adashobora kurishitsa neza; bagaca bamufata, bakamwicira aho nyene ku cambu ca Yorodani. Ico gihe hapfa Abefurayimu ibihumbi mirongwine na bibiri.

⁷Nuko Yefuta amara imyaka itandatu ar’ umucamanza w’Abisirayeli. Maze Yefuta uwo Mugileyadi araheza arapfa, bamuhamba mu gisagara c’i wabo c’i Gileyadi.

⁸Yefuta akurikirwa na Ibusani w’i Betelehemu, aba umucamanza w’Abisirayeli.

⁹Yar’ afise abahungu mirongwitatu n’abakobga mirongwitatu; abo bakobga abashingira mu yindi miryango, asabira abahungu biwe abageni mirongwitatu nyene bavuye mu yindi miryango. Amara imyaka ndwi acira imanza Abisirayeli.

¹⁰Ibusani araheza arapfa, bamuhamba i Betelehemu.

¹¹Akurikirwa na Eloni wo mu Bazebuloni, aba umucamanza w’ Abisirayeli; amara imyaka cumi abacira imanza.

¹²Eloni uwo, wo mu Bazebuloni, araheza arapfa, bamuhamba i Ayaloni mu gihugu c’Abazebuloni.

¹³Akurikirwa na Abudoni mwene Hileli w’Umunyapiratoni, na we acira imanza Abisirayeli.

¹⁴Kandi yar’ afise abahungu mirongwine n’abuzukuru mirongwitatu, bāgendera ku ndogoba mirongwirindwi; amara imyaka munani acira imanza Abisirayeli.

¹⁵Abudoni mwene Hileli w’ Umunyapiratoni araheza arapfa, bamuhamba i Piratoni nyene mu gihugu c’Abefurayimu, ku musozi Amaleki.