Read Bibliya Yera 1951 Abacamanza 13 Bible Online

Abacamanza 13 - Bibliya Yera 1951 bible

Abacamanza 13

¹Maz’ Abisirayeli bongera gukora ivyo Uhoraho abona kw ari bibi; Uhoraho abatanga mu maboko y’Abafilisitiya kumara imyaka mirongwine.

²Kandi hār’ umuntu w’i Sora wo mu muryango w’Abadani, yitwa Manowa. Umugore wiwe yar’ ingumba itigeze kuvyara.

³Umumarayika w’Uhoraho yiyereka uwo mugore, aramubarira, ati Rāba ur’ ingumba, ntiwigeze kuvyara; arik’ uzosama inda, uvyare umwana w’umuhungu.

⁴None rero, uz’ uzire akaziri ntunywe vino cank’ ikiboreza na kimwe, kandi ntuz’ urye ikintu na kimwe gihumanya;

⁵kukw ehe rāba, ugiye gusama inda, uvyare umwana w’umuhungu; kandi ntihaze hagire urupfuhe rumugera ku mutwe; kuk’ uwo mwana azoba Umunaziri[7] ku Mana uhereye akiva mu nda; kandi ni we azotangura kurokora Abisirayeli, abakūre mu maboko y’Abafilisitiya.

⁶Uwo mugore aragenda, abibarira umugabo wiwe, at’ Umuntu w’Imana yaje aho ndi; kandi mu maso hiwe hāsa n’ah’ umumarayika w’Imana, kandi hateye ubgoba cane. Ariko sinamubajije iy’ avuye, na we ntiyambgiye izina ryiwe.

⁷Ariko yambariye ngo nzosama inda, mvyare umuhungu; kandi ngo none nze nzire akaziri sinze nnywe vino cank’ ikiboreza na kimwe canke ngo ndye ikintu na kimwe gihumanya, ngo kuk’ uwo mwana azoba Umunaziri ku Mana uhereye akiva mu nda ngo gushitsa ku musi azopfirako.

⁸Maze Manowa yinginga Uhoraho, ati Bgirukiro, ndakwinginze, wa muntu wawe wadutumako ni yongere agaruke kuri twebge, atubarire uko tuzogenza uwo mwana azovuka.

⁹Nukw Imana yemerera Manowa; maz’ uwo mumarayika w’Imana asubira kugaruka aho wa mugore ari, amusanga aho yari yicaye mu murima; ariko Manowa umugabo wiwe ntiyari kumwe na we.

¹⁰Nuk’ uwo mugore aca aranyaruka, arirukanga, abibgira umugabo wiwe, ati Wa muntu yaza bga bundi yongeye kunyiyereka.

¹¹Maze Manowa ava hasi, akurikira umugore wiwe; ashikiriye uwo muntu aramubaza, ati Mbega ni wewe wavuganye n’uyu mugore? Na we ati Ni jewe.

¹²Manowa aramubaza, at’ Ivyo wavuze ni vyashika, uwo mwana tuzomurera dute? Azokora iki?

¹³Uwo mumarayika w’Uhoraho yishura Manowa, at’ Ivyo nabariye uyu mugore vyose, az’ avyirinde:

¹⁴ntaz’ arye ku kintu na kimwe kivuye ku muzabibu, ntaz’ anywe vino cank’ ikiboreza na kimwe, canke ngw arye ikintu na kimwe gihumanya; ivyo namubariye vyose az’ avyitondere.

¹⁵Maze Manowa abarira uwo mumarayika w’Uhoraho, ati Ndakwinginze, banza uhagarare, tukubāgire agasuguru.

¹⁶Uwo mumarayika w’Uhoraho aramwishura, ati Nah’ umpagaritse nta co ndiburye ku vyo kurya vyawe; ariko namb’ ugomba kubāga ikimazi co kwosa, ugishikanire Uhoraho. Ariko Manowa ntiyaribgamenye kw ar’ umumarayika w’Uhoraho.

¹⁷Maze Manowa abaza uwo mumarayika w’Uhoraho, ati Witwa nde, kugira ngw ivyo wavuze ni vyashika tuze tugushemagize?

¹⁸Uwo mumarayika w’Uhoraho aramwishura, at’ Umbariza iki izina ryanje, kw ar’ izina ritangaje?

¹⁹Nuko Manowa yābīra iyo suguru y’impene n’ishikanwa ry’ifu, abishikanirira Uhoraho hejuru ku gitandara; haca haba igitangaza, Manowa n’umugore wiwe babirorēra:

²⁰umuriro wo ku gicaniro ukiriko urarabagiza uja hejuru, wa mumarayika w’Uhoraho adūga mur’ uwo muriro wo ku gicaniro, Manowa n’umugore wiwe babirorēra; baca barapfukama, barūnama.

²¹Kuva ubgo, uwo mumarayika w’Uhoraho ntiyongeye kwiyereka Manowa cank’ umugore wiwe ukundi. Nuko Manowa amenya kw ar’ umumarayika w’Uhoraho.

²²Maze Manowa abarira umugore wiwe, ati Nta kabuza turapfuye, kuko tubonye Imana!

²³Arik’ umugore wiwe aramwishura, at’ Iyaba Uhoraho yagomba kutwica, ntaba yātwākīriye ikimazi cacu coshejwe bo n’ishikanwa ryacu ry’ifu, kandi ntaba yātweretse ivyo vyose, canke ngw atubarire amajambo ameze nk’ayo.

²⁴Hanyuma uwo mugore avyara umwana w’umuhungu, amwita Samusoni; uwo mwana arakura, Uhoraho amuha umugisha.

²⁵Maze Mpwemu w’Uhoraho atangura kumucānīra ar’ i Mahane‐dani, hagati y’i Sora n’i Eshitayoli.