Read Bibliya Yera 1951 Abacamanza 15 Bible Online

Abacamanza 15 - Bibliya Yera 1951 bible

Abacamanza 15

¹Maz’ igihe gihise, hageze mw igenya ry’ingano, Samusoni asubira iy’ umugore ari, ajanye agasuguru k’impene. Aravuga, ati Hinge nje iy’ umugore wanje ari, haruguru; ariko sebukwe ntiyamukundira kujayo.

²Aramubgira, at’ Erega nagira ngo waramwanse rwose; ni co catumye ndamuha umwe muri bagenzi bawe. Mbega murumuna we si we anamurusha ubgiza? Enda mujane mu gishingo ciwe.

³Samusoni arababgira, at’ Ubu ho nta kizombako ku vy’Abafilisitiya, ni naramuka ndabagiriye nabi.

⁴Nuko Samusoni aragenda afata imbgebge amajana atatu, ahambira ivyatsi vyo gukongerezak’ umuriro; araheza izo mbgebge azitumberanya imirizo, agenda abohera ivyo vyatsi ku mirizo ibiri‐ibiri.

⁵Amaze kudomeka ivyo vyatsi, azirekurira mu mirima y’ingano z’Abafilisitiya; uwo muriro ugenda uratōngōra kuva ku mikama itēkeye no ku ngano zigihagaze gushitsa no ku mirima y’imyelayo.

⁶Maz’ Abafilisitiya barabaza, bati Ni nde yakoze ivyo? Bati Ni Samusoni, umukwe wa wa Munyatimuna, kuko yamwātse umugore wiwe akamushingira uwundi. Nukw Abafilisitiya baca baradūga, uwo mugore bamuturirana na se.

⁷Maze Samusoni arababarira, ati Ko mukoze murtyo, sinzogenda ntabīhōye! Ariko ni naheza kubīhōra nzorekeraho.

⁸Aca arabahindikiranya, arabatikiza bikomeye; araheza aramanuka, aja kuba mu gihoro co mu gitandara c’ahitwa Etamu.

⁹Maz’ Abafilisitiya baradūga, basagaza mu Buyuda, baragandagaza, barinda bashika i Lehi.

¹⁰Ab’i Buyuda barababaza, bati N’iki kibazanye kudutera? Barabishura, bati Tuzanywe no gufata Samusoni ngo tumubohe, tumugirire nk’ivyo yatugiriye.

¹¹Maz’ abantu b’i Buyuda ibihumbi bitatu baca baramanuka, basanga Samusoni muri ca gihoro co mu gitandara c’ahitwa Etamu; baramubaza, bati Mbega ntuzi yukw Abafilisitiya ari bo batuganza? Non’ ivyo udukoreye n’ibiki? Arabishura, at’ Erega kwar’ ukubasubiriza mu nkōko ivyo bāngiriye.

¹²Baramwishura, bat’ Ikituzanye n’ukugufata ngo tukubohe, tugutange mu maboko y’ Abafilisitiya. Samusoni arabishura, ati Ni mundahire ko mutanyica mwebge ubganyu.

¹³Baramwishura, bat’ Oya, turakuboha gusa, tubagushikirize, ariko twebge ubgacu ntitukwica. Nuko bamubohesha imigozi misha ibiri, bamukūra mur’ ico gitandara baramudūgana.

¹⁴Ashitse i Lehi, Abafilisitiya bamusanganiza urwamo. Maze Mpwemu w’Uhoraho amuzako akābushūngwe, imigozi yar’ imuboshe amaboko ihinduka nk’ubugwēgwe bufashwe n’umuriro; ivyari bimuboshe ku bikonjo biravutagurika.

¹⁵Abona urwāsaya rw’indogoba rutarūma, atuma ukuboko araruraha, arwicisha abantu igihumbi.

¹⁶Maze Samusoni aravuga, at’ Urwāsaya rw’indogoba ndarurundishije ibirundo n’ ibirundo, Urwāsaya rw’indogoba ndarwicishije abantu igihumbi!

¹⁷Ahejeje kuvuga artyo, ashibura rwa rwāsaya yar’ afise mu minwe; aho hantu haca hitwa Ramati‐lehi.[9]

¹⁸Agwa umwūmwa, atakambira Uhoraho, ati Jewe umusavyi wawe ko wampaye uku kunesha gukomeye, none nicwe n’inyota, ngwe mu maboko y’ abatākebge?

¹⁹Maz’ ikinogo car’ i Lehi Imana iragisatura, amazi aradudubiza; nukw amaze kunywa, udutege turagaruka, arahēmbūka. Ni co catumye bacita Eni‐hakore:[10] kiracar’ i Lehi na bugingo n’ubu.

²⁰Nukw amara imyaka mirongwibiri acira imanza Abisirayeli, mu gihe c’Abafilisitiya.