Read Bibliya Yera 1951 Abacamanza 2 Bible Online

Abacamanza 2 - Bibliya Yera 1951 bible

Abacamanza 2

¹ Umumarayika w’Uhoraho ava i Gilugali aradūga, aja i Bokimu. Arababarira, ati Nabadūganye mbakūye muri Egiputa, mbashikana mu gihugu nasezeraniye ba sogokuruza, nkavuga, nti Nta ho nzova mw isezerano nabasezeraniye;

²nti Namwe ntimuze musezerane na ben’ iki gihugu, ariko muze musangangure ibicaniro vyabo. Yamara ntimwanyumviye. N’iki catumye mukora murtyo?

³None nanje hinge ndababarire: Abo sinzobirukana ngo bababise, ariko bazobabera ibibahanda mu mbavu, n’imana zabo zizobabera umutego.

⁴Maz’ umumarayika w’Uhoraho amaze kubgira Abisirayeli bose ayo majambo, abantu baraturikisha bararira.

⁵Aho hantu baca bahita i Bokimu;[3] bahatangira ibimazi, babishikanira Uhoraho.

⁶Kandi Yosuwa igihe yar’ amaze gusēzera abantu, umuntu wese aja mw ishamvu yiwe, ngo begukire ico gihugu.

⁷Yosuwa akiriho, abantu bāgumye k’Uhoraho, no mu gihe cose c’abakuru bāsigaye Yosuwa amaze gupfa, abāri bārabonye ibikorwa vyose bihambaye Uhoraho yakoreye Abisirayeli.

⁸Yosuwa mwene Nuni umusavyi w’Uhoraho ahwera amaze imyaka ijana n’icumi.

⁹Bāmuhamvye mw ishamvu yiwe bgite i Timunati‐sera mu mugamba w’Abefurayimu, ku ruhande rw’i burārūko rw’ umusozi Gashi.

¹⁰Hanyuma ab’ urwo runganwe bose na bo barapfa, bahamvya ababo; bakurikirwa n’urundi runganwe, abo bo bakura batazi Uhoraho, canke ngo bamenye igikorwa yakoreye Abisirayeli.

¹¹Maz’ Abisirayeli bakora ivyo Uhoraho abona kw ari bibi, basaba za Bayali;

¹²bava k’Uhoraho Imana ya ba sekuruza yabakūye mu gihugu ca Egiputa, bakurikira izindi mana zo mu mana z’abanyamahanga babakikije, bakazūnamira, bakaratsa Uhoraho.

¹³Uko ni ko bātaye Uhoraho, bagasaba Bayali na Ashitaroti.

¹⁴Uburake bg’ Uhoraho buca buziriringira Abisirayeli, abagabura mu maboko y’ abanyazi, barabanyaga, abatanga mu maboko y’abansi babo babakikije, bituma batagishobora guhagarara imbere y’abansi babo.

¹⁵Aho bāja gutera hose, Uhoraho yarabarwanya, nk’uko yari yaravuze akabarahira; bituma baja mu vyago bikomeye.

¹⁶Maz’ Uhoraho akabahagurukiriza abacamanza, bakabakiza bakabakūra mu maboko y’abābanyaga.

¹⁷Ariko bakanka kwumvira abo bacamanza babo, bakagenda bahurumbira izindi mana nk’ibimaka, bakazūnamira, bagata vuba inzira ba sekuruza bāhora bagenderamwo, ntibumvira ivyagezwe vy’ Uhoraho nk’ukw abo bāvyumvira.

¹⁸Kand’ uk’ Uhoraho yabaha umucamanza, yaba kumwe n’uwo mucamanza, akabakiza, akabakūra mu maboko y’abansi babo igihe cose uwo mucamanza akiriho, kuko vyamutera akagongwe kwumva iminiho yabo banihishwa n’ababahahaza bakabacuranguza.

¹⁹Ariko hanyuma, uwo mucamanza amaze gupfa, bagasubira inyuma, bagakora ibibi birengeye ivya ba sekuruza, bagakurikira izindi mana bakazisaba, bakazūnamira; mu ngeso zabo mbi bakanka kugira n’imwe bata, canke ngo bareke no gukomantaza imitima.

²⁰Maz’ uburake bg’Uhoraho buziriringira Abisirayeli, akavuga, at’ Iri hanga ko ryishe isezerano ryanje nasezeranye na ba sekuruza, ntibanyumvire,

²¹nanje guhēra ubu sinzokwongera kwirukana ihanga na rimwe ngo ribabise, mu yo Yosuwa yasizeho igihe yapfa,

²²kugira ngw Abisirayeli ndabageragereshe ayo mahanga, ndābe ko boruha bakagumya inzira yanje, bakayigenderamwo, nk’uko ba sekuruza bāyigenderamwo, canke ko bazokwanka.

²³Ni co catumye Uhoraho areka ayo mahanga, ntayirukane n’ingoga na n’ingoga; kandi ntiyayagomoreye Yosuwa.