Read Bibliya Yera 1951 Abacamanza 21 Bible Online

Abacamanza 21 - Bibliya Yera 1951 bible

Abacamanza 21

¹Kand’ Abisirayeli bāri bararahiriye i Misipa, bati Nta muntu n’umwe muri twebge azoshingira umwana wiwe Umubenyamini.

²Nukw abantu baja i Beteli, bicara imbere y’Imana gushitsa ku mugoroba, baboroga, barira,

³bat’ Ewe Uhoraho, Mana y’Abisirayeli, n’iki cateye ibi mu Bisirayeli, bigatuma habura umuryango umwe muri twebge?

⁴Bukeye abantu bakoroka kare, bahubaka igicaniro, bahatangira ibimazi vyo kwoswa n’ivy’ ishimwe.

⁵Maz’ Abisirayeli barabazanya, bati Ni ba nde bo mu miryango y’Abisirayeli boba batādūze ngo baje mw ikoraniro ry’ Uhoraho? Kuko bāri bararahiye indahiro ikomeye k’umuntu atazodūga gushengerera Uhoraho i Misipa atazobura gupfa.

⁶Nukw Abisirayeli baricuza kubg’ Ababenyamini bene wabo, baravuga, bat’ Uyu musi umuryango umwe uraranduwe mu Bisirayeli.

⁷None twobigenza dute ngo turonderere amasigarira yabo abagore, kandi twaramaze kugira Uhoraho indahiro ko tutazobashingira abakobga bacu?

⁸Ni kwo kubazanya, bati Harya har’ abo mu miryango y’Abisirayeli boba batādūze gushengerera Uhoraho i Misipa? Basanga kw ata muntu n’umwe yavuye i Yabeshi‐gileyadi ngw aze aho bashagaje mw ikoraniro ryabo,

⁹kukw igihe abantu bāharūrwa ntihābonetse n’umwe wo mu baba i Yabeshi‐gileyadi.

¹⁰Nukw iryo koraniro ritumay’ abantu ibihumbi cumi na bibiri b’abahizi barusha abandi; barababarira, bati Ni mugende muririkishe inkota ababa i Yabeshi‐gileyadi, mubīcane n’abagore n’ abana.

¹¹Uku abe ari ko muzobigenza: muze mugeseze umugabo wese iyo bava bakagera, n’ umugore wese, eka n’uwigeze kuryamana n’umugabo.

¹²Nuko mu baba i Yabeshi‐gileyadi babonay’ abakobga b’inkumi amajana ane batīgeze kumenya icitwa umugabo; babazana aho bashagaje i Shilo, mu gihugu c’i Kanani.

¹³Maz’ iryo koraniro ryose rituma impore ku Babenyamini bāri kuri ca gitandara c’i Rimona.

¹⁴Buno Ababenyamini baca barahūngūka, babashingira ba bigeme bārokoye mu bagore b’i Yabeshi‐gileyadi, ariko ntibābakwira.

¹⁵Nukw abantu barīcuza kubg’ Ababenyamini, kuk’ Uhoraho yari yaciye igihengeri mu miryango y’Abisirayeli.

¹⁶Maz’ abakuru b’iryo koraniro barabazanya, bati Twobigenza dute ngo turonderere abasigaye abagore? None kw abagore batikiye mu Babenyamini!

¹⁷Bat’ Amasigarira y’Ababenyamini ntakwiye kubura ishingiro, ngo hagire umuryango uzimangana mu Bisirayeli.

¹⁸Yamara twebge ntidushobora kubashingira abakobga bacu! Icabiteye n’ukw Abisirayeli bari bararahiye, ng’ Ūzoshingira Umubenyamini arakavumwa!

¹⁹Maze baravuga, bat’ Erega hariho wa musi mukuru w’Uhoraho bagira uk’ umwaka utashe i Shilo, hamwe i burārūko bg’ i Beteli, ku ruhande ruhera i burasirazuba rw’inzira iva i Beteli ija i Shekemu, i bumanuko bg’i Lebona.

²⁰Nuko babarira Ababenyamini, bati Ni mugende muryame mu mizabibu,

²¹murereke: maz’ abakobga b’i Shilo ni basokoroka baja kuvyina, muce musokoroka aho mubunze mu mizabibu, umuntu wese acakire umwigeme mur’ abo bigeme b’i Shilo, amugire umugore wiwe; muheze mwitahire mu gihugu c’i Bubenyamini.

²²Maze ba se canke basāza babo ni baza kutwitwarako, tuzobabgira, tuti Ni mubaduhe ku neza, kukw abagore twābasahuriye muri ya ntambara batābakwiye. Tuti Kandi kw atari mwebge mwababīhēreye, nta co muriko.

²³Nukw Ababenyamini babigenza kuno, binyagira abageni mu baje kuvyina bahwanye n’igitigiri cabo, barabashorera; baraheza barīgīra, basubira mw ishamvu yabo, bongera kwubaka ibisagara, babibamwo.

²⁴Ico gihe nyene Abisirayeli na bo bavayo, umuntu wese asubira mu muryango w’i wabo no mu nzu y’i wabo; bitahira mu mashamvu yabo.

²⁵Kandi mur’ iyo misi Abisirayeli nta mwami bāribgagire: umuntu wese yakora ico yigombeye.