Read Bibliya Yera 1951 Abacamanza 3 Bible Online

Abacamanza 3 - Bibliya Yera 1951 bible

Abacamanza 3

¹Aya ni yo mahanga Uhoraho yaretse, kugira ngw ayageragereshe Abisirayeli, cane‐cane abatigeze kubona intambara zabaye i Kanani;

²ico yagomba gusa kwar’ ukugira ngw abārutse hanyuma bo mu Bisirayeli bamenyerezwe ivy’ intambara, avyigishe abatigeze kubimenya ubga mbere.

³Hār’ abaganwa batanu b’Abafilisitiya, n’Abanyakanani bose, n’Abasidoni, n’Abahiwi bo ku musozi Lebanoni, uhereye ku musozi Bayali‐Herumoni ugashitsa ahafata i Hamati.

⁴Abo ni bo Uhoraho yaretse, kugira ngw abageragereshe Abisirayeli, arābe ko bokwitondera ivyagezwe vyiwe, ivyo yageze ba sekuruza abitumye Mose.

⁵Nukw Abisirayeli baba hagati y’Abanyakanani n’Abaheti n’Abamori n’Abaferizi n’Abahiwi n’Abayebusi.

⁶Barashingirana, batako basaba imana zabo.

⁷Maz’ Abisirayeli bakora ivyo Uhoraho abona kw ari bibi, bibagira Uhoraho Imana yabo, basaba za Bayali na za Ashera.

⁸Bituma uburake bg’Uhoraho buziriringira Abisirayeli, abagabura mu maboko ya Kushani‐rishatayimu umwami w’i Aramu‐naharayimu; Abisirayeli baganzwa na Kushani‐rishatayimu imyaka munani.

⁹Maz’ Abisirayeli batakambiye Uhoraho, abahagurukiriza uwo kubakiza yitwa Otiniyeli mwene Kenazi, murumuna wa Kalebu; arabakiza.

¹⁰Mpwemu w’Uhoraho amuzako, ahinduka umucamanza w’Abisirayeli. Bukeye aja gutera, maz’ Uhoraho amugomorera Kushani‐rishatayimu uwo mwami w’i Aramu‐naharayimu, aramunesha.

¹¹Nukw ico gihugu gihabga impore kumara imyaka mirongwine. Maze Otiniyeli mwene Kenazi arapfa.

¹²Abisirayeli bongera gukora ivyo Uhoraho abona kw ari bibi, maz’ Uhoraho aha ubushobozi Eguloni umwami w’i Mowabu bgo kurwanya Abisirayeli, kuko bari bakoze ibibi mu nyonga ziwe.

¹³Eguloni atabaza Abamoni n’ Abamaleki, aja gutera Abisirayeli arabanesha, begukira ca gisagara co mu bigazi.

¹⁴Nukw Abisirayeli baganzwa na Eguloni umwami w’i Mowabu imyaka cumi n’ umunani.

¹⁵Maz’ Abisirayeli batakambiye Uhoraho, abahagurukiriza uwo kubakiza yitwa Ehudi mwene Gera w’Umubenyamini; yar’ ibamfu. Bukeye Abisirayeli bamurungikana ishikanwa ryo gushikanira Eguloni umwami w’i Mowabu.

¹⁶Maze Ehudi yicurishiriza intambi; uburebure bgayo bgar’ itambge rimwe ry’ukuboko uciriye mu nkokora; ayambara kw itako ry’i buryo, ayirenzakw impuzu ziwe.

¹⁷Nukw aragenda, ashikanira Eguloni umwami w’i Mowabu iryo shikanwa; kandi Eguloni yar’ umuntu yavyibushe yasenyutse.

¹⁸Nuko Ehudi ahejeje kwākīrirwa iryo shikanwa, arungika abantu baje baryikoreye.

¹⁹Ariko we, ashitse i Pesilimu hafi y’i Gilugali, arakimirana; arashika abgira umwami, ati Bgirukiro, mfise ijambo ry’ibanga nsaba kukubgira. Na we ati Banza uhagarare. Maz’ abāri kumwe na we bose barataramuka.

²⁰Nuko Ehudi aramwēgēra aho yar’ avyagiye ari wenyene, mu cumba co gusama akayaga co hejuru ku nzu; Ehudi aramubgira, ati Ngufitiye ijambo ntumwe n’Imana. Nuko Eguloni ahaguruka ku ntebe yiwe.

²¹Maze Ehudi atuma ukuboko kwiwe kw’i bumoso, anyakura intambi kw itako ry’i buryo, ayimuzibura ku nda;

²²iyo ntambi ijana n’ikirindi na co, ibinure biyirenga hejuru, kukw atāyisokōye, iseruka mu mugongo.

²³Maze Ehudi arasohoka, ashitse ku rubaraza aramwugarana, yugaza inzugi z’ico cumba urupfunguzo.

²⁴Amaze gusohoka, abantu ba Eguloni baraza, basanga inzugi z’ico cumba zidadiye, bati Ngira ngw ari kwihagarika mu kazu ko mur’ ico cumba co gusama akayaga.

²⁵Bararorēra gushitsa bibazazaniye kukw atuguruye inzugi z’ico cumba; bararuha bazana urupfunguzo, barugurura: basanga umwami wabo arambaraye hasi yāpfuye.

²⁶Ico gihe bāmaze bagitebaganye, Ehudi arabajana, aca i Pesilimu, ashika i Seyira.

²⁷Ashitseyo, avugisha inzamba mu mugamba w’Abefurayimu: Abisirayeli bamanukana na we bavuye mur’ uwo mugamba, abagiye imbere.

²⁸Arababarira, ati Ni munkurikire, kuk’ Uhoraho agabuye abansi banyu b’Abanyamowabu mu maboko yanyu. Nuko bamanukana na we bamwōmyeko, bazibira ivyambu vya Yorodani bija i Mowabu, ntibākundira umuntu n’umwe kujabuka.

²⁹Ico gihe bica abagabo nk’ ibihumbi cumi b’Abanyamowabu, bose b’abahizi b’intōre; ntihārokoka n’uwa kirazira.

³⁰Nuk’ uwo musi Abanyamowabu baneshwa n’Abisirayeli. Igihugu gihabga impore kumara imyaka mirongumunani.

³¹Ehudi akurikirwa na Shamugari mwene Anati, yica Abafilisitiya amajana atandatu, abicisha umuhunda w’inyobozo y’inka; na we akiza Abisirayeli.