Read Bibliya Yera 1951 Abacamanza 4 Bible Online

Abacamanza 4 - Bibliya Yera 1951 bible

Abacamanza 4

¹Ehudi amaze gupfa, Abisirayeli bongera gukora ivyo Uhoraho abona kw ari bibi.

²Uhoraho abagabura mu maboko ya Yabina umwami w’i Kanani, yaba i Hasori; kand’ umugabisha w’ingabo ziwe yari Sisera, yaba i Harosheti‐ha‐goyimu.

³Maz’ Abisirayeli batakambira Uhoraho, kubg’ imikogote y’ivyuma amajana cenda Yabina yar’ afise, kandi yar’ amaze imyaka mirongwibiri ahahaza Abisirayeli bibi.

⁴Ico gihe Debora, uwavugishwa n’Imana, muka Lapidoti, ni we yar’ umucamanza w’Abisirayeli.

⁵Yakunda kwicara musi y’ikigazi citwa ica Debora nyene, cari hagati y’i Rama na Beteli mu mugamba w’Abefurayimu; kand’ Abisirayeli bāma badūga baja kuri we ngw abacire imanza.

⁶Bukeye atuma i Kedeshi‐nafutali guhamagara Baraki mwene Abinowamu; aramubgira, at’ Uhoraho Imana y’Abisirayeli arakugeze, ngo Genda ukoranirize i Tabora ingabo ibihumbi cumi bo mu ba Nafutali no mu ba Zebuloni;

⁷ngo Na we azokwegakwega Sisera, umugabisha w’ingabo za Yabina, agusange ku mugezi Kishoni n’imikogote yiwe n’ingabo ziwe, kandi ngw Azomugabura mu maboko yawe.

⁸Baraki aramwishura, ati Ni twajana nawe nzogenda, ariko ni tutajana sinzogenda.

⁹Aramwishura, ati Nuko tuzojana: yamara rer’ urwo rugendo uzogenda ntiruzotuma ushirwa hejuru, kuk’ Uhoraho agiye kuzogabura Sisera mu maboko y’umugore. Nuko Debora ava hasi, ajana na Baraki i Kedeshi.

¹⁰Bukeye Baraki ahamagaza Abazebuloni n’Abanafutali ngo bakoranire i Kedeshi; nukw ingabo ibihumbi cumi ziradūga zimukōndōreye inyuma, na Debora na we barajana.

¹¹Heberi w’Umunyakeni yari yaritandukanije n’Abanyakeni bandi, ari bo buzukuruza ba Hobabu muramu wa Mose, yar’ ashinze ihema ryiwe musi y’igiti c’umweloni i Sananimu, hafi y’i Kedeshi.

¹²Maze babarira Sisera yuko Baraki mwene Abinowamu adūze ashitse ku musozi Tabora.

¹³Nuko Sisera akoranya imikogote yiwe yose y’ivyuma ukw ar’ amajana cenda, n’ingabo zose yar’ afise, uhereye i Harosheti‐ha‐goyimu ugashitsa ku mugezi Kishoni.

¹⁴Maze Debora abgira Baraki, ati Haguruka, kuk’ uyu musi ari wo Uhoraho agabuye Sisera mu maboko yawe. Rāba Uhoraho ni we akugiye imbere. Nuko Baraki amanukana n’ingabo ziwe ukw ar’ ibihumbi cumi, bava ku musozi Tabora bamukōndōreye inyuma.

¹⁵Maz’ Uhoraho ashwiragiriza imbere ya Baraki imikogote yose ya Sisera n’ingabo ziwe zose, abatsindisha inkota; Sisera arataruka ava mu mukogote wiwe, ahunga yiruka ku maguru.

¹⁶Ariko Baraki yōma inyuma y’iyo mikogote n’izo ngabo, barinda bashika i Harosheti‐ha‐goyimu; ingabo za Sisera zose zishirira ku nkota, ntihasigara n’uwa kirazira.

¹⁷Ariko Sisera, uko yagahunze yiruka ku maguru, ashika kw ihema rya Yayeli muka Heberi w’Umunyakeni, kuko Yabina umwami w’i Hasori n’ab’ inzu ya Heberi Umunyakeni bari bafitaniye ubumwe.

¹⁸Maze Yayeli arasohoka, asanganira Sisera, aramubarira, ati Kebereza hano mugenzi, winjire i wanje, ntutinye. Nukw arakevya, yinjirana na we mw ihema, amurenzak’ uburengeti.

¹⁹Sisera aramubarira, at’ Enda se n’umpe utuzi two kunywa, kukw inyota inyishe. Yayeli apfundura icansi c’amata, aramuha aranywa; maz’ aramupfuka.

²⁰Sisera aramubarira, ati Genda wihagararire mu muryango w’ihema, maze ni hagira umuntu aza, akakubaza, ati Har’ umuntu aje ngaho? umwishure, uti Na mba.

²¹Maze Yayeli muka Heberi yābīra urumambo rw’ihema n’inyundo, aza yōmbōka, amunega urumambo mu mvuridahita, rushinga hasi, kuko yari mw itiro ryinshi, arushe cane; nukw arapfa.

²²Maze haza Baraki akurikiranye Sisera; Yayeli arasohoka, aramusanganira, aramubarira, ati Ngwino nkwereke uwo urondera. Barinjirana, asanga Sisera arambaraye, yapfuye, urumambo rukineze mu mvuridahita.

²³Uko ni kw Imana yamaze igabo Yabina umwami w’i Kanani kur’ uwo musi, imbere y’Abisirayeli.

²⁴Nukw Abisirayeli bagenda barushiriza kugira ubushobozi bgo kumunesha, gushitsa bamuherengeteje.