Read Bibliya Yera 1951 Abacamanza 5 Bible Online

Abacamanza 5 - Bibliya Yera 1951 bible

Abacamanza 5

¹Kur’ uwo musi Debora na Baraki mwene Abinowamu bararirimba,

²bati Ni muhimbaze Uhoraho, Kuko habonetse imena zo kurōngōra Abisirayeli, Abantu bagaheba amagara yabo babikunze.

³Ni mwumve, yemwe bami; mutege amatwi, namwe baganwa: Nanje ndirimbe, ndirimbire Uhoraho, Ndirimbe ishimwe ry’Uhoraho Imana y’Abisirayeli.

⁴Ewe Uhoraho, igihe wava i Seyiri, Ukīsidukira uvuye mu ntāra ya Edomu, Isi yahinze agashitsi, ijuru rirajojota, Mber’ ibicu bijojota amazi;

⁵Imisozi yadegerejwe imbere y’Uhoraho, Na Sinayi n’uko, imbere y’ Uhoraho Imana y’Abisirayeli.

⁶Mu gihe ca Shamugari mwene Anati, No mu gihe ca Yayeli, inzira z’ibihamo zari zasivye, Abahita bāri basigaye bajana utuyira tw’inkereramucāmo.

⁷Ntihāri hagisigaye abo kurōngōra Abisirayeli, Kugeza ubgo jewe Debora nahagurutse, Mpaguruka nd’ umuvyeyi w’ Abisirayeli.

⁸Igihe bitoraniriza izindi mana, Intambara zaciye zishika ku marembo yabo. Nta nkinzo cank’ icumu vyari bikiboneka Mu Bisirayeli naho boba ibihumbi mirongwine.

⁹Umutima wanje wose uri ku barōngōra Abisirayeli, Ku bāhevye amagara yabo mu bantu: Ni muhimbaze Uhoraho!

¹⁰Yemwe abagendera ku ndogoba z’ibihororo, Yemwe abīshānyāngira ku mikeka myiza, Yemwe abari ku nzira, ni muririmbe.

¹¹Aho bavuga ibicuba ku ngomero z’inka, Abe ari ho batāzīrira Uhoraho kubg’ intsinzi yiwe, Kubg’ intsinzi yiwe arōngōye Abisirayeli. Aho ni ho abantu b’Uhoraho bāmanutse, bagatamaza mu marembo yabo.

¹²Ikangure, ikangure, Debora! Ikangure, ikangure, ushirek’ uririmbe! Haguruka, Baraki, wijanire inyagano, ewe mwene Abinowamu!

¹³Amasigarira y’abahambaye n’ ay’ abanyagihugu baramanuka, Uhoraho amanukanwa no kuntabara abahizi.

¹⁴Abefurayimu bamanuka mu mwonga, Ari mwebge bakurikiye, yemwe Babenyamini, bīvanze mu banyu; Mu Bamakiri hamanuka abagabisha, Mu Bazebuloni hamanuka abatwaye inkoni y’ubugabe;

¹⁵Abaganwa bo mu Bisakari bari kumwe na Debora, Mber’ Abisakari bakurikira Baraki; Bītera mu mwonga bamwōmye inyuma. Ku migezi y’Abareyubeni Hābaye kwibūranya gukomeye,

¹⁶Ngo N’iki catumye wicara hagati y’impongore z’intama, Ngo wumvirize imyironge y’ abungere? Ku migezi y’Abareyubeni Ni ho hābaye kwibūranya gukomeye.

¹⁷N’Abagileyadi bīgumiye hakurya ya Yorodani; Mbeg’ Abadani n’iki catumye biyicarira mu māto? Abasheri na bo biyicariye ku musenyi w’ikiyaga, Bīgumira mu bigobe vyaco.

¹⁸Abazebuloni n’abantu bahevye amagara yabo kugeza ku gupfa, N’Abanafutali ni ko bitanze ku mpinga z’imisozi.

¹⁹Abami baraza, bararwana; Abami b’i Kanani barwanira i Tanaki ku mazi y’i Megido, Ariko nta masahu y’ifeza bāronse.

²⁰Inyenyeri zo kw ijuru ziratabara, Zirwanya Sisera zijanye inzira zazo.

²¹Umugezi Kishoni urabatembana, Ni wo wa mugezi wa kera witwa Kishoni. Ewe mutima wanje, iserure mu buhizi!

²²Amafarasi avuza imirindi Agendeshwa akābushūngwe n’ abahizi.

²³Ni muvume Merozi, ni k’ umumarayika w’Uhoraho agize; Muvume abahaba mubakoze! Kuko batātabaye Uhoraho, Ngo bamutabare kurwanya abahizi.

²⁴Yayeli aragahezagirwa kurusha abandi bagore, Muka Heberi Umunyakeni Aragahezagirwa kurusha abandi bagore baba mu mahema!

²⁵Yamusavye amazi, amuha amata, Amuzanira urubu mu gikombe c’icubahiro.

²⁶Atuma ukuboko, yābīra urumambo, Atuma ukw’i buryo, yābīra inyundo y’abakozi; Akubita Sisera, amumena umutwe, Aramusāvya, aramutobekeranya mu mvuridahita.

²⁷Ayāmīrira imbere y’ibirenge vyiwe, arakumbagara, ararambarara; Imbere y’ibirenge vyiwe ni ho yayāmīriye, arakumbagara: Aho yayāmīriye ni ho yacīkāniye.

²⁸Nyina wa Sisera arerekera mw idirisha, Acishiriza mu nshingo zaryo yibaza, Ati Mbeg’ umukogote wiwe k’ utevye kuza? Imirindi y’amafarasi akwega imikogote kw itarakakaza?

²⁹Ab’ incabgenge bo mu ncoreke ziwe baramubarira, Bahūza n’ivyo na we ubgiwe yibgira:

³⁰Ngo Ngira ngo n’uko bakigabangana isahu baronse: Umugabo wese aratwara umwigeme umwe canke babiri, Sisera na we aratwara isahu y’impuzu z’amabara, Impuzu zijererenze amabara, Zijererenze amabara impande zompi zo kwambara mw izosi zivuye mw isahu!

³¹Uhoraho we, abansi bawe bose baragapfa bartyo, Arikw abagukunda babe nk’ izuba rirashe risasitse! Maz’ igihugu gihabga impore kumara imyaka mirongwine.