Read Bibliya Yera 1951 Abacamanza 8 Bible Online

Abacamanza 8 - Bibliya Yera 1951 bible

Abacamanza 8

¹Maz’ Abefurayimu babaza Gideyoni, bati Watubonyekw iki, cātumye utadutabaza ukija kurwana n’Abamidiyani? Baramutonganya cane.

²Arabishura, ati Har’ ico nakoze gihwanye n’ ico mwakoze? Mbeg’ imizabibu Abefurayimu mwahumvye ntirengeye iy’ Ababiyezeri bimbuye?

³Erega ni mwebge Imana yahaye abo baganwa b’Abamidiyani, Orebu na Zebu, ibagabura mu maboko yanyu: none har’ ico nashoboye gukora gihwanye n’ico mwakoze? Avuze ivyo, uburake bari bamufitiye burahwama.

⁴Nuko Gideyoni ashika kuri Yorodani, ajabukana na za ngabo ziri kumwe na we amajana atatu, zicōmye inyuma y’abansi, zinaniwe.

⁵Ashitse i Sukoti abarira abaho, ati Ntabara mumpēmbūrire aba bantu tugendanye, kuko bananiwe, kandi turacakurikiranye abami b’Abamidiyani, Zeba na Salumuna.

⁶Abatware b’i Sukoti baramwishura, bat’ Aho Zeba na Salumuna murabafise, bari mu maboko yanyu, ngo duhēmbūre ingabo zawe?

⁷Gideyoni arabishura, ati Nuko rero, Uhoraho ni yamara kugabura Zeba na Salumuna mu maboko yanje, nzoza mbashishaguze amahwa yo mw ishamba n’imibambangwe!

⁸Avayo, aja i Peniyeli, n’abaho ababgira nk’uko, na bo bamwishura nk’ukw ab’i Sukoti bamwishuye.

⁹Nukw abgira ab’i Peniyeli, ati Ni nagaruka amahoro nzohomvagura uyu munara.

¹⁰Kandi Zeba na Salumuna bar’ i Karikori, hamwe n’ingabo zabo zishika nko ku bihumbi cumi na bitanu, ari zo zari zisigaye gusa mu ngabo zose z’ab’i burasirazuba, kuko mu rugamba hāri hāgūye ingabo ibihumbi ijana na mirongwibiri zizi kurwanisha inkota.

¹¹Maze Gideyoni adūgana inzira ica mu bībēra mu mahema hirya y’i Noba n’i Yogi‐beha ku ruhande rw’i burasirazuba, asanga izo ngabo zījajaye, arazitera.

¹²Zeba na Salumuna barahunga, abōma inyuma, afata mpiri abo bami b’i Midiyani ukw ari babiri, aca igikuba ingabo zabo zose.

¹³Nuko Gideyoni mwene Yowasi agarukira ku mudūgo w’i Heresi, aratabāruka.

¹⁴Ahūra n’umusore wo mu b’i Sukoti, aramufata, aramudedaguza, na we aca amwandikira amazina y’abaganwa n’abakuru b’i Sukoti, bashika ku bantu mirongwirindwi n’indwi.

¹⁵Ashitse i Sukoti abarira abaho, ati Ni murābe Zeba na Salumuna ngaba, aho mwari mukingaya, ngo Mbega Zeba na Salumuna aho murabafise, bari mu maboko yanyu, ngo duhēmbūre ingabo zawe zishonje?

¹⁶Nukw afata abakuru bo mur’ ico gisagara, aca amahwa yo mw ishamba n’imibambangwe, abishishaguza abo bantu b’i Sukoti.

¹⁷Maz’ ahomvagura na wa munara w’i Peniyeli, yica abantu bo mur’ ico gisagara.

¹⁸Maz’ abaza Zeba na Salumuna, ati Mbeg’ abantu mwiciye i Tabora bāsa bate? Baramwishura, bati Bāsa n’uko kwawe: umuntu wese yasa n’umwana w’ umwami.

¹⁹Arababgira, ati Barya bār’ abo tuvukana, mbere bāri bene mama. Iyaba mwarabaretse, mbarahiye uguhoraho kw’Uhoraho, sinabica!

²⁰Maz’ abarira imfura yiwe Yeteri, ati Va hasi ubice. Arik’ uyo muhungu ntiyubahuka gusokōra inkota, kuko yar’ akiri muto.

²¹Nuko Zeba na Salumuna baravuga, bati Haguruka, abe ari wewe utwiyicira: urukāmvye rumara umugabo. Gideyoni aca ava hasi, yica Zeba na Salumuna, yambura ingamiya zabo ibihete vyari mu mazosi yazo.

²²Maz’ Abisirayeli babarira Gideyoni, bati N’utuganze, wewe ubgawe, n’umwana wawe az’ atuganze, n’umwuzukuru wawe, kuko wadukijije, ukadukūra mu maboko y’Abamidiyani.

²³Gideyoni arabishura, at’ Eka sinemeye kubaganza, n’umwana wanje ntazobaganza; arik’ Uhoraho ni we azobaganza.

²⁴Maz’ arababarira, ati Mugabo, har’ ico mbasaba: umuntu wese n’ampe impeta zo ku matwi yanyaze. (Abo bansi bari bambaye impeta z’izahabu ku matwi, kuko bār’ Abishimayeli.)

²⁵Baramwishura, bati Turaziguha cane. Nuko basasa impuzu hasi, umuntu wese atererakw impeta zo ku matwi yanyaze.

²⁶Kandi kuriba kw’izo mpeta z’izahabu kwari shekeli igihumbi n’amajana ndwi, udashizemw’ ibihete n’utugenegene n’impuzu z’inyambarabami, ivy’ abo bami b’i Midiyani bambara, udashizemwo n’imigufu yari ku mazosi y’ingamiya zabo.

²⁷Maz’ izo zahabu Gideyoni azikoramw’ icitwa efodi, ayishira mu gisagara c’i wabo Ofura; maz’ Abisirayeli bose bahondoganirayo, bayihurumbira nk’ibimaka; ihindukira Gideyoni n’abiwe umutego.

²⁸Nukw Abamidiyani bamarwa igabo n’Abisirayeli: ntibāsubira kuvyutsa umutwe ukundi; mu gihe ca Gideyoni igihugu gihabga impore kumara imyaka mirongwine.

²⁹Nuko Yerubayali mwene Yowasi, ari we Gideyoni, ni kwo gutaha, yībēra i muhira;

³⁰kand’ abahungu yivyariye bāri mirongwirindwi, kuko yar’ afise abagore benshi.

³¹Kandi yar’ afise incoreke i Shekemu, na yo ayivyarak’ umwana w’umuhungu amwita Abimeleki.

³²Nuko Gideyoni mwene Yowasi apfa yīsāziye neza, bamuhamba mu mva yahambgemwo se Yowasi, ku musozi Ofura w’Ababiyezeri.

³³Maze Gideyoni apfuye, Abisirayeli baca bahindukirira za Bayali, bazihurumbira nk’ibimaka, kandi Bayali‐beriti bayigira imana yabo.

³⁴Maze ntibaba bacibuka Uhoraho Imana yabo, yabakijije akabakūra mu maboko y’abansi babo bose bāri babakikije.

³⁵Kandi ntibagirira neza ab’ inzu ya Yerubayali, ari we Gideyoni, ngo bamwishure ineza yose yari yarabagiriye.