Read Bibliya Yera 1951 Rusi 3 Bible Online

Rusi 3 - Bibliya Yera 1951 bible

Rusi 3

¹Nawomi inabukwe aramubaza, ati Mukobga wanje, sinokurangira urugo, kugira ng’ umererwe neza?

²None ntihariho Bowazi wo mu muryango wacu, umwe wabana n’abigeme biwe? Umve iri joro aragosōreza sayiri kuri ya mbuga.

³Nuko wiyuhagire, wīsīge, wambare imyambaro yawe, umanuke uje ku mbuga: ariko ntumwiyereke atararangiza kurya no kunywa.

⁴Nuko rero, ni yaryama, witegereze aho aja kuryama, nawe ujeyo, worosore ibirenge vyiwe, uryame; na we arakubgira ico uja gukora.

⁵Aramwishura, at’ Ic’ umbgiye cose ndagikora.

⁶Aramanuka aja ku mbuga, abikora vyose nk’uko inabukwe yamubariye.

⁷Bowazi amaze kurya no kunywa, ahimvye mu mutima wiwe, aja kuryama i ruhande y’ ikirundo c’umuhure: na we aza asōbōka, yorosora ibirenge vyiwe, araryama.

⁸Maze mu gicugu uwo mugabo arīkanga, arihindukiza: asanga har’ umugore aryamye hepfo y’ibirenge vyiwe.

⁹Aramubaza, at’ Uri nde? Aramwishura, ati Nd’ incoreke yawe Rusi; worose umuja wawe umwambaro wawe, kuk’ ur’ umucunguzi wacu.

¹⁰Aramwishura, at’ Uragahezagirwa n’Uhoraho, mukobga wanje; ineza werekanye none iruta iyo werekanye ubga mbere, kuk’ utārondeye imisore, ar’ aboro cank’ abatunzi.

¹¹None rero, mukobga wanje, nta co utinya; ndakugirira ivyo uvuze vyose: kukw abashingantahe bose b’i wacu bazi yuk’ ur’ umugore aroranye.

¹²N’ukuri koko nd’ umucunguzi wanyu, ariko harih’ uwundi andusha kuba umucunguzi wo hafi.

¹³Rāra hano iri joro, kandi mu gitondo ni yakugirira ivy’ umucunguzi bizoba vyiza, az’ abikugirire; ariko ni yanka kubikugirira, ndahiye uguhoraho kw’Uhoraho yuk’ ubganje nzokugirira ivy’ umucunguzi: ryama buce.

¹⁴Aryama hepfo y’ibirenge vyiwe, ageza mu rubungubungu: avyuka hataragera igihe umuntu yohwihwisha uwundi. Kuko yagira ngo Vyoye kumenyekana yuk’ uyo mugore yaje ku mbuga.

¹⁵Aramubgira, ati Zana umutamana wawe uwutege; amugerera ingero zitandatu za sayiri, arazimukorera, aja mu gisagara.

¹⁶Ashitse kwa inabukwe, aramubaza, ati Ni wewe ga mukobga wanje? Na we amwīgānira vyose ivyo uwo mugabo yamugiriye.

¹⁷At’ Izi ngero za sayiri ukw ari zitandatu ni we yazimpaye: kuko yambgiye, ati Ntiwosubira kwa nyokobukwe ata co ufise.

¹⁸Nawomi aramubarira, at’ Iyicarire mukobga wanje, ushitse ah’ uribumenyere amaherezo yavyo; kuk’ uyo mugabo ataja kuruhuka, gushitsa ah’ abirangiriza uyu musi.