Read Bibliya Yera 1951 1 Samweli 1 Bible Online

1 Samweli 1 - Bibliya Yera 1951 bible

1 Samweli 1

¹Hār’ umuntu w’i Ramatayimu‐sofimu, mu mugamba w’Abefurayimu, yitwa Elukana; yari mwene Yerohamu, Yerohamu wa Elihu, Elihu wa Tohu, Tohu wa Sufu, w’Umwefurayimu.

²Yar’ afise abagore babiri, umwe yitwa Hana, uwundi Penina; Penina ni we yavyara, ariko Hana yar’ ingumba.

³Uwo muntu yama ava mu gisagara c’i wabo uk’ umwaka utashe, akadūga i Shilo gusenga no gushikanira Uhoraho Nyen’ ingabo ibimazi. Kandi bene Eli bompi, Hofuni na Finehasi, bār’ abaherezi b’Uhoraho aho hantu.

⁴Umusi Elukana yatangakw ikimazi, yahakw imitigiri Penina umugore wiwe, n’abahungu biwe n’abakobga biwe;

⁵ariko Hana yamuha umutigiri ungana n’iyabo kabiri, kuko yamukunda; arik’ Uhoraho yari yaramuzivye inda.

⁶Kandi mukēba we yama amushinyagurira, akamutera intuntu, kuk’ Uhoraho yamuzivye inda.

⁷Uko ni ko vyāgenda, uk’ umwaka utashe: uko Hana yadūga aja mu ngoro y’Uhoraho, ni ko mukēba we yamushinyagurira. Ni co cātuma arira, akanka kurya.

⁸Maz’ umugabo wiwe Elukana aramubaza, at’ Urizwa n’iki ga Hana? N’iki kikubuza kurya? Ubabajwe n’iki? Mbega sinkurutira abahungu cumi wovyaye?

⁹Maze barangije kurya no kunywa aho bāri bari i Shilo, Hana ava hasi. Kandi Eli umuherezi yari yicaye ku ntebe yiwe ku gishimaryango mu rusengero rw’Uhoraho.

¹⁰Maze Hana asenga Uhoraho afise intuntu, arira cane,

¹¹asezerana isezerano, at’ Ewe Uhoraho Nyen’ ingabo, ni warāba umubabaro wanje incoreke yawe, ukanyibuka, ntunyibagire jewe incoreke yawe, ukantabaza umwana w’umuhungu, nanje nzomuguha, Uhoraho, abe uwawe kuzorinda apfa, kandi nta rupfuhe ruzomugera ku mutwe.

¹²Nukw akomeje artyo gusengera imbere y’Uhoraho, Eli yitegereza umunwa wiwe;

¹³kuko Hana yavugira mu mutima, akubita umunwa gusa, arikw ijwi ryiwe ritumvikana; ni co catumye Eli yiyumvira kw aborewe.

¹⁴Nuko Eli aramubaza, at’ Uzogeza hehe kwama uborewe? Genda uhebe iyo vino yawe!

¹⁵Ariko Hana aramwishura, at’ Oyaye mwami wanje, nd’ umuntu yabonye amahano! Nta vino nanyoye cank’ ikindi kiboreza, ariko nariko ndasuka amajojwa yanje imbere y’Uhoraho.

¹⁶Ntugire ngo nd’ umuntu w’ umunyangeso mbi, kukw aka kanya kose namye mvugana umubabaro n’amaganya bindengeye.

¹⁷Maze Eli aramwishura, ati Nuko ni wīgīre amahoro; Imana ya Isirayeli iguhe ico wayisavye.

¹⁸Na we aramwishura, ati N’ umpangaze, jewe incoreke yawe. Maz’ uwo mugore arīgīra; araheza ararya, ntiyasubira kwiraburanirwa ukundi.

¹⁹Bukeye barazinduka, baja imbere y’Uhoraho barasenga; bahejeje barataha, basubira i wabo i Rama. Maze Elukana arārira Hana umugore wiwe, Uhoraho aramwibuka.

²⁰Igihe kiragera, Hana asama inda, avyara umwana w’umuhungu, amwita Samweli, ati Kuko namusavye Uhoraho.

²¹Maz’ uwo mugabo Elukana akora abo mu rugo rwiwe bose aradūga, aja gushikanira Uhoraho ikimazi c’uwo mwaka no gushitsa amasezerano yiwe.

²²Ariko Hana ntiyadūgayo, abarira umugabo wiwe, at’ Umwana ni yamara gucūka ni ho nzodūga, ndamujane, ashikirizwe Uhoraho, agumey’ igihe cose.

²³Maze Elukana umugabo wiwe aramwishura, ati N’ukore ico ushimye: wigumire aho gushitsa ah’uzomucūkiriza; arik’ Uhoraho n’ashitse ijambo ryiwe. Nuk’ uwo mugore yigumira ngaho, yonsa umwana wiwe, gushitsa aho yamucūkirije.

²⁴Amaze kumucūtsa aramudūgana, ajana n’imasa imaze imyaka itatu, n’ingero yitwa efa y’ifu, n’umukuza w’urusato wa vino; nukw amujana i Shilo mu ngoro y’Uhoraho; kand’ uwo mwana yar’ akiri mutoya.

²⁵Babāga nya masa, bazanira Eli uwo mwana.

²⁶Maze Hana aravuga, ati Mwami wanje, indahiro ni wewe nyene, erega ni jewe wa mugore nari mpagaze i ruhande yawe, mwami wanje, nsaba Uhoraho.

²⁷Uyu mwana ni we nasaba, kand’ Uhoraho yampaye ico namusavye.

²⁸Ni co gitumye ndamugize inkūka y’Uhoraho; azorinda apfa ar’ inkūka y’Uhoraho. Nuko basengera Uhoraho aho hantu.