Read Bibliya Yera 1951 1 Samweli 28 Bible Online

1 Samweli 28 - Bibliya Yera 1951 bible

1 Samweli 28

¹Mur’ iyo misi Abafilisitiya bakoranya ingabo zabo ngo baje gutera Abisirayeli. Akishi abarira Dawidi, at’ Umenye neza ko mwe n’abantu bawe muzotabarana nanje mu rugamba.

²Dawidi aramwishura, ati Ni ko; kandi ni ho uzomenyera ico ndimwo, jewe umusavyi wawe. Akishi aramwishura, ati Nuko nanje nzokugira uwo kuzigama agatwe kanje na ntaryo.

³Samweli yar’ amaze gupfa; Abisirayeli bose bari baramuririye, bamuhamba i Rama mu gisagara yabamwo. Kandi Sauli yari yarahoneje abahamagara imizimu n’ abamenyi mu gihugu.

⁴Nukw Abafilisitiya barakorakorana, baraza basagaza i Shunemu; Sauli na we akoranya Abisirayeli bose, basagaza i Gilibowa.

⁵Sauli abonye ingabo z’Abafilisitiya, aratinya, aranduka umutima.

⁶Arikw asiguje Uhoraho, ntiyagira ico amwishura, ari mu nzozi, ari mu buryo bga Urimu, haba no mu bavugishwa na we.

⁷Maze Sauli abarira abantu biwe, ati Ni mumbarize umupfumukazi azi guhamagara imizimu, nje kumubaza. Abantu biwe baramwishura, bati Harih’ umupfumukazi abizi i Endori.

⁸Nuko Sauli ariyoberanya, yambara izindi mpuzu, ajana n’abantu babiri, baja kur’ uwo mupfumukazi mw ijoro. Maze Sauli aramubarira, ati Ntabara umpamagarize umuzimu ubumenyi bgawe, unzūrire uwo ngira nkubarire.

⁹Uwo mupfumukazi aramwishura, ati Mbega ntuzi ivyo Sauli yakoze, ingene yahoneje abahamagara imizimu n’abamenyi mu gihugu? N’iki gitumye ugomba kunta mu mutego, kugira ng’ unyicishe?

¹⁰Sauli amurahira Uhoraho, ati Nkurahiye uguhoraho kw’Uhoraho hakagira ico uzoba kubg’ ibi.

¹¹Uwo mupfumukazi aramubaza, at’ Ugomba ko nkuzūrira nde? Na we ati Nzūrira Samweli.

¹²Uwo mupfumukazi abonye Samweli, atura ubuku n’ijwi rirenga, abaza Sauli, at’ Umbesheye iki? Erega ni wewe Sauli!

¹³Umwami aramwishura, ati Hūmura! Mbarira ico ubonye. Nya mupfumukazi aramwishura, ati Mbonye igisa n’imana kidūga kiva i kuzimu.

¹⁴Sauli aramubaza, ati Gisa gite? Na we ati Hariko haradūga umutāma, kandi yambaye igikwemu. Maze Sauli aca amenya kw ari Samweli, akubita inkoro hasi, aramwūnamira.

¹⁵Nuko Samweli abaza Sauli, ati N’iki gitumye uza kunkoma, ukanzūra? Sauli aramwishura, ati N’uko ndi mu magorwa, kukw Abafilisitiya baje kuntera, kand’ Imana ikaba yarantaye, ata co ikinyishura, ari mu bo ivugisha canke mu nzozi. Ni co kinteye kuguhamagara, ng’ummenyeshe ico nkwiye gukora.

¹⁶Samweli aramwishura, at’ Ubimbarije iki, k’ Uhoraho yakuretse, agahinduka umwansi wawe?

¹⁷Uhoraho yakugiriye nk’uko yari yarabivugiye muri jewe. Akunyaze ingoma, ayiha mugenzawe Dawidi;

¹⁸kuk’ utumviye Uhoraho, ntushitse uburake bgiwe bukaze ku Bamaleki; ni co kimuteye kukugenza artyo uyu musi.

¹⁹Mbere mwe n’Abisirayeli Uhoraho azobagabura mu maboko y’Abafilisitiya; kand’ ejo mwe n’abahungu bawe muzoba mur’ aho ndi; Uhoraho agira agabure ingabo z’ Abisirayeli mu maboko y’Abafilisitiya.

²⁰Buno Sauli yikubita hasi, ararambarara, kukw aranduwe umutima n’ivyo Samweli amubariye; kandi na kare yar’ asanzwe adafise intege, kuko yari yiriwe ubusa kand’ akaburāra.

²¹Maze nya mupfumukazi aza aho Sauli ari, abona ko yihebūye, aramubarira, ati Rāba jewe umuja wawe nakwumviye, mpeba amagara, nemera ivyo umbariye.

²²None rero ndakwinginze, nawe unyumvire, jewe umuja wawe, unyemerere ngire utwo nkuronderera, ufūngure, kugira ng’ usubiremw’ intege ubashe kugenda.

²³Aranka, at’ Eka singomba kurya. Arikw abantu biwe bo na nya mupfumukazi baramugōbēra, arabemerera, ava hasi, yicara ku buriri.

²⁴Kandi nya mupfumukazi yar’ afise imasa inuze mu ruhongore; aranyanyasa arayikerera, ahitana ifu, arayicumba ayironderamw’ umutsima utambiwe;

²⁵abihereza Sauli n’ abantu biwe, barafūngura. Maz’ iryo joro nyene barahaguruka, baragenda.