Read Bibliya Yera 1951 1 Samweli 30 Bible Online

1 Samweli 30 - Bibliya Yera 1951 bible

1 Samweli 30

¹Nuko Dawidi n’ingabo ziwe bashika i Sikulagi ku musi ugira gatatu, basanga Abamaleki bateye igihugu c’i bumanuko n’i Sikulagi, basanga i Sikulagi bāhanesheje, bāhaturiye,

²bānyaze abagore n’abāri mur’ ico gisagara bose, abato n’abakuru; ntibāri bagize uwo bica, atar’ ukubajana ar’ inyagano, bakīgīra.

³Nuko Dawidi n’abantu biwe bashitse kur’ ico gisagara, ni kwo gusanga bāgituriye, kand’ abagore n’abana babo b’abahungu n’abakobga bājanywe ar’ inyagano.

⁴Maze Dawidi n’abantu bari kumwe na we baraturikisha, bararira, gushitsa aho batakibasha kurira.

⁵Kand’ abagore ba Dawidi bompi, Ahinowamu w’i Yezireli, na Abigayili yahora ari muka Nabali w’i Karumeli, na bo bāri bājanywe ar’ inyagano.

⁶Maze Dawidi agira intuntu nyinshi, kukw abantu bāvuga nk’abagomba kumutera amabuye; bose bāri n’akabonge kubg’ abana babo b’abahungu n’abakobga; ariko Dawidi arīremēsha, yisunze Uhoraho Imana yiwe.

⁷Maze Dawidi abarira Abiyatari umuherezi mwene Ahimeleki, ati N’unzanire efodi hano. Nuko Abiyatari azanira Dawidi efodi.

⁸Dawidi araheza asiguza Uhoraho, ati Mbega ni nakurikira ico gitero nzogihamvya? Aramwishura, ati N’ubakurikire, kuk’ utazobura kubahamvya, ukabāka vyose.

⁹Nuko Dawidi aragenda, bo na za ngabo zari kumwe na we ukw ar’ amajana atandatu; bashitse ku mugezi Besori, abāri basigaye inyuma bagumaho.

¹⁰Ariko Dawidi araramiriza, bo n’abantu amajana ane; abandi amajana abiri barasigara, kuko bari barushe, bananirwa kujabuka umugezi Besori.

¹¹Hanyuma baseruka ku Munyegiputa mu gahinga, bamuzanira Dawidi; bamutamika agatsima, bamuramiza n’utuzi,

¹²bamuha n’ikimanyu c’irobe ribumbabumbge mu nsukoni, n’udusoko tubiri tw’inzabibu zumye; ariye, aca arahēmbūka, kuko yar’ amaze imisi itatu n’amajoro atatu ata co arya, ata co anywa.

¹³Dawidi aramubaza, at’ Ur’ umuntu wa nde? Kand’ ur’ uwa hehe? Na we aramwishura, ati Nd’ umuhungu wo muri Egiputa, umugurano w’ Umwamaleki; kandi hashize imisi itatu databuja antaye, kuko nari ndwaye.

¹⁴Twari twateye i bumanuko mu Bakeriti, dutera n’i Buyuda, n’i bumanuko mu bga Kalebu, duturira n’i Sikulagi.

¹⁵Dawidi aramubaza, ati None wonjana ukanshikana mur’ ico gitero? Aramwishura, ati Ndahira Imana k’utazonyica, canke k’utazontanga mu maboko ya databuja, mpeze ndakujane ah’ ico gitero kiri.

¹⁶Nukw amumanukanye, basanga bagandagaje, bariko bararya, binywera, batārīka, bahimbawe n’inyagano nyinshi banyaze mu gihugu c’Abafilisitiya no mu c’Abayuda.

¹⁷Dawidi aca ashirakw arabica, uhereye bugihwībīra ugashitsa ku mugoroba wa bukeye; ntiharokoka n’umwe, atar’ abahungu b’imisore amajana ane, bāsimbiye ku ngamiya bagahunga.

¹⁸Dawidi yigarukanira ivyo Abamaleki bari banyaze vyose, arokora n’abagore biwe bompi.

¹⁹Ntihāgira ico babura, ari gito ari kinini, ar’ abana b’abahungu cank’ ab’ abakobga, ar’ ico mu nyagano canke mu vyari vyasahuwe; Dawidi abigarukana vyose.

²⁰Dawidi anyaga intama n’inka zose, bazishorera imbere y’izabo, baravuga, bat’ Uyu ni wo munyago wa Dawidi.

²¹Maze Dawidi ashika kuri ba bantu amajana abiri bāri barushe, bananirwa kumukurikira, bakabasiga ku mugezi Besori; baza gusanganira Dawidi n’abari kumwe na we. Dawidi abashikiriye arabaramutsa.

²²Maz’ abantu bose b’abanyakibi b’abagesera mu bāri bājanye na Dawidi baravuga, bati Ntitubaha ku vyari vyaranyazwe twigarukaniye, kuko batājanye natwe; shit’ umuntu wese turamuha umugore wiwe n’abana, babajane bagende.

²³Ariko Dawidi arababarira, ati Bagenzi banje, ntimwogenza murtyo ivyo Uhoraho yaduhaye, n’ukuntu yatuzigamye, akagabura mu maboko yacu ico gitero cari caduteye.

²⁴Har’ uwokwemera iyo nama yanyu? Uwagiye mu ntambara n’uwasigaye ku bintu bararinganiza umutigiri: baragabangana banganye.

²⁵Nuk’ uhereye uwo musi abigira icagezwe n’ibgirizwa mu Bisirayeli na bugingo n’ ubu.

²⁶Maze Dawidi ashitse i Sikulagi, arungikira abakunzi biwe b’ abashingantahe b’i Buyuda ku minyago, ati Ngivyo ivyo mbagabiye bivuye ku minyago y’abansi b’ Uhoraho.

²⁷Abirungikira ab’i Beteli, n’ab’i Ramoti h’i bumanuko, n’ab’i Yatira;

²⁸n’ab’i Aroweri, n’ab’i Sifumoti, n’ab’i Eshitemowa;

²⁹n’ab’i Rakala, n’abo mu bisagara vya ba Yerameyeli, n’abo mu bisagara vy’Abanyakeni;

³⁰n’ab’i Horuma, n’ab’i Korashani, n’ab’i Ataki;

³¹n’ ab’i Heburoni, n’ab’ ahandi hose aho Dawidi n’abantu biwe bāhora bayerērera.