Read Iloko Genesis 1 Bible Online

Genesis 1 - Iloko bible

Genesis 1

¹Idi punganay, pinarsua ti Dios ti lubong.

²Gusoguso ken awan urnos ti amin ken nakumotan iti napuskol a sipnget ti nadawel a taaw a nanglapunos iti amin, ket ti Espiritu ti Dios aggargaraw iti rabaw ti danum.

³Imbilin ti Dios, “Mapaadda ti lawag.” Ket napaadda ti lawag.

⁴Naragsakan ti Dios iti nakitana. Pinaglasinna ti lawag ken ti sipnget.

⁵Pinanagananna ti lawag iti “Aldaw,” ket ti sipnget, “Rabii.” Limmabas ti rabii, ket dimteng ti bigat. Daytoy ti umuna nga aldaw.

⁶Kalpasanna, imbilin ti Dios, “Mapaadda ti tangatang a mamagsina iti danum tapno agyan iti dua a lugar.” Ket kasta ti napasamak. Nangaramid ti Dios iti tangatang a namaglasin iti danum nga adda iti baba ti tangatang ken ti adda iti ngatoenna.

⁸Pinanagananna ti tangatang iti “Langit.” Limmabas ti rabii, ket dimteng ti bigat. Daytoy ti maikadua nga aldaw.

⁹Kalpasanna, imbilin ti Dios, “Mapagtitipon iti maymaysa a disso ti danum nga adda iti baba ti tangatang tapno agparang ti daga.” Ket naaramid a kasta.

¹⁰Pinanagananna ti namaga a disso iti “Daga.” Pinanagananna ti naurnong a danum iti “Taaw.” Naragsakan ti Dios iti nakitana.

¹¹Imbilin ti Dios, “Tumaud iti daga dagiti amin a kita ti mula a mangted iti bukel ken dagiti amin a kita ti kayo nga agbunga.” Ket naaramid a kasta.

¹²Nagtubo ngarud dagiti amin a kita ti mula a mangted iti bukel ken dagiti amin a kita ti kayo nga agbunga. Naragsakan ti Dios iti nakitana.

¹³Limmabas ti rabii, ket dimteng ti bigat. Daytoy ti maikatlo nga aldaw.

¹⁴Imbilin ti Dios, “Agparang dagiti silaw iti tangatang tapno paglasinenda ti aldaw ken ti rabii, ken tapno ipakitada ti pangrugian dagiti tiempo, aldaw ken tawen.

¹⁵Agpaaydanto a silaw iti tangatang tapno lawaganda ti daga.” Ket naaramid a kasta.

¹⁶Inaramid ti Dios dagiti dua a dadakkel a silaw: ti init nga agraniag iti aldaw ken ti bulan nga agraniag iti rabii. Inaramidna pay dagiti bituen.

¹⁷Inkabilna dagiti silaw iti tangatang a manglawag iti daga,

¹⁸mangraniag iti aldaw ken rabii, ken mamaglasin iti lawag ken sipnget. Naragsakan ti Dios iti nakitana.

¹⁹Limmabas ti rabii, ket dimteng ti bigat. Daytoy ti maikapat nga aldaw.

²⁰Imbilin ti Dios, “Maaddaan dagiti dandanum iti adu a kita ti sibibiag a parsua, kasta met a maaddaan ti tangatang kadagiti tumatayab.”

²¹Pinarsua ti Dios dagiti dadakkel a parsua iti taaw, ken amin a kita ti parsua iti danum ken amin a kita ti tumatayab. Naragsakan ti Dios idi makitana dagiti inaramidna.

²²Binendisionanna amin ida, ket imbagana kadagiti parsua nga agnaed iti danum nga umaduda, ket punnoenda ti taaw. Binilinna met dagiti tumatayab nga umaduda.

²³Limmabas ti rabii, ket dimteng ti bigat. Daytoy ti maikalima nga aldaw.

²⁴Imbilin ti Dios, “Maaddaan ti daga iti amin a kita ti ayup: naamo ken naatap, dadakkel ken babassit.” Ket naaramid a kasta.

²⁵Inaramid amin ida ti Dios. Naragsakan ti Dios iti nakitana.

²⁶Kalpasanna, kinuna ti Dios, “Ita, aramidentayo ti tao. Umaspingdanto kadatayo, ket kalanglangatayto ida. Iturayandanto dagiti ikan, dagiti tumatayab, ken amin nga animal a naamo ken naatap, dadakkel ken babassit.”

²⁷Iti kasta, pinarsua ti Dios ti tao a kalanglangana. Pinarsuana ida a lalaki ken babai.

²⁸Binendisionanna ida a kunana, “Aganakkayo iti adu tapno agnaedto dagiti kaputotanyo iti amin a paset ti daga ket iturayandanto ti daga. Iturayanyo dagiti ikan, dagiti tumatayab, ken amin nga atap nga animal.

²⁹Itedko a taraonyo dagiti amin a kita ti bukel ken amin a bunga ti kayo.

³⁰Ngem itedko kadagiti amin nga atap nga animal ken amin a tumatayab dagiti ruruot ken mulmula nga adda bulongna a kas taraonda.” Ket naaramid a kasta.

³¹Kinita ti Dios dagiti amin nga inaramidna, ket napalalo ti ragsakna. Limmabas ti rabii, ket dimteng ti bigat. Daytoy ti maikanem nga aldaw.