Read Iloko Genesis 11 Bible Online

Genesis 11 - Iloko bible

Genesis 11

¹Idi un-unana, maymaysa ti lengguahe dagiti tattao iti entero a lubong ket agpapada dagiti sao nga usarenda.

²Iti panagturongda iti daya, dimtengda iti maysa a daga iti Siniar ket nagnaedda sadiay.

³Nagtutulagda nga agaramid iti adu a ladrilio ket lutuenda a naimbag tapno tumangken. Ket naaddaanda kadagiti ladrilio a pagbangonda ken alketran a pannakasementoda.

⁴Kinunada, “Ita, mangbangontayo iti siudad nga addaan iti torre a dumanon idiay langit tapno agbalintayo a nalatak ket ditay masinasina iti entero a daga.”

⁵Bimmaba ni Yahweh tapno kitaenna ti siudad ken ti torre a binangon dagitoy a tattao.

⁶Kinunana, “Sangsangkamaysa dagitoy a tattao ket maymaysa ti pagsasaoda. Pangrugian la daytoy ti panggepda nga aramiden. Kabaelandanton nga aramiden ti aniaman a kaykayatda.

⁷Bumabatayo ket kirokiroentayo ti pagsasaoda tapno dida agkikinnaawatan.”

⁸Iti kasta, inwaras ida ni Yahweh iti entero a daga ket naisardeng ti pannakabangon ti siudad.

⁹Napanaganan ti siudad iti Babel agsipud ta kinirokiro ni Yahweh ti pagsasao dagiti amin a tattao ket manipud sadiay, impanna ida iti nadumaduma a paset ti daga.

¹⁰Dagitoy dagiti kaputotan ni Sem. Dua a tawen kalpasan ti layus, naparaburan iti anak a lalaki a napanaganan iti Arpaksad. Agtawen idin ni Sem iti sangagasut.

¹¹Nagbiag pay ni Sem iti 500 a tawen ket naaddaan pay iti dadduma nga annak.

¹²Idi agtawen ni Arpaksad iti 35, naparaburan iti anak a lalaki, ni Sela.

¹³Nagbiag pay ni Arpaksad iti 403 a tawen ket naaddaan iti dadduma nga annak.

¹⁴Idi agtawen ni Sela iti tallopulo, naparaburan iti anak a lalaki, ni Eber.

¹⁵Nagbiag pay ni Sela iti 403 a tawen ket naaddaan pay iti dadduma nga annak.

¹⁶Idi agtawen ni Eber iti 34, naparaburan iti anak a lalaki, ni Peleg.

¹⁷Nagbiag pay ni Eber iti 430 a tawen ket naaddaan pay iti dadduma nga annak.

¹⁸Idi agtawen ni Peleg iti tallopulo, naparaburan iti anak a lalaki, ni Reu.

¹⁹Nagbiag pay ni Peleg iti 209 a tawen ket naaddaan pay iti dadduma nga annak.

²⁰Idi agtawen ni Reu iti 32, naparaburan iti anak a lalaki, ni Serug.

²¹Nagbiag pay ni Reu iti 207 a tawen ket naaddaan pay iti dadduma nga annak.

²²Idi agtawen ni Serug iti tallopulo, naparaburan iti anak a lalaki, ni Nahor.

²³Nagbiag pay ni Serug iti 200 a tawen ket naaddaan pay iti dadduma nga annak.

²⁴Idi agtawen ni Nahor iti 29, naparaburan iti anak a lalaki, ni Tera.

²⁵Nagbiag pay ni Nahor iti 119 a tawen ket naaddaan pay iti dadduma nga annak.

²⁶Idi agtawen ni Tera iti pitopulo, naparaburan kadagiti lallaki nga annak, da Abram, Nahor ken Haran.

²⁷Dagitoy dagiti kaputotan ni Tera: Ni Tera ti ama da Abram, Nahor ken Haran. Ni Haran ti ama ni Lot.

²⁸Natay ni Haran iti ili a nakayanakanna, idiay Ur iti Caldea. Sibibiag pay idi ni amana.

²⁹Inasawa ni Abram ni Sarai. Inasawa ni Nahor ni Milca nga anak ni Haran nga ama ni Isca.

³⁰Lupes idi ni Sarai.

³¹Pimmanaw ni Tera idiay Ur. Kinakuyogna ni Abram nga anakna, ni Lot nga apokona nga anak ni Haran agraman ti manugangna nga asawa ni Abram. Agturongda idiay Canaan, ngem idi dumanonda idiay Haran, nagsardengda ket sadiay ti nagnaedanda.

³²Sadiay ti nakatayan ni Tera idi agtawen iti 205.