Read Iloko Genesis 12 Bible Online

Genesis 12 - Iloko bible

Genesis 12

¹Kinuna ni Yahweh ken ni Abram, “Panawam ti pagiliam, dagiti kabagiam ken amam ket inka iti daga nga ipakitakto kenka.

²Paraburankanto iti adu nga annak ken appoko ket agbalindanto a dakkel a pagilian. Bendisionankanto ket agdinamagto ti naganmo tapno mausar ti naganmo a pagbendision.

³“Bendisionakto dagiti mangbendision kenka, ngem ilunodkonto dagiti mangilunod kenka. Dawatento dagiti amin a nasion ditoy daga a bendisionak ida a kas iti panangbendisionko kenka.”

⁴Tinungpal ni Abram ti bilin ni Yahweh ket pimmanaw idiay Haran idi agtawen iti pitopulo ket lima.

⁵Inkuyogna ni Sarai nga asawana ken ni Lot a kaanakanna. Intugotna ti amin a sanikua a naurnongna ken amin a nagbalin a tagabuna idiay Haran ket nagluasda a napan iti daga ti Canaan. Idi dumtengda idiay Canaan,

⁶sinursor ni Abram ti daga agingga a dimmanon idiay Sikem nga ayan ti kayo a lugo ti More. (Kadagidi a tiempo, agnanaed pay laeng dagiti Cananeo iti dayta a daga.)

⁷Nagparang ni Yahweh ken ni Abram ket kinunana kenkuana, “Daytoy ti daga nga itedko kadagiti kaputotam.” Nangbangon sadiay ni Abram iti altar nga agpaay ken ni Yahweh a nagparang kenkuana.

⁸Kalpasan dayta, intuloyna ti panagdaliasatna agingga iti katurturodan iti daya ti siudad ti Betel. Nagkampo iti nagbaetan ti Betel iti laud ken Ai iti daya. Nangbangon met sadiay iti altar ket nagdaydayaw ken ni Yahweh.

⁹Kalpasanna, nagalis-alis iti pagnaedan iti panagturongna iti akin-abagatan a paset ti Canaan.

¹⁰Ngem rimsua ti nakaro a panagbisin iti dayta a daga, isut' gapuna a nagpa-abagatan ni Abram agingga a dimteng idiay Egipto tapno agnaed sadiay iti apagbiit.

¹¹Idi dandani bumallasiw iti beddeng ti Egipto, kinunana iti asawana, “Nalibnoska, Sarai.

¹²Inton makitadaka dagiti Egipcio, ipapandanto nga asawaka, ket patayendakto ngem saandakanto nga an-anoen.

¹³Ibagam kadakuada nga agkabsatta. Gapu kenka, saandakto a patayen ket nasayaatto ti pannakilangenda kaniak.”

¹⁴Idi addadan idiay Egipto, nakita dagiti Egipcio a pudno a napintas ti asawa ni Abram.

¹⁵Adda dagiti ofisiales ti palasio a nakakita kenkuana ket imbagada iti Faraon ti kinapintasna. Ket naipan ni Sarai iti palasio.

¹⁶Gapu ken ni Sarai, nasayaat ti pannakilangen ti ari ken ni Abram. Inikkanna ni Abram kadagiti arban ti karnero ken kalding, baka, asno, tagabu ken kamelio.

¹⁷Ngem gapu iti naaramid, nagpungtot ni Yahweh, ket nagsagaba ti ari ken dagiti tattao iti palasio. Nakaro a sakit ti indissuor kadakuada ni Yahweh.

¹⁸Pinaayaban ti ari ni Abram ket sinaludsodna, “Ania ti inaramidmo kaniak? Apay a dimo imbaga nga asawam?

¹⁹Apay nga imbagam a kabsatmo ket impalubosmo nga alaek a kas asawak? Adtoy ti asawam; alaem ket pumanawkayon!”

²⁰Nagbilin ti ari ket napapanaw ni Abraham idiay Egipto a kaduana ti asawana agraman amin a sanikuana.