Read Iloko Genesis 13 Bible Online

Genesis 13 - Iloko bible

Genesis 13

¹Manipud idiay Egipto, nagdaliasat ni Abram nga agpa-amianan ket napan iti akin-abagatan a paset ti Canaan. Intugotna ti asawana ken dagiti amin a sanikuana agraman ni Lot.

²Baknang idin ni Abram. Adu ti karnero, kalding ken bakana agraman pirak ken balitok.

³Manipud sadiay, nagturong idiay Betel ket nadumaduma ti nagsardenganna iti dalan. Dimteng iti nagbaetan ti Betel ken Ai a sigud a nagkampoanna.

⁴Napan iti lugar a nangbangonanna idi iti altar ket nagdaydayaw ken ni Yahweh.

⁵Adu met ti karnero, kalding ken baka ni Lot. Adda bukodna a familia ken adu nga adipen.

⁶Saan a makaanay ti daga a pagpastoranda ta adu unay ti animalda.

⁷Daytoy ti gapuna a masansan nga agririri dagiti agay-aywan kadagiti animalda. (Agnanaed pay laeng idi dagiti Cananeo ken Perezeo iti dayta a deppaar.)

⁸Kinuna ni Abram ken ni Lot, “Saanta koma nga agrirriri, kasta met dagiti pastorta, agsipud ta agkabagianta.

⁹Nasaysayaat no agsinata. Piliem ti aniaman a paset ti daga a kayatmo a pagyanan ket innak met iti sabali.”

¹⁰Inwaras ni Lot ti panagkitana ket naimatanganna ti entero a Tanap ti Jordan agingga idiay Zoar. Adu ti danumna a kas iti Minuyongan ni Yahweh wenno ti daga ti Egipto. (Saan pay idi a nadadael dagiti siudad ti Sodoma ken Gomorra.)

¹¹Pinili ngarud ni Lot ti entero a Tanap ti Jordan. Nagsinada ken ni Abram, ket nagturong iti daya.

¹²Nagtalinaed ni Abram iti daga ti Canaan. Nagnaed met ni Lot kadagiti siudad ti tanap, iti asideg ti Sodoma.

¹³Managdakdakes dagiti tattao ti Sodoma ket nakaro ti panagbasolda ken ni Yahweh.

¹⁴Kalpasan ti panagsina da Abram ken ni Lot, kinuna ni Yahweh ken ni Abram, “Iwarasmo ti panagkitam iti aglawlawmo.

¹⁵Itedko kenka ken kadagiti kaputotam ti amin a daga a makitam ket kukuayonto iti agnanayon.

¹⁶Paraburankanto iti adu a kaputotan. Awanto ti makabilang iti kaaduda ket nalaklakanto a bilangen ti tapok iti daga.

¹⁷Ita, inka sursoren ti entero a daga gapu ta itedko amin kenka daytoy.”

¹⁸Inyalis ngarud ni Abram ti kampona ket nagnaed iti asideg dagiti kayo ti lugo ti Mamre idiay Hebron. Nangbangon sadiay iti altar nga agpaay ken ni Yahweh.