Read Iloko Genesis 14 Bible Online

Genesis 14 - Iloko bible

Genesis 14

¹Uppat nga ari—ni Amrafel nga ari ti Siniar, ni Arioc nga ari ti Elasar, ni Kedorlaomer nga ari ti Elam ken ni Tidal nga ari ti Goiim,

²ti napan nanggubat iti lima nga ari: Bera nga ari ti Sodoma, Birsa nga ari ti Gomorra, Sinab nga ari ti Adma, Semeber nga ari ti Zeboiim ken ti ari ti Bela (wenno Soar).

³Nagkaykaysa dagitoy lima nga ari ket pinagtitiponda dagiti buyotda iti Tanap ti Siddim nga isu ita ti Natay a Baybay.

⁴Sangapulo ket dua a tawen nga inturayan ida ni Kedorlaomer ngem iti maika-13 a tawen, immalsada a maibusor kenkuana.

⁵Iti maika-14 a tawen, dimteng ni Kedorlaomer ken dagiti kakaduana agraman dagiti armadada ket pinarmekda dagiti Refaim idiay Asterot Karnaim, dagiti Zuzim idiay Ham, dagiti Emim idiay Tanap ti Kiriataim

⁶ken dagiti Horeo iti kabambantayan ti Edom—sinunsonda ida agingga idiay Elparan iti pungto ti let-ang.

⁷Kalpasanna, nagsublida ket dimtengda idiay Kades (maaw-awagan idi iti Enmispat). Sinakupda ti amin a daga dagiti Amalekita ket pinarmekda dagiti Amorreo nga agnanaed idiay Hazazon Tamar.

⁸Inummong dagiti ari ti Sodoma, Gomorra, Adma, Zeboiim ken Bela dagiti armadada iti Tanap ti Siddim tapno gubatenda

⁹dagiti ari ti Elam, Goiim, Siniar ken Elasar. Lima nga ari kontra uppat nga ari.

¹⁰Nasaknapan ti tanap kadagiti abut a naikkan iti alketran ket idi itarayan dagiti ari ti Sodoma ken Gomorra ti paggugubatan, natnagda kadagiti palab-og. Nakataray dagiti tallo nga ari ket nagkamangda kadagiti kabambantayan.

¹¹Innala dagiti uppat nga ari ti amin nga adda idiay Sodoma ken Gomorra agraman dagiti taraon sada pimmanaw.

¹²Innalada met ni Lot ken ti amin a sanikuana. Agnanaed idi ti kaanakan ni Abram idiay Sodoma.

¹³Ngem adda lalaki a nakalibas ket impadamagna daytoy ken ni Abram a Hebreo nga agnanaed idi iti asideg dagiti lugo a kayo a kukua ni Mamre nga Amorreo. Kadua ni Abram ni Mamre agraman da Escol ken Aner a kakabsatna.

¹⁴Apaman a naammoan ni Abram a natiliw ti kaanakanna, inummongna dagiti amin a mannakigubat iti kampona nga agdagup iti 318 ket sinunsonda dagiti uppat nga ari agingga idiay Dan.

¹⁵Sadiay, biningayna dagiti tattaona iti dua a bunggoy, dinarupda ti kabusor iti rabii ket pinarmekda ida. Kinamatkamatda ida agingga idiay Hobah iti amianan ti Damasco.

¹⁶Naalada amin a nasamsam. Inyawidna met ni Lot a kaanakanna ken dagiti amin a sanikuana, agraman dagiti babbai ken dagiti dadduma a balud.

¹⁷Idi agsubli ni Abram kalpasan ti panangparmekna ken ni Kedorlaomer ken dagiti dadduma nga ari, sinabat ti ari ti Sodoma idiay Tanap ti Save (a maaw-awagan met iti Tanap ti Ari).

¹⁸Nangyeg met ni Melkisedec nga ari ti Salem ken padi pay ti Kangatoan a Dios iti tinapay ken arak ken ni Abram.

¹⁹Indawat ni Melkisedec a mabendisionan ni Abram ket kinunana, “Sapay koma ta bendisionan ti Kangatoan a Dios ni Abram.

²⁰Madaydayaw koma ti Kangatoan a Dios a nangted iti panagballigim kadagiti kabusormo.” Ket inted ni Abram kenkuana ti apagkapullo ti amin a sinamsamna.

²¹Kinuna ti ari ti Sodoma ken Abram, “Alaem dagiti sinamsammo ngem isublim dagiti amin a tattaok.”

²²Insungbat ni Abram, “Isapatak iti Apo a Kangatoan a Dios, ti namarsua iti langit ken daga,

²³nga awan ti alaek a kukuam, uray la koma sinulid wenno kordon ti sapatos tapno dimonto kuna a sika ti nangpabaknang kaniak.

²⁴Awan ti alaek no di la dagiti inaramat dagiti tattao. Ngem ipalubosmo koma nga alaen dagiti kakaduak, da Aner, Escol ken Mamre, ti bingayda.”