Read Iloko Genesis 16 Bible Online

Genesis 16 - Iloko bible

Genesis 16

¹Saan nga aganak ni Sarai nga asawa ni Abram. Ngem adda tagabuna a babai a taga-Egipto nga agnagan iti Agar.

²Isu a kinunana ken ni Abram, “Yantangay ta dinak pinaraburan ti Apo iti anak, apay a dimo kaiddaen ti tagabuk bareng no aganak iti agpaay kaniak?” Immanamong ni Abram,

³ket naited ni Agar kenkuana a kas asawa nga agserbi kenkuana. (Sangapulo a tawen idin ni Abram iti daga ti Canaan.)

⁴Kinaidda ni Abram ni Agar ket nagsikog. Idi madlaw ni Agar a masikogen, timmangsit ket inumsina pay ni Sarai.

⁵Kinuna ni Sarai ken ni Abram, “Sika ti nakaigapuan ti pananglais kaniak ni Agar. Siak a mismo ti nangted kenka ngem um-umsiennakon manipud ammona a masikogen. Ikeddeng koma ti Apo no siasino kadata ti mapabasol.”

⁶Kinuna ni Abram, “Tagabum daytoy a babai. Aramidem kenkuana ti aniaman a kayatmo.” Naranggas ni Sarai ken ni Agar agingga a nagtalaw ti tagabu.

⁷Iti asideg ti maysa nga ubbog iti let-ang, iti dalan nga agturong idiay Sur, adda anghel ni Yahweh a nangsabat kenkuana.

⁸Kinunana, “Agar, tagabu ni Sarai, sadino ti naggapuam ken sadino ti papanam?” “Tinalawak ti apok,” insungbat ni Agar.

⁹Kinuna ti anghel ni Yahweh, “Agsublika ket agserbika kenkuana.”

¹⁰Ket innayonna, “Ikkankanto iti adu nga annak ken appoko ket dinto mabilang ti kaaduda.

¹¹Aganakkanto iti lalaki ket panaganamto iti Ismael agsipud ta impangag ti Apo ti asugmo.

¹²Ngem agbiagto ti anakmo a kas atap nga asno. Kabusornanto ti tunggal maysa ket agbalinto met a kabusor ti amin. Saanto nga agnaed iti sidong dagiti kabagianna.”

¹³Kinuna ni Agar iti bagina, “Pudno kadi a nakitak ti Dios ket sibibiagak pay laeng kalpasan ti pannakakitak kenkuana?” Ngarud, pinanagananna ni Yahweh a nakisarita kenkuana iti “Ti Dios a Makakita.”

¹⁴Daytoy ti gapuna a maaw-awagan ti bubon nga adda iti nagbaetan ti Kades ken Bered iti Beer-lahai-roi.

¹⁵Lalaki ti impasngay ni Agar ket pinanaganan ni Abram iti Ismael.

¹⁶Walopulo ket innem ti tawen idin ni Abram.