Read Iloko Genesis 17 Bible Online

Genesis 17 - Iloko bible

Genesis 17

¹Idi agtawen ni Abram iti 99, nagparang ni Yahweh kenkuana. Kinunana, “Siak ti Dios a Mannakabalin-amin. Agtulnogka kaniak ket aramidem a kanayon ti naimbag.

²Makitulagak kenka ket ikkankanto iti adu a kaputotam.”

³Idi nangngegna daytoy, nagpakleb ni Abram iti daga. Kinuna ti Dios,

⁴“Daytoy ti katulagak: Ikarik nga agbalinkanto a kapuonan ti adu a nasion.

⁵Saanen nga Abram ti naganmo no di ket Abraham agsipud ta pagbalinenka a kapuonan ti adu a nasion.

⁶Ikkankanto iti adu a kaputotan. Agbalinto nga ari ti sumagmamano kadakuada. Adunto unay ti kaputotam. Ket agbalindanto nga adu a nasion.

⁷“Agnanayon daytoy a tulag ket tungpalekto ti karik kenka ken kadagiti sumarsaruno a kaputotam. Siakto ti Diosmo ken ti Dios dagiti kaputotam.

⁸Itedkonto kenka ken kadagiti kaputotam daytoy a daga a pagnanaedam ita a kas ganggannaet. Kukuanto dagiti kaputotam iti agnanayon ti entero a daga ti Canaan, ket siakto ti Diosda.”

⁹Kinuna ti Dios ken ni Abraham, “Masapul a tungpalem met ti nagtulaganta, sika ken dagiti sumarsaruno a kaputotam.

¹⁰Masapul nga umanamongkayo, sika ken dagiti kaputotam, a makugit ti amin a lalaki kadakayo.

¹¹Manipud ita, masapul a kugitem ti ubing a lalaki nga adda walo nga aldawnan, agraman dagiti tagabu a nayanak iti balaymo ken dagiti ginatangmo kadagiti ganggannaet. Daytoy ti pakakitaan nga adda nagtulaganta.

¹³Masapul a makugit ti tunggal maysa ket daytoy a marka ti bagi ti mangipakita nga agnanayon ti nagtulaganta.

¹⁴Saanto a maibilang a taok ti siasinoman a lalaki a saan a nakugit agsipud ta dina tinungpal ti nagtulaganta.”

¹⁵Kinuna ti Dios, “Saanen a Sarai ti pangawagmo iti asawam. Manipud ita, Sara ti nagannan.

¹⁶Bendisionakto ket paraburankanto iti anak a lalaki nga ipasngayna. Bendisionakto ket agbalinto nga ina dagiti nasion. Agbalinto nga ari ti sumagmamano kadagiti kaputotanna.”

¹⁷Nagpakleb ni Abraham iti daga ngem nagkatawa idi malagipna ti kinalakayna. Kinunana iti bagina, “Makaputot pay ngata ti lalaki a 100 ti tawenna? Aganak pay ngata ni Sara idinto a 90 ti tawennan?”

¹⁸Kinunana iti Dios, “Apay a dimo ipalubos a ni laengen Ismael ti agtawid kadagiti sanikuak?”

¹⁹Ngem kinuna ti Dios, “Saan. Aganakto ni Sara iti lalaki ket panaganamto iti Isaac. Tungpalekto ti pagtulaganmi ken ni Isaac ken kadagiti kaputotanna. Agnanayon daytoy a tulag.

²⁰Nangngegko ti dawatmo maipapan ken ni Ismael, isu a bendisionakto ket ikkak iti adu a kaputotan. Isunto ti ama ti sangapulo ket dua a pangulo ket pagbalinekto a naindaklan a nasion dagiti kaputotanna.

²¹Ngem tungpalekto ti tulagko ken ni Isaac nga anakmo nga ipasngayto ni Sara iti kastoy a tiempo inton umay a tawen.”

²²Pimmanaw ti Dios kalpasan ti panagsaona ken ni Abraham.

²³Iti dayta met la nga aldaw, tinungpal ni Abraham ti imbaga ti Dios. Kinugitna ni Ismael nga anakna ken amin a lallaki iti balayna, tagabu man a nayanak sadiay wenno dagiti ginatangna.

²⁴Siam a pulo ket siam ti tawen ni Abraham idi makugit

²⁵ket sangapulo ket tallo met ni Ismael.

²⁶Nakugitda iti dayta nga aldaw,

²⁷agraman dagiti amin a tagabu ni Abraham.