Read Iloko Genesis 18 Bible Online

Genesis 18 - Iloko bible

Genesis 18

¹Nagparang ni Yahweh ken ni Abraham idiay Mamre, iti ayan dagiti lugo a kayo. Agtugtugaw idi ni Abraham iti ruangan ti toldana iti kapudot ti aldaw

²ket idi tumangad, nakitana ti tallo a lallaki a nakatakder. Timmaray a nangsabat kadakuada apaman a nakitana ida. Nagpakleb iti daga

³sana kinuna, “Appo, madadaanak nga agserbi kadakayo. Pangngaasiyo ta dumagaskayo iti taengko.

⁴Yalaankayo iti danum a pangbuggoyo kadagiti sakayo. Mabalinyo ti aginana ditoy sirok dagiti kayo.

⁵Yalaankayo met iti taraon tapno adda pamigsayo a mangituloy iti panagbiaheyo. Mapadayawanak iti yaayyo iti taengko ket palubosandak kadi a mangsangaili kadakayo.” “Agyamankami,” insungbatda. “Padayawanmi ti awismo.”

⁶Dinagdagus ni Abraham ti simrek iti toldana ket kinunana iti asawana, “Sara, mangalaka iti sangasupot iti kasayaatan nga arina ket manglutoka iti tinapay. Darasem!”

⁷Kalpasanna, nagtaray a napan iti ayan dagiti arban ket nangpili iti nalukmeg nga urbon ti baka. Intedna iti maysa kadagiti adipenna a nagdardaras a napan nangisagana.

⁸Nangala ni Abraham iti keso, gatas, ken ti karne a pinalutona ket impasangona kadagiti lallaki. Iti sirok ti kayo ti nangserbianna kadakuada. Bayat ti pannanganda,

⁹sinaludsodda, “Yan ni Sara nga asawam?” “Adda iti uneg ti tolda,” insungbat ni Abraham.

¹⁰Kinuna ti maysa kadakuada, “Siam a bulan manipud ita, agsubliakto ket addanton anak ni Sara nga asawam.” Adda ni Sara iti ruangan ti tolda, iti likudan ti agsasao ket dumdumngeg iti saritaan.

¹¹Lakay ken baket unayen dagiti agassawa ket saan payen nga agregla ni Sara.

¹²Iti kasta, nagkatawa ni Sara iti unegna ket kinunana, “Ita ta baket ken kimbetakon, agganasak pay ngata a makikaidda? Maysa pay, lakay unayen ti asawak.”

¹³Sinaludsod ni Yahweh ken ni Abraham, “Apay a nagkatawa ni Sara a kunana, ‘Pudno kadi a mabalinko ti aganak idinto ta baketakon?’

¹⁴Adda aya narigat nga aramiden ni Yahweh? Kas kinunak, siam a bulan manipud ita, agsubliakto ket aganakto ni Sara iti lalaki.”

¹⁵Gapu ta mabuteng ni Sara, naglibak ket imbagana a saan a nagkatawa. “Dika aglibak ta pudno a nagkatawaka,” kinuna ti sangaili.

¹⁶Pimmanaw dagiti lallaki tapno mapanda iti lugar a pakatannawaganda iti Sodoma. Kimmuyog kadakuada ni Abraham tapno itulodna ida iti dalanda.

¹⁷Kinuna ni Yahweh, “Diak ilimed ken ni Abraham ti panggepko nga aramiden.

¹⁸Agbalinto dagiti kaputotanna a naindaklan ken nabileg a nasion. Agdawatto dagiti amin a nasion ti lubong a bendisionak ida a kas iti panangbendisionko kenkuana.

¹⁹Pinilik ni Abraham tapno ibilinna kadagiti lallaki nga annakna ken dagiti kaputotanna a tungpalendak ket agaramidda iti naimbag ken nalinteg. No aramidenda daytoy, aramidek dagiti amin nga inkarik nga agpaay kenkuana.”

²⁰Kinuna ni Yahweh ken ni Abraham, “Nakabutbuteng ti naipulong nga ar-aramiden ti Sodoma ken Gomorra ket nakaro unay ti basolda.

²¹Masapul a bumabaak tapno ammoek no pudno daytoy.”

²²Pimmanaw dagiti lallaki ket nagturongda idiay Sodoma ngem nagbati ni Yahweh iti ayan ni Abraham.

²³Inasitgan ni Abraham ni Yahweh ket sinaludsodna, “Pudno kadi nga iramanmo a pukawen dagiti awanan basol kadagiti nakabasol?

²⁴No adda limapulo a tattao nga awanan basol iti siudad, pukawem pay la kadi ti entero a siudad? Saanmo aya a pakawanen ti siudad tapno maispal dagiti limapulo?

²⁵Awan duadua a dimo iraman a patayen dagiti awanan basol kadagiti adda basolna. Saan a mabalin nga aramidem ti kasta. No kasta ti aramidem, mairaman a madusa dagiti awan basolna kadagiti adda basolna. Masapul a nainkalintegan ti panangukom ti Hues iti entero a lubong.”

²⁶Insungbat ni Yahweh, “No adda masarakak a 50 a tattao iti Sodoma nga awanan basol, ispalek ti entero a siudad gapu kadakuada.”

²⁷Nagsao manen ni Abraham. “Dispensarem koma, Apo, ti turedko nga agsao kenka,” kinunana. “Taoak laeng ket awan ti kalintegak nga agsao.

²⁸No 45 laeng a tattao ti awan basolna a saan ketdi a 50, dadaelem kadi ti entero a siudad gapu ta lima ti kurangna a limapulo?” Insungbat ni Yahweh, “Diak pukawen ti siudad no adda masarakak a 45 a tattao nga awanan basol.”

²⁹Nagsao manen ni Abraham, “No 40 laeng?” “Diak pukawen gapu kadagiti uppat a pulo,” insungbatna.

³⁰Kinuna ni Abraham, “Pangngaasim, Apo, ta dika agunget ngem masapul nga agsaludsodak manen. No 30 laeng?” Kinunana, “Diak pukawen no adda masarakak a tallopulo.”

³¹Kinuna ni Abraham, “Pangngaasim ta pakawanem ti kinaturedko nga agsaludsod pay, Apo. No 20 laeng ti masarakan?” “Diak pukawen ti siudad no adda 20 a masarakak,” insungbat ni Yahweh.

³²Kinuna ni Abraham, “Pangngaasim, Apo, ta dika agpungtot. Daytoyen ti maudi a saludsodko. No sangapulo laeng ti masarakan?” Kinunana, “Diak dadaelen ti siudad no adda sangapulo.”

³³Pimmanaw ni Yahweh kalpasan ti panagsaona ket nagawid metten ni Abraham.