Read Iloko Genesis 19 Bible Online

Genesis 19 - Iloko bible

Genesis 19

¹Sumipnget idi dumteng dagiti dua nga angheles idiay Sodoma. Agtugtugaw idi ni Lot iti ruangan ti siudad ket apaman a nakitana ida, timmakder a napan simmabat. Nagruknoy iti sangoda

²ket kinunana, “Appo, madadaanak nga agserbi kadakayo. Pangngaasiyo ta agdaguskayo iti balayko. Mabalinyo a buggoan dagiti sakayo ket umiankayo. Inton bigat, mabalinyo ti agriing a masapa ket agtuloykayo iti papananyo.” Ngem insungbatda, “Agyamankami, ngem ditoy laengen plasa ti pangpalabasanmi iti rabii.”

³Saan a namingga ni Lot agingga a naawisna ida ket nakikuyogda kenkuana a napan iti balayna. Binilin ni Lot dagiti adipenna nga aglutoda iti tinapay ken mangisaganada iti naimas a taraon dagiti sangaili. Nangan dagiti sangaili.

⁴Idi maturog dagiti bisita, linawlaw dagiti taga-Sodoma ti balay. Adda sadiay dagiti amin a lallaki iti siudad, agtutubo ken lallakay.

⁵Pinukkawanda ni Lot ket sinaludsodda, “Sadino ti ayan dagiti lallaki a nagdagus iti balaymo ita a rabii? Iruarmo ida!” Kayat a kaiddaen ida dagiti lallaki ti Sodoma.

⁶Rimmuar ni Lot ket sinerraanna ti ridaw.

⁷Kinunana kadakuada, “Gagayyem, pangngaasiyo ta dikay agaramid iti dakes.

⁸Adda dua a babbalasang nga annakko. Iruarko ida ket aramidenyo ti kaykayatyo kadakuada. Ngem diyo an-anoen dagitoy a lallaki. Sangailida ket rumbeng a salaknibak ida.”

⁹Ngem kinunada, “Saanka a bumiang, sika a ganggannaet. Siasinoka koma a mangisuro iti aramidenmi? Aglisika iti pagnaanmi amangan no dakdakes ti aramidenmi kenka ngem ti aramidenmi kadakuada.” Induronda ni Lot ket immasidegda tapno rakrakenda ti ridaw.

¹⁰Ngem ginuyod dagiti sangaili ti ridaw apaman a naguyodda ni Lot iti uneg ti balay sada rinepkan ti ridaw.

¹¹Kalpasanna, pinagbulsekda amin a lallaki iti ruar tapno saanda a masarakan ti ridaw.

¹²Kinuna dagiti dua a lallaki ken ni Lot, “No adda pay sabali a kaduam ditoy—annak, mamanugang, wenno siasinoman a kabagiam nga agnaed iti siudad—ipanawmo ida

¹³gapu ta dadaelenmi daytoy a lugar. Nangngeg ti Apo dagiti nadadagsen a pammabasol kadagiti taga-Sodoma ket imbaonnakami ditoy tapno dadaelenmi ti siudad.”

¹⁴Napan ni Lot kadagiti mangasawanto kadagiti babbai nga annakna ket kinunana, “Darasenyo ti pumanaw! Dadaelen ti Apo daytoy a lugar.” Ngem impagarupda nga agang-angaw ni Lot.

¹⁵Iti parbangon, inapura dagiti angheles ni Lot. Kinunada, “Darasem! Alaem ti asawam ken dagiti dua a babbai nga annakmo ket pumanawkayo tapno dikay mairaman iti pannakadadael ti siudad.”

¹⁶Nagsarimadeng pay laeng ni Lot, ngem gapu iti asi ni Yahweh kenkuana, ginuyod dagiti lallaki, ti asawana ken dagiti dua nga annakna a rimmuar iti siudad.

¹⁷Kinuna ti maysa kadagiti angheles, “Agtaraykayon! Isalakanyo ti biagyo. Dikay tumaltalliaw wenno agsardeng iti tanap. Agkamangkayo iti katurturodan tapno dikay matay.”

¹⁸Ngem insungbat ni Lot, “Pangngaasiyo, appo, ta saan a sadiay ti pangibaonanyo kadakami.

¹⁹Dakkel unay ti asi nga impaayyo kaniak iti panangisalakanyo iti biagko. Ngem adayo unay dagiti turod. Makamakamnak ti didigra ket matayak sakbay a makadanonak sadiay.

²⁰Makitam dayta bassit nga ili? Mabalinko ti agkamang sadiay ta as-asideg. Sadiayen ti papanak—makitam met a bassit laeng a lugar—ket awanto ti pakaan-anoak.”

²¹Insungbatna, “Ala wen, sadiayen ti papananyo ket diak dadaelen dayta nga ili.

²²Darasem ngarud! Sakonto la rugian ti aramidek inton makadanonka sadiay.” Gapu ta inawagan ni Lot a bassit ti ili, napanaganan dayta iti Soar.

²³Sumingsingising ti init idi makadanon ni Lot idiay Soar.

²⁴Pagammoan, pinagtudo ni Yahweh iti apuy ken asufre kadagiti siudad ti Sodoma ken Gomorra.

²⁵Dimmapu dagiti siudad ken ti entero a tanap agraman dagiti amin nga umili sadiay ken amin a mulmula.

²⁶Ngem timmalliaw ti asawa ni Lot isut' gapuna a nagbalin nga adigi nga asin.

²⁷Iti agsapa iti sumuno nga aldaw, dinardaras ni Abraham ti napan iti lugar a nagtakderanna idi iti imatang ni Yahweh.

²⁸Manipud sadiay, tinannawaganna ti Sodoma ken Gomorra ken ti entero a tanap. Nakitana ti agpangpangato a napuskol nga asuk a kasla naggapu iti dakkel nga urno.

²⁹Idi dadaelen ti Dios dagiti siudad iti tanap a pagnaedan ni Lot, linaglagipna ni Abraham ket impalubosna a makalibas ni Lot.

³⁰Gapu ta mabuteng nga agnaed ni Lot idiay Soar, simmang-at kadagiti katurturodan a kaduana dagiti dua nga annakna a babbai ket nagtaengda iti maysa a rukib.

³¹Naminsan, agsarsarita dagiti agkabsat. Kinuna ti inauna, “Lumakayen ni tatang ket awanen ti lalaki iti entero a lubong a pakiasawaanta tapno aganakta.

³²Bartekenta ketdi ni tatang tapno mabalinta a kaiddaen ket aganakta.”

³³Iti dayta a rabii, inikkanda ti amada iti arak ket kinaidda ti inauna. Kasta unay ti bartek ti lakay, isu a dina ammo a kinaiddana ti inauna nga anakna.

³⁴Iti sumuno nga aldaw, kinuna ti inauna iti kabsatna, “Nakikaiddaak ken ni tatang idi rabii. Bartekenta manen ita a rabii, ket sika ti makikaidda tapno agpadata a maaddaan iti anak kenkuana.”

³⁵Binartekda ngarud ti amada, ket napan kinaidda ti inaudi. Kasta unay manen ti bartek ni Lot, ket dina ammo a ti buridekna ti kinaiddana.

³⁶Gapu iti daytoy, agpada a nagsikog dagiti annak ni Lot.

³⁷Naganak ti inauna iti lalaki, ket pinanagananna iti Moab. Isu ti nagtaudan dagiti Moabita iti agdama.

³⁸Naganak met ti inaudi iti lalaki, ket pinanagananna iti Benammi. Isu ti nagtaudan dagiti agdama nga Ammonita.