Read Iloko Genesis 2 Bible Online

Genesis 2 - Iloko bible

Genesis 2

¹Ket kasta a naaramid dagiti langit ken ti daga ken amin a linaonda.

²Iti maikapito nga aldaw, nalpas ti Dios ti amin nga aramidna ket naginana.

³Binendisionanna ti maikapito nga aldaw, ket inlasinna a naisangsangayan gapu ta iti dayta nga aldaw, nalpasna ti trabahona ket naginana kalpasan ti panagparsuana.

⁴Kastoy ti pannakaparsua ti sangalubongan. Idi parsuaen ni Yahweh a Dios ti lubong,

⁵awan pay ti mula iti daga ken awan ti bukel a nagrusing agsipud ta awan pay tudo ken awan pay dagiti mannalon.

⁶Ngem adda danum nga aggapu iti ubbog ket siboganna ti daga.

⁷Nangala ni Yahweh a Dios iti daga sa nangbukel iti tao. Insang-awna ti anges ti biag iti agong daytoy ket naaddaan iti biag.

⁸Nangaramid ni Yahweh a Dios iti maysa a minuyongan idiay Eden, iti Daya. Sadiay ti nangikabilanna iti pinarsuana a tao.

⁹Pinagtubona ti amin a kita ti agkakapintas a kayo nga agbunga iti nasayaat. Iti tengnga ti minuyongan, adda ti kayo ti biag ken ti kayo ti pannakaammo iti naimbag ken iti dakes.

¹⁰Adda karayan nga agayus iti Eden a mangpasayak iti minuyongan. Iti panagayusna iti ruar ti Eden, nagsanga iti uppat a paset.

¹¹Pison ti nagan ti umuna a karayan ket agayus iti likmut ti pagilian ti Havila.

¹²Ditoy ti pakasarakan iti puro a balitok agraman bangbanglo a manmano a masarakan, ken agkakapateg a bato.

¹³Gihon ti nagan ti maikadua ket agayus iti likmut ti pagilian ti Cus.

¹⁴Tigris ti maikatlo ket agayus iti dayaen ti Asiria. Eufrates ti maikapat a sanga ti karayan.

¹⁵Impan ni Yahweh a Dios ti tao iti Minuyongan ti Eden tapno talonen ken aywananna.

¹⁶Imbagana iti lalaki, “Mabalinmo ti mangan iti bunga ti uray ania a kayo iti Minuyongan

¹⁷malaksid ti bunga ti kayo ti pannakaammo iti naimbag ken dakes. Dimo kanen ti bunga dayta a kayo. No manganka, matayka iti isu met la nga aldaw a pannanganmo.”

¹⁸Kinuna ni Yahweh a Dios, “Saan a nasayaat nga agmaymaysa ti lalaki. Yaramidak iti maitutop a kadua ken katulonganna.”

¹⁹Nangala iti daga ket inaramidna dagiti amin nga animal ken amin a tumatayab. Impanna ida iti lalaki ket binay-anna nga isu ti mangted iti naganda. No ania ti awagna kadakuada, isu met ti nagbalin a naganda.

²⁰Pinanaganan ngarud ti lalaki dagiti amin a tumatayab ken dagiti amin nga animal. Ngem awan kadagitoy ti maitutop a kaduana ken katulonganna.

²¹Kalpasanna, pinaturog ni Yahweh a Dios ti lalaki. Bayat ti nargaan a pannaturogna, nangala iti maysa kadagiti paragpagna sana tinapalan iti lasag ti nangikkatanna.

²²Inaramidna a babai ti paragpag ket impanna iti lalaki.

²³Kinuna ti lalaki, “Adda met laengen kas kaniak— Tulang a naggapu iti tulangko, ken lasag a naala iti lasagko. ‘Babai’ ti naganna ta lalaki ti nagtaudanna.”

²⁴Daytoy ti gapuna a panawan ti lalaki dagiti nagannak kenkuana tapno agtiponda iti asawana ket agbalinda a maymaysa.

²⁵Agpada a lamolamo ti lalaki ken ti babai ngem awan kadakuada ti panagbain.