Read Iloko Genesis 20 Bible Online

Genesis 20 - Iloko bible

Genesis 20

¹Pimmanaw ni Abraham idiay Mamre ket napan iti Negeb. Nagnaed iti nagbaetan ti Kades ken Sur. Bayat ti panagnaedna idiay Gerar,

²no adda agsaludsod iti maipapan ken ni Sara, ibagana a kabsatna ti asawana. Pinaala ngarud ni Abimelec nga ari ti Gerar ni Sara.

³Iti maysa a rabii, nagparang ti Dios kenkuana iti maysa a tagtagainep, ket kinunana, “Matayka, agsipud ta siaasawa daytoy a babai nga innalam.”

⁴Saan pay idi a kinaidda ni Abimelec ni Sara. Iti kasta, kinunana, “O Apo, awan ti dakes nga inaramidko. Dadaelennak kadi agraman dagiti tattaok?

⁵Imbaga ni Abraham a kabsatna ti babai. Kinuna met ti babai a kabsatna ni Abraham. Nadalus ti konsensiak a nangaramid iti daytoy, isu nga awan ti basolko.”

⁶Insungbat kenkuana ti Dios iti tagtagainep, “Wen, ammok a nadalus ti konsensiam, isu a diak impalubos a sagidem ti babai tapno saanka a makabasol.

⁷Ngem ita, isublim ti babai iti asawana. Profeta ti asawana ket ikararagannakanto tapno dika matay. Ngem no dimo isubli, ballaaganka a saan la a sika ti matay no di ket mairaman pay amin a tattaom.”

⁸Iti agsapa iti sumuno nga aldaw, inayaban ni Abimelec dagiti amin nga ofisialesna ket idi imbagana kadakuada ti amin a napasamak, kasta unay ti butengda.

⁹Kalpasanna, pinaayaban ni Abimelec ni Abraham ket sinaludsodna, “Ania daytoy nga inaramidmo kadakami? Ania aya ti dakes nga inaramidko kenka ta inyegmo daytoy a kinadakes kaniak ken iti pagariak? Saan a rumbeng nga aramiden ti siasinoman ti inaramidmo kaniak.

¹⁰Apay nga inaramidmo daytoy?”

¹¹Simmungbat ni Abraham, “Impagarupko ngamin nga awan ditoy ti agbuteng iti Dios ket nagamakak amangan no patayendak tapno maalada ti asawak.

¹²Kinapudnona, agkabsatkami iti ama. Nupay kasta, inasawak.

¹³Idi ibaonnak ti Dios a mapan iti sabali a daga, kinunak iti asawak, ‘Adda naimbag a maaramidmo kaniak no, iti sadinoman a papananta, ibagam nga agkabsatta.’”

¹⁴Insubli ngarud ni Abimelec ni Sara ken ni Abraham. Inikkanna pay ni Abraham kadagiti karnero, baka ken tagabu.

¹⁵Kinunana ken ni Abraham, “Adtoy ti entero a dagak; agyanka iti sadinoman a kayatmo a pagnaedan.”

¹⁶Kinunana met ken ni Sara, “Inikkak ni kabsatmo iti sangaribu a bagi ti pirak kas pammaneknek a saan a natulawan ti dayawmo; maammoanto ti tunggal maysa nga awan ti dakes nga inaramidmo.”

¹⁷Gapu iti naaramid ken ni Sara nga asawa ni Abraham, dinusa ni Yahweh dagiti amin a babbai iti sangkabalayan ni Abimelec: saan nga impalubos ni Yahweh nga aganak dagiti babbai. Iti kasta, inkararagan ni Abraham ni Abimelec. Immimbag ti ari ket manipud idin, nagsikog ti asawa ni Abimelec ken dagiti babbai a tagabuna.