Read Iloko Genesis 21 Bible Online

Genesis 21 - Iloko bible

Genesis 21

¹Kas inkari ni Yahweh, binendisionanna ni Sara.

²Nagsikog ni Sara ket naganak iti lalaki, uray no lakay unayen ni Abraham nga asawana. Naipasngay ti maladaga iti tiempo nga intuding ti Dios a pannakayanakna.

³Isaac ti impanagan ni Abraham iti anakna.

⁴Idi walo nga aldawnan, kinugit ni Abraham, kas imbilin ti Dios kenkuana.

⁵Agtawen ni Abraham iti sangagasut idi mayanak ni Isaac.

⁶Kinuna ni Sara, “Inikkannak ti Dios iti panggapuak nga agragsak ken agkatawa. Makipagkatawanto met amin dagiti makangngeg iti daytoy.”

⁷Kinunana pay, “Siasino ti makaibaga idi ken ni Abraham nga agpasusonto ni Sara? Ngem naganakak met laeng nupay lakayen ni asawak.”

⁸Dimmakkel ti ubing. Iti aldaw a pannakapusotna, nangipaay ni Abraham iti dakkel a padaya.

⁹Iti maysa nga aldaw, madama nga agay-ayam ni Ismael nga anak ni Agar a taga-Egipto ken ni Isaac nga anak ni Sara.

¹⁰Nakita ida ni Sara ket kinunana ken Abraham, “Pagtalawem daytoy a tagabu ken ti anakna. Diak kayat nga adda binglay ti anak daytoy a babai kadagiti sanikuam a tawiden ti anakko.”

¹¹Kasta unay ti pannakaburibor ni Abraham gapu iti daytoy agsipud ta anakna met ni Ismael.

¹²Kinuna ti Dios ken ni Abraham, “Dimo pagdanagan ti ubing ken ni Agar a tagabum. Aramidem ti ibaga ni Sara agsipud ta ninto Isaac ti pagtaudan dagiti kaputotam nga inkarik.

¹³Maaddaanto met iti adu nga annak ti putotmo ken ni Agar ket agbalindanto a maysa a nasion, ta anakmo met ni Ismael.”

¹⁴Kabigatanna, nasapa a pinarubbuatan ni Abraham dagiti agina. Pinabalonanna ni Agar iti kanen ken inumen a danum a naikarga iti supot a lalat. Impasallabayna ti ubing iti inana. Pimmanaw ni Agar ket nagalla-alla iti let-ang ti Beerseba.

¹⁵Idi naibusen ti balonda a danum, pinanawanna ti ubing iti sirok ti maysa a bassit a kayo.

¹⁶Nagtugaw iti agarup sangagasut a metro manipud iti nangibatianna iti ubing. Kinunana iti bagina, “Diak maitured a kitaen a matay ti anakko.” Bayat ti panagtugawna, nagsangit ti ubing.

¹⁷Nangngeg ti Dios ti sangit ti ubing. Manipud langit, kinuna ti anghel ti Dios ken ni Agar, “Ania ti pakariribukam, Agar? Dika agbuteng. Nangngeg ti Dios ti sangit ti ubing.

¹⁸Tumakderka, inka ubbaen ti ubing ket ay-aywem. Manipud iti kaputotanna, pataudekto ti maysa a dakkel a nasion.”

¹⁹Kalpasanna, impakita ti Dios ken ni Agar ti maysa a bubon. Napan kinargaan ni Agar ti supot a lalat iti danum ket pinainumna ti ubing.

²⁰Inaywanan ti Dios ti ubing. Dimmakkel iti let-ang ti Paran ket nagbalin a nalaing a mangnganup.

²¹Imbirokan ni inana iti asawaenna a taga-Egipto.

²²Iti dayta a tiempo, napan ni Abimelec agraman ni Ficol a pangulo ti armadana iti yan ni Abraham. Kinunana, “Iti amin nga aramidmo, kanayon nga adda kenka ti bendision ti Dios.

²³Dawatek ngarud nga isapatam iti imatangna a dinakto allilawen, dagiti annakko wenno dagiti kaputotak. Napudnoak kenka, isu nga ikarim a napudnoka met kaniak ken iti daytoy a pagilian a pagnaedam.”

²⁴“Isapatak,” kinuna ni Abraham.

²⁵Iti naminsan, napan nagreklamo ni Abraham ken ni Abimelec maipapan iti bubon nga inagaw dagiti adipen ti ari.

²⁶“Diak ammo no siasino ti akin-aramid iti daytoy,” kinuna ni Abimelec. “Dimo imbagbaga kaniak ket ita la a maammoak.”

²⁷Adda nagnumoan dagiti dua ket inikkan ni Abraham ni Abimelec iti sumagmamano a karnero ken baka.

²⁸Nangilasin ni Abraham iti pito nga urbon kadagiti karnerona.

²⁹“Apay nga inlasinmo dagitoy?” sinaludsod ni Abimelec.

³⁰Kinuna ni Abraham, “Agpaay kenka dagitoy urbon ti karnero, kas pammaneknek iti panangbigbigmo a siak ti nangkali iti bubon.”

³¹Napanaganan dayta a lugar iti Beerseba, ta sadiay ti nagsapataanda a dua.

³²Kalpasan ti pannakaaramid ti katulagan, nagsubli da Abimelec ken Ficol idiay Filistia.

³³Nangimula ni Abraham iti kayo idiay Beerseba, ket nagdaydayaw ken ni Yahweh, ti agnanayon a Dios.

³⁴Nabayag a nagnaed ni Abraham iti daga dagiti Filisteo.