Read Iloko Genesis 24 Bible Online

Genesis 24 - Iloko bible

Genesis 24

¹Lakay unayen ni Abraham. Binendisionan ni Yahweh ti amin nga inaramidna.

²Kinuna ni Abraham iti kalakayan nga adipen nga agay-aywan iti amin a sanikuana, “Ikabilmo ta imam iti baet dagiti luppok ket agsapataka.

³Kayatko nga isapatam iti Apo a Dios ti langit ken daga, a dimonto ipaasawa ti anakko iti taga-ditoy Canaan a pagnanaedak.

⁴Masapul nga inka iti daga a nakayanakak, ket pumilika kadagiti kakabagiak ti asawaen ni Isaac.”

⁵Sinaludsod ti adipen, “Kas pangarigan madi ti babai a sumurot kaniak ditoy, ibaonkonto kadi ti anakmo iti daga a naggapuam?”

⁶“Saan! Saanmo nga ibaon ti anakko sadiay,” insungbat ni Abraham.

⁷“Innalanak ti Apo, isu a Dios ti langit, iti balay ni amak ken iti daga dagiti kakabagiak, ket insapatana nga itednanto daytoy a daga kadagiti kaputotak. Ibaonnanto ti anghelna nga umun-una ngem sika a mapan sadiay tapno tulongannaka a mangpili iti asawaen ti anakko.

⁸No madi a sumurot kenka ti babai, mawayawayaankanton iti daytoy a sapata. Ngem uray ania ti mapasamak, dimo ipan ti anakko sadiay.”

⁹Inkabil ngarud ti adipen ti imana iti baet dagiti luppo ni Abraham, ket insapatana nga aramiden ti kiniddaw ti apona.

¹⁰Inrubbuat ti adipen ti sangapulo a kamelio ti apona ket napan iti siudad a pagnanaedan ni Nahor iti akin-amianan a Mesopotamia.

¹¹Idi dumteng sadiay, pinaginanana dagiti kamelio iti asideg ti maysa a bubon nga adda iti ruar ti siudad. Sumipnget idi ket tiempo a panagsangpet dagiti babbai nga agsakdo.

¹²Nagkararag ti adipen. Kinunana, “O Apo a Dios ni Abraham nga apok, pagballigiennak kadi ket tungpalem ti karim iti apok.

¹³Addaak ditoy asideg ti bubon a pagsakdoan dagiti babbalasang iti siudad.

¹⁴No kunak iti maysa kadakuada, ‘Pangngaasim ta ibabam ta karambam ta uminumak,’ ket kunananto, ‘Uminumka, ken painumek met dagiti kameliom,’ isu koman ti babai a pinilim nga asawaen ni Isaac nga adipenmo. Daytoyto ti pakaammoak a tinungpalmo ti karim iti apok.”

¹⁵Di pay nalpas ti panagkararagna idi dumteng ni Rebecca a nakaawit iti karamba iti abagana. Isu ti anak ni Betuel nga anak da Milca ken Nahor a kabsat ni Abraham.

¹⁶Nalibnos a balasang ni Rebecca ken birhen pay laeng. Simmalog a napan iti bubon ket pinunnona ti karambana sa simmang-at.

¹⁷Timmaray ti adipen a napan kenkuana ket kinunana, “Di la mabalin ti makiinum?”

¹⁸“Mabalin, apo,” insungbat ni Rebecca ket dinagdagusna nga imbaba ti karambana sana pinainum ti adipen.

¹⁹Idi nakainumen, kinuna ti babai, “Painumek met dagiti kameliom agingga a mapnekda.”

²⁰Dinardarasna nga imbukbok ti natda a danum iti paginuman dagiti animal sa nagtaray manen a napan simmakdo. Kasta ti inaramidna agingga a napainumna amin dagiti kamelio.

²¹Naulimek ti adipen a nangbuybuya ken ni Rebecca tapno maammoanna no pinagballigi met la ni Yahweh iti nakaibaonanna.

²²Idi napainumen ni Rebecca dagiti kamelio, nangiruar ti adipen iti nangina nga aritos a balitok ken dua a dadakkel a pulseras a balitok ket intedna iti balasang.

²³“Siasino kadi ti tatangmo?” sinaludsod ti adipen. “Awan la ti mabalinmi a pagyanan kadagiti kakaduak iti balayyo ita a rabii?”

²⁴“Siak ti anak ni Betuel nga anak da Nahor ken Milca,” insungbat ti babai.

²⁵“Adu ti garami ken makan idiay balaymi. Adda pagyananyo.”

²⁶Nagruknoy ti adipen ket nagdaydayaw ken ni Yahweh.

²⁷Kinunana, “Madaydayaw ti Apo a Dios ni Abraham nga apok. Tinungpalna ti karina. Inturongnak iti balay dagiti kabagian ni apok.”

²⁸Nagtaray a nagawid ti balasang iti balay ni inana, ket imbagana ti amin a napasamak.

²⁹Adda lalaki a kabsat ni Rebecca nga agnagan iti Laban. Nangngegna ti impadamag ni Rebecca ken nakitana ti aritos ken dagiti pulseras kadagiti ima ni kabsatna. Nagtaray met ni Laban a napan iti ayan ti adipen ni Abraham nga agtaktakder iti abay dagiti kameliona iti asideg ti bubon.

³⁰

³¹“Dumanonka idiay balay, apo,” kinuna ni Laban, “sika a binendisionan ti Apo. Apay nga addaka ditoy ruar? Adda kuarto a naisagana kenka idiay balay. Adda met pagyanan dagiti kameliom.”

³²Simrek ngarud ti adipen iti balay. Inalsaan ni Laban dagiti kamelio sana inikkan ida iti garami ken ruot. Kalpasanna, inikkanna ti adipen ni Abraham ken dagiti kaduana iti danum a pangbuggoda kadagiti sakada.

³³Idi naisaganan ti kanenda, kinuna ti lalaki, “Sakbay a manganak, ibagak pay nga umuna ti gagarak.” “Ibagam latta,” kinuna ni Laban.

³⁴“Siak ti adipen ni Abraham,” inrugi ti adipen.

³⁵“Nawadwad ti bendision nga inted ti Apo iti apok. Bimmaknang ta pinaraburanna iti adu a karnero, kalding ken baka, pirak ken balitok, adipen a lallaki ken babbai, kamelio ken asno.

³⁶Baketen idi aganak ni Sara nga asawa ti apok. Lalaki ti impasngayna ket inted ti apok ti amin a kukuana kenkuana.

³⁷Pinagsapatanak ti apok a tungpalek ti bilinna a diak mangpili iti asawaen ti anakna kadagiti babbai ti Canaan.

³⁸Innak kano kadagiti kailian ti amana, kadagiti kakabagianna, tapno sadiay ti pangalaak iti asawaen ti anakna.

³⁹Sinaludsodko iti apok no ania ti aramidek no madi ti babai a sumurot kaniak.

⁴⁰‘Ti Apo a kanayon a nagtulnogak,’ insungbatna, ‘ibaonnanto ti anghelna a kumuyog kenka ket pagballigiennakanto. Mangalakanto iti asawaen ti anakko kadagiti kailiak, iti familia ni tatangko.

⁴¹No tungpalem daytoy ket mapanka iti familiak, uray no madida, mawayawayaankanton. Awanton ti sungsungbatam kaniak.’

⁴²“Itay dumtengak iti ayan ti bubon, inkararagko, ‘Apo a Dios ni Abraham nga apok, pagballigiennak koma iti gagarak.

⁴³Addaak ditoy abay ti bubon. No adda balasang nga umay sumakdo, dawatek kenkuana a makiinumak iti karambana.

⁴⁴No painumennak ket sumakdo pay iti danum para kadagiti kameliok, sapay koma ta isu ti pinilim nga asawaen ti anak ti apok.’

⁴⁵Diak pay nalpas ti naulimek a panagkararagko itay dumteng ni Rebecca a nakaawit iti karamba. Simmalog a napan simmakdo iti bubon ket kinunak kenkuana, ‘Makiinumak man.’

⁴⁶Imbabana a dagus ti karambana ket kinunana, ‘Uminumka, ket yalaak met iti danum dagiti kameliom.’ Imminumak ngarud sana met pinainum dagiti kameliok.

⁴⁷Sinaludsodko no siasino ti amana ket imbagana a ni Betuel nga anak da Nahor ken Milca. Inkabilko ngarud ti aritos iti agongna, ken dagiti pulseras kadagiti takkiagna.

⁴⁸Nagruknoyak ket nagdaydayawak iti Apo, iti Dios ni Abraham a nangiturong kaniak iti daytoy a balay. Ket ditoy ti nakasarakak iti balasang a rumbeng nga asawaen ti anak ti apok.

⁴⁹Ita, pangngaasiyo ta ibagayo kaniak no kayatyo a tungpalen ti pagrebbenganyo iti apok. No saanyo a tungpalen, ibagayo koma tapno ammok ti aramidek.”

⁵⁰Simmungbat da Laban ken Betuel, “Yantangay ta nakem daytoy ti Apo, saan a dakami ti mapaturay.

⁵¹Adtoy ni Rebecca; alaem ket inkayon. Isu ti yasawam iti anak ti apom, kas imbilin ti Apo.”

⁵²Idi mangngeg ti adipen ni Abraham ti sinaoda, nagparintumeng iti daga ket nagdaydayaw ken ni Yahweh.

⁵³Kalpasanna, nangiruar kadagiti alahas a pirak ken balitok ken pagan-anay ket itedna ken ni Rebecca. Inikkanna met ti kabsat ken ina ni Rebecca kadagiti nangingina a sagut.

⁵⁴Iti kasta, nangan ken imminum ti adipen ken dagiti kaduana. Immianda sadiay. Idi bumangonda iti bigat, nagpakada ti adipen. “Agsubliakon ken ni apok,” kinunana.

⁵⁵Insungbat ti kabsat ken ti ina ni Rebecca, “Agbati pay laeng ni Rebecca. Umayto kalpasan ti makalawas wenno sangapulo nga aldaw.”

⁵⁶“Saandakami koma a taktaken,” kinuna ti adipen. “Pinagballiginak ti Apo iti gagarak. Masapul nga agsubliak iti apok.”

⁵⁷“No kasta ngarud, ayabantayo ni Rebecca ta isu ti mangeddeng,” insungbatda.

⁵⁸Inayabanda ngarud ni Rebecca. “Kayatmo kadi ti makikuyogen iti daytoy a tao?” sinaludsodda. “Wen,” insungbat ni Rebecca.

⁵⁹Pinalubosanda ni Rebecca a kumuyog iti adipen ni Abraham ken kadagiti kakaduana. Kimmuyog met ti adipen a nabayagen nga agyan kadakuada.

⁶⁰Binendisionanda ni Rebecca. Kinunada: “Kabsat, agbalinka koma nga ina ti riniwriw! Parmeken koma dagiti kaputotam ti siudad dagiti kabusorda!”

⁶¹Nagrubbuat ni Rebecca ken dagiti babbalasang a katulonganna. Simmakayda kadagiti kamelio ket nakikuyogda iti lalaki a pimmanaw.

⁶²Kabayatanna, napan ni Isaac iti let-ang ti Beer-lahai-roi. Agnaeden ni Isaac iti Negeb.

⁶³Iti maysa a malem, napan nagpasiar iti taltalon ket nakitana dagiti sumungsungad a kamelio.

⁶⁴Idi makita ni Rebecca ni Isaac, dimsaag iti kamelio a nagsakayanna,

⁶⁵ket sinaludsodna iti adipen ni Abraham, “Siasino daydiay a lalaki a mangsabat kadatayo?” “Isu ti apok,” insungbat ti adipen. Innala ni Rebecca ti dalungdongna ket inabbonganna ti rupana.

⁶⁶Sinarita ti adipen ken ni Isaac ti amin a napasamak.

⁶⁷Impan ni Isaac ni Rebecca iti tolda a nagnaedan ni Sara nga inana. Inasawana ni Rebecca. Inay-ayatna ti asawana ket isu ti nagbalin a liwliwanan kalpasan ti ipapatay ni inana.