Read Iloko Genesis 25 Bible Online

Genesis 25 - Iloko bible

Genesis 25

¹Nangasawa ni Abraham iti sabali a babai nga agnagan iti Ketura.

²Inyanakna da Zimran, Jocsan, Medan, Midian, Isbac ken Sua.

³Ni Jocsan ti tatang da Seba ken Dedan. Ni Dedan ti nagtaudan dagiti Assurim, dagiti Letusim ken dagiti Leummim.

⁴Dagiti lallaki nga annak ni Midian isuda Efa, Efer, Hanoc, Abida ken Eldaa. Nagtaud amin dagitoy ken ni Ketura.

⁵Impatawid ni Abraham ti amin a sanikuana ken ni Isaac.

⁶Ngem idi sibibiag pay, sinagutanna dagiti lallaki nga annakna kadagiti sabali nga assawana. Kalpasanna, imbaonna ida iti Daya tapno mayadayoda ken ni Isaac nga anakna.

⁷Natay ni Abraham a nalakayan unayen iti tawen nga 175.

⁹Intanem da Isaac ken Ismael nga annakna iti rukib ti Macpela, iti daya ti Mamre nga adda iti talon a kukua idi ni Efron nga anak ni Zohar a Heteo.

¹⁰Daytoy daydi talon a ginatang ni Abraham kadagiti Heteo. Naitanem sadiay ni Abraham ken ni Sara nga asawana.

¹¹Kalpasan ti ipapatay ni Abraham, binendisionan ti Dios ni Isaac nga anakna a nagnaed iti asideg ti Beer-lahai-roi.

¹²Adtoy ti listaan dagiti annak ni Ismael nga anak ni Abraham ken ni Agar a taga-Egipto a tagabu ni Sara,

¹³kas mayannurot iti panagsasarunoda a naipasngay: Nebayot, Kedar, Adbeel, Mibsam,

¹⁴Misma, Duma, Masa,

¹⁵Hadad, Tema, Jetur, Nafis ken Kedema.

¹⁶Isuda ti kapuonan dagiti sangapulo ket dua a tribu. Naipanagan kadakuada dagiti aw-away ken nagkamkampoanda.

¹⁷Agtawen ni Ismael iti 137 idi matay.

¹⁸Nagnaed dagiti kaputotanna iti daga nga adda iti nagbaetan ti Havila ken Sur, iti daya ti Egipto, iti dalan nga agpa-Asiria. Simminada iti pagnaedan kadagiti dadduma a kaputotan ni Abraham.

¹⁹Daytoy ti pakasaritaan ni Isaac nga anak ni Abraham.

²⁰Agtawen iti 40 idi asawaenna ni Rebecca nga anak ni Betuel nga Arameo a taga-Mesopotamia ken kabsat ni Laban.

²¹Gapu ta saan nga aganak ni Rebecca, indawat ni Isaac ken ni Yahweh nga aganak koma ti asawana. Impangag ni Yahweh ti kararag ni Isaac ket nagsikog ni Rebecca.

²²Singin ti sikogna, ket sakbay a naipasngayda, aggubgubaldan iti uneg ti tian. Kinuna ni Rebecca, “Apay a kastoy ti mapasamak kaniak?” Nakiuman ken ni Yahweh tapno maammoanna ti sungbat ti saludsodna.

²³Kinuna ni Yahweh kenkuana, “Dua a nasion ti adda iti tianmo. Ipasngaymonto ti dua a kapuonan. Dua a puli ti agbinnusor a tattao. Napigpigsanto ti maysa ngem ti kasinginna, ket agserbinto ti inauna iti adina.”

²⁴Dimteng ti panagpasngay ni Rebecca. Naganak iti singin a lallaki.

²⁵Lumabaga ti kolor ti inauna ken dutdotan ti entero a bagina. Napanaganan ngarud iti Esau.

²⁶Nayanak ti kasinginna a nakaiggem iti mukod ni Esau. Napanaganan ngarud iti Jacob. Agtawen ni Isaac iti 60 idi mayanak dagiti singin.

²⁷Dimmakkel dagiti agkabsat. Nagbalin a nalaing a mangnganup ni Esau, ket ayuyangna ti ruar ken bakir. Ngem natalna a tao ni Jacob, ket ad-adda nga iti balay ti ayanna.

²⁸Kaykayat ni Isaac ni Esau ta magustoanna ti agsida kadagiti maan-anupan ti anakna. Kaykayat met ni Rebecca ni Jacob.

²⁹Iti maysa nga aldaw, aglutluto ni Jacob iti sopas a bukbukel idi sumangpet ni Esau. Naggapu iti bakir a naganupanna, ket kasta unay ti bisinna.

³⁰Kinunana ken ni Jacob, “Mabisinak unay. Ikkannak man iti dayta nalabaga bukbukel a lutlutoem.” (Daytoy ti gapuna a napanaganan ni Esau iti Edom.)

³¹Simmungbat ni Jacob, “Ikkanka no la ket itedmo kaniak ti kalintegam a kas inauna nga anak.”

³²“Ala wen,” insungbat ni Esau. “Matayakon iti basin. Ania pay ti serbina kaniak ti kalintegak?”

³³“Isapatam pay nga umuna nga itedmo kaniak ti kalintegam,” kinuna ni Jacob. Nagsapata ni Esau ket intedna ti kalinteganna ken ni Jacob.

³⁴Inikkan ni Jacob ni Esau iti tinapay ken sopas a lutlutoenna. Nangan ken imminum ni Esau, ket idi nalpasen, timmakder sa pimmanaw. Kasta laeng ti panangipategna iti kalinteganna a kas inauna nga anak.