Read Iloko Genesis 26 Bible Online

Genesis 26 - Iloko bible

Genesis 26

¹Adda pay sabali a panagbisin a dimteng iti daga malaksid daydi immuna idi panawen ni Abraham. Nakadanon ni Isaac idiay Gerar a sakup ni Abimelec, nga ari dagiti Filisteo.

²Sakbay daytoy, nagparang ni Yahweh ken ni Isaac ket kinunana kenkuana, “Dika mapan idiay Egipto. Agyanka iti daga nga imbagak a pagyanam.

³Agnaedka ditoy ket addaakto kenka. Bendisionankanto. Itedkonto amin daytoy a daga kenka ken kadagiti kaputotam, kas inkarik ken ni tatangmo nga Abraham.

⁴Paraburankanto iti adu a kaputotan a kas iti kaadu dagiti bituen ket itedkonto kadakuada amin daytoy a daga. Dawatento dagiti amin a nasion ditoy lubong a bendisionak ida kas iti panangbendisionko kadagiti kaputotam.

⁵Bendisionanka gapu ken ni Abraham, ta nagtulnog kaniak ket tinungpalna amin a bilinko.”

⁶Nagnaed ngarud ni Isaac idiay Gerar.

⁷No damagen idi dagiti lallaki a taga-sadiay ti maipapan iti asawana, ibagana a kabsatna ni Rebecca. Mabuteng ngamin a mangibaga nga asawana amangan no patayenda ket alaenda ni Rebecca a nakapimpintas a babai.

⁸Nabayag a nagtaeng ni Isaac sadiay. Iti maysa nga aldaw, timman-aw ni Abimelec ket nakitana nga aglinlinnailo da Isaac ken Rebecca.

⁹Pinaayaban ni Abimelec ni Isaac ket kinunana, “Asawam met gayam! Apay nga imbagam a kabsatmo?” Insungbat ni Isaac, “Mabutengak amangan no mapapatayak no ibagak nga asawak.”

¹⁰“Kitaem ti inaramidmo,” kinuna ti ari. “No adda maysa kadagiti buyotko ti nanggaraw kenkuana, insarsaraknakami iti pagbasolan.”

¹¹Ket binallaagan ni Abimelec dagiti tattaona: “Mapapatay ti siasinoman a mangdangran kadagitoy nga agassawa.”

¹²Nagtalon ni Isaac iti dayta a daga. Iti dayta a tawen, nakaapit iti maminggasut a kaadu ti immulana, gapu ta binendisionan ni Yahweh.

¹³Rimmang-ay a rimmang-ay ti panagbiagna agingga a nagbalin a nakabakbaknang.

¹⁴Inapalan dagiti Filisteo ta adu ti tagabu ken arbanna a karnero ken baka.

¹⁵Iti kasta, ginaburan dagiti Filisteo dagiti amin a bubon a kinali dagiti adipen ni Abraham a tatangna idi sibibiag pay.

¹⁶Kinuna ni Abimelec ken ni Isaac, “Panawam ti pagilianmi. Nagbalinkan a nabilbileg ngem dakami.”

¹⁷Pimmanaw ngarud ni Isaac. Nagkampo iti Tanap ti Gerar ket ditoy ti nagnaedanna iti nabayag bassit a tiempo.

¹⁸Pinakalina manen dagiti bubon a ginaburan dagiti Filisteo kalpasan ti ipapatay ni Abraham. Pinanagananna dagiti bubon iti kas iti impanagan idi ni tatangna a nangkali kadagitoy idi panawenna.

¹⁹Idi agkalkali dagiti adipen ni Isaac iti tanap, nakasarakda iti ubbog ti danum.

²⁰Nagsusuppiat dagiti agpaspastor a taga-Gerar ken dagiti tattao ni Isaac. Imbaga ngamin dagiti taga-sadiay a kukuada ti ubbog. Ket pinanaganan ni Isaac ti bubon iti Esek.

²¹Nagkali dagiti adipen ni Isaac iti sabali a bubon. Gapu ta rimsua manen ti riri, pinanaganan ni Isaac iti Sitnah.

²²Pimmanaw sadiay ket nagkali iti sabali a bubon. Gapu ta awan ti riri a timmaud, pinanagananna iti Rehobot. Kinunana, “Ita, inikkannatayo ti Apo iti wayawaya nga agnaed iti daga. Rumang-aytayo ditoy.”

²³Pimmanaw ni Isaac ket napan idiay Beerseba.

²⁴Iti dayta a rabii, nagparang ni Yahweh kenkuana ket kinunana, “Siak ti Dios ni Abraham a tatangmo. Dika agbuteng; addaak kenka. Bendisionanka ket paraburanka iti adu a kaputotan gapu iti karik ken ni adipenko nga Abraham.”

²⁵Nangbangon ni Isaac iti altar ket nagdaydayaw ken ni Yahweh. Sadiay ti nagkampoanna ket nagkali dagiti adipenna iti sabali a bubon.

²⁶Dimteng ni Abimelec a kaduana ni Ahuzzat a mamalbalakad kenkuana, ken ni Ficol a pangulo ti armadana. Naggapuda idiay Gerar ket makisaoda ken ni Isaac.

²⁷Kinunana, “Apay nga immaykayo idinto ta kagurguradak idi ket pinagtalawdak iti iliyo?”

²⁸Insungbatda, “Ammomi nga adda ti Dios kenka ket napanunotmi nga adda koma pagnunumoantayo. Kayatmi nga ikarim

²⁹a dinakamto dangran a kas iti dimi panangdangran kenka. Naimbagkami idi kenka ket saandaka nga inan-ano idi pumanawka. Ita, nalawag a binendisionannaka ti Apo.”

³⁰Insaganaan ida ni Isaac iti maysa a padaya ket nagkakapangan ken nagiinumda.

³¹Iti agsapa iti sumuno a bigat, nagsisinnapatada a tungpalen ti tunggal maysa ti karina. Kalpasanna, pinarubbuatan ida ni Isaac ket manipud idi agsisinada, nagbalindan nga aggagayyem.

³²Iti dayta nga aldaw, dimteng dagiti adipen ni Isaac ket impadamagda kenkuana a nakasarakda iti danum iti bubon a kinalida.

³³Pinanaganan ni Isaac ti bubon iti Seba. Kastoy ti pannakapanagan ti siudad iti Beerseba.

³⁴Idi 40 ti tawen ni Esau, nangasawa iti dua a babbai a Heteo: ni Judit nga anak ni Beeri ken ni Basemat nga anak ni Elon.

³⁵Kasta unay ti panangpaladingitda iti biag da Isaac ken Rebecca.