Read Iloko Genesis 3 Bible Online

Genesis 3 - Iloko bible

Genesis 3

¹Ti uleg ti kasikapan nga animal nga inaramid ni Yahweh a Dios. Sinaludsod ti uleg iti babai, “Agpayso kadi nga imbaga ti Dios a dikay mangan iti bunga ti uray ania a kayo iti minuyongan?”

²“Mabalinmi ti mangan iti bunga ti uray ania a kayo iti minuyongan,” insungbat ti babai.

³“Ngem saanmi a mabalin a kanen ti bunga ti kayo nga adda iti tengnga. No mangankami kano iti bungana wenno uray sagidenmi la koma, mataykami.”

⁴“Saan a pudno dayta,” kinuna ti uleg. “Saankayo a matay!

⁵Kasta ti sao ti Dios ta ammona a no mangankayo iti bunga ti kayo, maaddaankayto iti pannakaawat. Agbalinkayto a kas iti Dios ket maammoanyonto no ania ti naimbag ken ti dakes.”

⁶Nakita ti babai a napintas ti kayo ken impapanna a nasayaat a kanen ti bungana. “Nagsayaat ket ngatan ti agbalin a masirib!” kinunana iti nakemna. Nangpuros iti sumagmamano a bunga ti kayo sa nangan. Inikkanna met ti asawana ket nangan ti lalaki.

⁷Apaman a nakapanganda, naaddaanda iti pannakaawat ket nabigbigda a lamolamoda. Iti kasta, namagsasaipda kadagiti bulong ti kayo nga igos a pinangabbongda iti bagida.

⁸Iti dayta a sumipnget, nangngegda ti arimpadek ni Yahweh a Dios a magmagna iti minuyongan. Naglemmeng dagiti agassawa kadagiti kakaykaywan,

⁹ngem pinukkawan ni Yahweh a Dios ti lalaki. “Sadino ti ayanmo?” kinunana.

¹⁰“Nagbutengak a nakangngeg iti timekmo iti minuyongan,” insungbat ti lalaki. “Ket naglemmengak gapu ta lamolamoak.”

¹¹“Siasino ti nangibaga a lamolamoka?” sinaludsod ti Dios. “Nanganka kadi iti bunga nga imparitko a kanem?”

¹²“Wen, inikkannak ti babai nga intedmo a katakunaynayko ket kinnanko,” insungbat ti lalaki.

¹³“Apay nga inaramidmo ti kasta?” sinaludsod ni Yahweh a Dios iti babai. Insungbatna, “Inallilawnak ti uleg, isu a nasulisogak a nangan.”

¹⁴Kinuna ni Yahweh a Dios iti uleg, “Madusaka gapu iti inaramidmo. Sika laeng kadagiti amin nga animal ti masapul a mangibaklay iti daytoy a lunod: Manipud ita, aguyaska ket tapok ti kanem iti unos ti panagbiagmo.

¹⁵Pagginnuraenkayto iti babai. Saanto nga agpatingga ti panagbinnusor dagiti kaputotanyo. Rim-itento ti kaputotanna ti ulom ket kagatemto met ti mukodna.”

¹⁶Kinunana iti babai, “Paaduekto ti rigat a sagabaem bayat ti panagsikogmo. Ket ad-addanto pay inton dumteng ti panagpasikalmo. Nupay kasta, kasapulamto latta ti asawam ngem iturayannakanto.”

¹⁷Kinunana iti lalaki, “Impangagmo ti asawam ket kinnanmo ti bunga nga imbagak a dimo kanen. Gapu iti daytoy nga inaramidmo, mailunodto ti daga. Masapul nga igaedmo ti agtrabaho iti unos ti panagbiagmo tapno adda apitem ket umanay ti taraonmo.

¹⁸Agtubonto dagiti ruruot ken sisiitan ket kapilitanto a manganka kadagiti mula ti talon.

¹⁹Masapul nga agling-etka ket agtrabahoka iti nadagsen tapno adda ibunga ti daga agingga nga agsublika iti daga a nakaparsuaam. Nabukelka iti tapok ket agsublikanto met laeng iti tapok.”

²⁰Eva ti impanagan ni Adan iti asawana gapu ta isu ti ina ti amin a tattao.

²¹Ket nangaramid ni Yahweh a Dios kadagiti pagan-anay a lalat a pinangkawesna kada Adan ken Eva.

²²Kalpasanna, kinuna ni Yahweh a Dios, “Ita, nagbalinen ti tao a kas kadatayo ket ammonan ti naimbag ken dakes. Masapul a saan a mapalubosan a mangan iti kayo ti biag amangan no saanen a matay.”

²³Ngarud, pinagtalaw ni Yahweh a Dios ti tao iti minuyongan ti Eden ket pinagtrabahona iti daga a nagtaudanna.

²⁴Iti bangirna't daya ti minuyongan, nangikabil kadagiti narungsot nga animal a nagpayak. Nangikabil pay iti sumsumged a kampilan tapno awan umasideg iti kayo ti biag.