Read Iloko Genesis 30 Bible Online

Genesis 30 - Iloko bible

Genesis 30

¹Nagimon ni Raquel iti kabsatna idi saanda nga aganak ken ni Jacob. Kinunana ken ni Jacob, “Matayak la ketdi no saanta a maadaan iti anak.”

²Nakaunget ni Jacob ken ni Raquel ket kinunana, “Mabalinko aya nga alaen ti lugar ti Dios? Saan a siak ti manglaplapped iti panaganakmo.”

³Kinuna ni Raquel, “No kasta, ni Bilha a tagabuk ti kaiddaem tapno aganak ket agbalinak nga ina gapu kenkuana.”

⁴Intedna ngarud ni Bilha ket kinaidda ni Jacob.

⁵Nagsikog ni Bilha ket naganak iti lalaki.

⁶Kinuna ni Raquel, “Kinaasiannak ti Dios. Impangagna ti kararagko ket pinaraburannak iti anak a lalaki.” Isut' gapuna a pinanagananna ti maladaga iti Dan.

⁷Nagsikog manen ni Bilha ket naganak iti lalaki.

⁸Kinuna ni Raquel, “Nakidangadangak a sipipinget ken ni manangko ket nangabakak.” Pinanagananna ngarud ti ubing iti Neftali.

⁹Idi madlaw ni Lea a simmardengen nga aganak, intedna ni Zilpa a tagabuna a kas asawa ni Jacob.

¹⁰Naganak ni Zilpa iti lalaki.

¹¹“Nagasatak,” kinuna ni Lea. Iti kasta, pinanagananna ti maladaga iti Gad.

¹²Naganak manen ni Zilpa iti lalaki

¹³ket kinuna ni Lea, “Anian a ragsakko! Ita, awagandakon dagiti babbai iti naragsak.” Pinanagananna ngarud ti ubing iti Aser.

¹⁴Panagani idi iti trigo. Napan ni Ruben iti taltalon, ket adda nasarakanna a bungbunga ti mandragoras. Insangpetna dagitoy ken ni nanangna a Lea. Kinuna ni Raquel ken ni Lea, “Ikkannak man iti mandragoras nga insangpet ti anakmo.”

¹⁵Kinuna ni Lea, “Di pay la umdas aya nga inagawannak iti asawa? Ita, kayatmo pay nga alaen dagiti mandragoras ti anakko!” Kinuna ni Raquel, “No ikkannak iti mandragoras, ipalubosko a makikaiddaka ken ni Jacob ita a rabii.”

¹⁶Iti sumipnget, idi sumangpet ni Jacob a naggapu iti taltalon, sinabat ni Lea ket kinunana, “Umayka kaniak ita a rabii gapu ta inikkak ni Raquel iti mandragoras kas bayad ti pannakikaiddak kenka.” Nagkaiddada ngarud iti dayta a rabii.

¹⁷Impangag ti Dios ti kararag ni Lea. Nagsikog ket impasngayna ti maikalima nga anakna a lalaki.

¹⁸Kinuna ni Lea, “Ginunggonaannak ti Dios ta intedko ti tagabuk ken ni asawak.” Iti kasta, pinanagananna ti anakna iti Issacar.

¹⁹Nagsikog manen ni Lea ket impasngayna ti maikanem a lalaki nga anak ni Jacob.

²⁰Kinunana, “Inikkannak ti Dios iti napateg a sagut. Ita, awatennakon ti asawak ta nakayanakak iti innem a lallaki.” Pinanagananna ngarud ti ubing iti Zabulon.

²¹Ket kalpasanna, naganak iti babai a pinanagananna iti Dina.

²²Kamaudianna, naasian met laeng ti Dios ken ni Raquel. Impangagna ti kararagna; inikkanna iti gundaway nga aganak.

²³Nagsikog ni Raquel ket naganak iti lalaki. Kinunana, “Inikkat ti Dios ti pakaibabainak gapu iti pannangtedna kaniak iti anak.

²⁴Ikkannak koma ti Apo iti sabali pay nga anak a lalaki.” Iti kasta, pinanagananna ti ubing iti Jose.

²⁵Kalpasan ti pannakaipasngay ni Jose, kinuna ni Jacob ken ni Laban, “Palubosannak koma nga agawid.

²⁶Ikuyogko dagiti assawak ken dagiti annakko. Nateggedko ida gapu iti panagserbik kenka.”

²⁷Kinuna ni Laban, “Palubosannak koma a mangibaga iti daytoy: Kas maibatay iti nasursurok maipapan iti panagpadles, ammok a binendisionannak ti Apo gapu kenka.

²⁸Ibagam ti kayatmo a sueldo ket itedko.”

²⁹Insungbat ni Jacob, “Ammom no kasano ti panagserbik kenka ken no kasano ti yaadu dagiti arbanmo iti aywanko.

³⁰Bassit pay la ti sanikuam sakbay a simmangpetak ngem nakarangrang-aykan ta binendisionannaka ti Apo gapu kaniak. Ita, tiempona metten a tamingek ti pagimbagak.”

³¹“Ania ngarud ti itangdanko kenka?” sinaludsod ni Laban. “Diak dumawat iti sueldo,” insungbat ni Jacob. “Ituloyko a taraknen dagiti animalmo no umanamongka iti singasingko.

³²Ita met laeng, innak kadagiti arbanmo ket alaek amin a nangisit nga urbon ti karnero ken amin a labang wenno turikturikan nga urbon ti kalding. Kukuakon dagitoy a kas tangdanko.

³³Iti masakbayan, nalakamto a matakuatan no inallilawka. No umaymonto kitaen dagiti tangdanko nga animal, ket makitamto nga adda nailaok a saan a labang ken turikturikan a kalding wenno saan a nangisit a karnero, maammoamto a tinakawko daytoy kenka.”

³⁴“Ala, wen. Aramidenta ti imbagam,” kinuna ni Laban.

³⁵Ngem iti dayta nga aldaw, innala ni Laban ti amin a kalakian a kalding a garitan ken amin a kabaian a kalding a turikturikan ken labang, kasta met dagiti amin a nangisit a karnero sana impataraken dagitoy kadagiti annakna a lallaki.

³⁶Kalpasanna, pimmanawda nga agaama ket tallo nga aldawda a nagnagna agingga a dimmanonda iti maysa a disso nga adayo ken ni Jacob. Inaywanan ni Jacob dagiti nabati nga arban.

³⁷Nangala ni Jacob kadagiti naganus a sanga dagiti alamo, almendras ken kastanio sana inikkat ti dadduma nga ukisda tapno kasla garitan ti langada.

³⁸Inkabilna dagitoy a sanga iti paginuman dagiti arban tapno makitada no uminumda. Agtitinnakba ngamin dagiti animal no uminumda.

³⁹Iti kasta, idi agmaya dagiti kalding iti sango dagiti sanga, naganakda kadagiti garitan, turikturikan ken labang nga urbon.

⁴⁰Saan a pinagtitipon ni Jacob dagiti urbon a karnero ken dagiti kalding. Inlasinna ida iti maysa a lugar tapno kanayon a matannawaganda dagiti garitan ken nangisit nga animal iti arban ni Laban. Kastoy ti panangpaaduna iti arbanna ket inlasinna ida iti arban ni Laban.

⁴¹Tunggal agmaya dagiti nasalun-at nga animal, ikabil ni Jacob dagiti sanga iti sangoananda, iti pagin-inumanda, tapno agmayada iti ayan dagiti sanga.

⁴²Ngem dina inkabil dagiti sanga iti sangoanan dagiti saan a nasalun-at nga animal. Idi agangay, nasasalun-at dagiti arban ni Jacob idinto a nakapuy dagiti animal ni Laban.

⁴³Kastoy ti panagbalin ni Jacob a nakabakbaknang. Adu ti karnero, tagabu, kamelio ken asnona.