Read Iloko Genesis 32 Bible Online

Genesis 32 - Iloko bible

Genesis 32

¹Bayat ti panangituloy ni Jacob iti panagdaliasatna, adda sumagmamano nga angheles a nangsabat kenkuana.

²Idi makitana ida, kinunana, “Daytoy ti kampo ti Dios.” Iti kasta, pinanagananna ti lugar iti Mahanaim.

³Pinauna ni Jacob ti sumagmamano a tattaona a mapan ken ni kabsatna nga Esau iti pagilian ti Edom.

⁴Kastoy ti pinaibagana: “Siak ni Jacob a kabsatmo ken natulnog nga adipenmo. Kayatko nga ipakaammo a nabayagak a nakipagtaeng ken ni uliteg a Laban ket ita la ti panagsublik.

⁵Adu ti baka, asno, kalding, karnero ken tagabuk. Imbaonko dagitoy pannakabagik bareng magun-odko ti panagtalekmo.”

⁶Nagsubli dagiti naibaon ket kinunada ken ni Jacob, “Nakasaomi ni Esau a kabsatmo ket umaynaka sabten. Addan iti dalan a kaduana ti 400 a lallaki.”

⁷Nagbuteng ken nariribukan ni Jacob. Biningayna iti dua a bunggoy dagiti tattaona, kasta met dagiti karnero, kalding, baka ken kamelio.

⁸Kinunana iti bagina, “No darupennakami ni Esau, mabalin a makalibas ti maysa a bunggoy.”

⁹Ket nagkararag ni Jacob, “O Dios ni apongko nga Abraham ken ni tatangko nga Isaac, tulongannak koma. Imbagam kaniak, O Apo, nga agsubliak iti dagak ken kadagiti kakabagiak ket saannakto a baybay-an.

¹⁰Diak maikari iti amin nga imbag ken ayat nga impaaymo kaniak nga adipenmo. Idi bimmallasiwak iti Jordan, awan iggemko no di la sarukod, ngem ita ta nagsubliakon, duan a bunggoy ti kinakuyogko.

¹¹Isalakannak koma iti pannakabalin ni kabsatko nga Esau. Mabutengak amangan no umaynakami patayen amin, pati dagiti babbai ken ubbing.

¹²Inkarim kaniak a saannakto a baybay-an ket awanto ti dakes a mapagtengko. Imbagam pay a paaduem dagiti kaputotak a kas iti kaadu ti darat iti igid ti baybay.”

¹³Naturog sadiay ni Jacob iti dayta a rabii. Kabigatanna, insaganana dagiti regalona ken ni Esau. Nangpili iti dua gasut a kabaian a kalding ken duapulo a bulog, dua gasut a kabaian a karnero ken duapulo a kalakian, tallopulo a gagatasen a kamelio agraman dagiti urbonda, uppat a pulo a kabaian a baka ken sangapulo a toro, duapulo a kabaian nga asno ken sangapulo a kalakian.

¹⁶Adda adipen a nadutokan a mangaywan iti tunggal arban. Kinunana kadakuada, “Umun-unakayo, ngem saankayo nga aggigiddan; agsasarunokayo ket ikkanyo ti baet ti tunggal arban.”

¹⁷Imbilinna iti umuna nga adipen, “Inton masabatnaka ni kabsatko nga Esau ket saludsodenna, ‘Siasino ti apom? Sadino ti papanam? Siasino ti akinkukua kadagitoy nga animal?’

¹⁸kastoyto ti isungbatmo, ‘Kukua ni adipenmo a Jacob. Paitedna dagitoy a kas sagut ken ni apona nga Esau. Sumarsaruno kadakami ni Jacob.’”

¹⁹Kasta met ti imbilinna iti maikadua, iti maikatlo ken kadagiti amin nga adipen nga adda aywanna nga arban, “Kastoyto amin ti ibagayo ken ni Esau inton masabatyo.

²⁰Ibagayo pay, ‘Wen, sumarsaruno kadakami ni Jacob nga adipenmo.’” Kinuna ngamin ni Jacob iti bagina, “Ay-aywek ni kabsatko babaen iti pannangtedko kenkuana kadagiti sagut ket inton agsarakkami, nalabit a pakawanennakon.”

²¹Impaunana ngarud dagiti sagut ket immian iti kampo iti dayta a rabii.

²²Iti dayta met la a rabii, bimmangon ni Jacob sana imballasiw dagiti dua nga assawana, dagiti dua a nga adipen a babbai ken dagiti sangapulo ket maysa nga annakna iti Karayan Jabbok.

²³Kalpasanna, imballasiwna met dagiti amin a sanikuana

²⁴ngem nagbati nga is-isuna. Sadiay, dimteng ti maysa a lalaki ket nakigabbo kenkuana agingga nga agbannawag.

²⁵Idi madlaw ti lalaki a dina maparmek ni Jacob, tinapigna ti padingpading ni Jacob ket naligsi ti nagsuopan dagiti tulangna.

²⁶Kinuna ti lalaki, “Ibbatannakon ta bumigaten.” “Dika palusposan no dinak umuna a bendisionan,” insungbat ni Jacob.

²⁷“Ania ti naganmo?” sinaludsod ti lalaki. “Jacob,” insungbatna.

²⁸Kinuna ti lalaki, “Manipud ita, saanen a Jacob ti naganmo. Gapu ta nakigabboka iti Dios ken iti tao ket nangabakka, Israel ti naganmon.”

²⁹“Ita, ibagamon kaniak ti naganmo,” kinuna ni Jacob. Ngem insungbatna, “Apay a kayatmo nga ammoen ti naganko?” Ket binendisionanna ni Jacob.

³⁰Kinuna ni Jacob, “Nakitak ti Dios iti rupanrupa ket sibibiagak pay laeng.” Daytoy ti gapuna a pinanagananna ti lugar iti Peniel.

³¹Lumgaken ti init idi pumanaw ni Jacob idiay Peniel. Agpilpilay gapu iti nablo a padingpadingna.

³²Daytoy ti gapuna nga uray kadagitoy nga aldaw, saan a sidaen dagiti kaputotan ni Israel ti piskel iti padingpading ti animal ta daytoy ti naligsi a paset ti bagi ni Jacob a tinapik daydi lalaki.