Read Iloko Genesis 33 Bible Online

Genesis 33 - Iloko bible

Genesis 33

¹Nakita ni Jacob a sumungsungad ni Esau ken dagiti 400 a tattaona, isut' gapuna a biningayna dagiti annakna. Naipanda kadagiti innada, da Lea ken Raquel; ken kadagiti dua nga adipen a babbai.

²Pinaunana dagiti dua nga adipen ken dagiti annakda. Simmaruno ni Lea ken dagiti annakna ket naudi ni Raquel ken ni Jose nga anakna.

³Immun-una ni Jacob ngem isuda ket namimpito a nagrukob agingga a dimmanon iti sangoanan ti kabsatna.

⁴Ngem nagtaray ni Esau a nangsabat kenkuana, inarakupna ni Jacob sana inagkan. Nagsangsangitda a dua.

⁵Idi iwaras ni Esau ti panagkitana ket nakitana dagiti babbai ken ubbing, sinaludsodna, “Siasino dagitoy kinakuyogmo?” “Isuda, apo, dagiti annak nga imparabur ti Dios kaniak,” insungbat ni Jacob.

⁶Ket immasideg dagiti tagabu a babbai ken dagiti annakda ket nagtamedda.

⁷Kasta met ti inaramid ni Lea ken dagiti annakna sa da Raquel ken Jose.

⁸Sinaludsod ni Esau, “Ket daydiay sabali a bunggoy a nasabatko? Ania ti kayatna a sawen?” “Agpaay kenka tapno magun-odko ti panagtalekmo,” insungbat ni Jacob.

⁹Ngem kinuna ni Esau, “Adu ti sanikuak, kabsatko. Alaem dagiti kukuam nga agserbi kenka.”

¹⁰Kinuna ni Jacob, “Awatem koma no pudno a pinakawannakon. Kasla nakitak ti Dios iti pannakakitak kenka, ita ta inawatnak a siaayat.

¹¹Pangngaasim ta alaem dagitoy sagut nga inyegko nga agpaay kenka; kinaasiannak ti Dios ket intedna amin a masapulko.” Saan a namingga ni Jacob a nanguy-uyot iti kabsatna agingga nga inawat ni Esau dagiti sagutna.

¹²Kinuna ni Esau, “Agrubbuatkayon ta intayon. Umun-unaak ngem dakayo.”

¹³Kinuna ni Jacob, “Kas makitam, agkakapsut dagiti ubbing. Madanaganak met iti kasasaad dagiti karnero ken dagiti baka agraman dagiti agsussuso nga urbonda. No agap-apuratayo ket makarintarda iti uray maysa la nga aldaw, amangan no matayda.

¹⁴Pangngaasim ta umun-unakan, ta sumarunoak nga agin-innayad. Ngem ikagumaak ti agdardaras kas kabaelan dagiti arban ken dagiti ubbing ket danonendakanto idiay Seir.”

¹⁵“Mangibatiak ngarud iti sumagmamano a tattaok a mangkuyog kadakayo,” kinuna ni Esau. Ngem kinuna ni Jacob, “Uray saanen, ta kayatko la a magun-od ti panagtalekmo.”

¹⁶Nagluas ni Esau tapno agsubli idiay Seir iti dayta met la nga aldaw.

¹⁷Ngem nagturong ni Jacob idiay Succot. Nangbangon sadiay iti balayna ken sapsapaw a paglinongan dagiti arbanna. Isu a napanaganan dayta a lugar iti Succot.

¹⁸Simmangpet ni Jacob nga awan nakaan-anoanna idiay Sikem iti daga ti Canaan iti panaggapuna idiay Padan-aram. Nagkampo iti asideg ti ili, iti sanganayon a daga a

¹⁹ginatangna kadagiti kaputotan ni Hamor nga ama ni Sikem iti sangagasut a bagi ti pirak.

²⁰Nangbangon sadiay iti altar a pinanagananna iti “El,” ti Dios ti Israel.