Read Iloko Genesis 34 Bible Online

Genesis 34 - Iloko bible

Genesis 34

¹Iti maysa nga aldaw, napan binisita ni Dina nga anak da Jacob ken Lea ti sumagmamano a babbai ti Canaan.

²Idi makita ni Sikem nga anak ni Hamor a Heveo a pangulo iti dayta a lugar, pinilitna ni Dina a kumuyog kenkuana sana rinames.

³Ngem nakita ni Sikem a napintas ni Dina, isu a rimmusing ti panagayatna kenkuana ket inkagumaanna a liwliwaen.

⁴Kinuna ni Sikem ken ni tatangna, “Ipamuspusanyo koma ti pannakaasawak iti daytoy a babai.”

⁵Naammoan ni Jacob a narames ti anakna ngem saan a nagtagtagari gapu ta adda pay la iti away dagiti lallaki nga annakna a mangipaspastor kadagiti arbanna.

⁶Napan ni Hamor nakisao ken ni Jacob.

⁷Isu met a sumangpet dagiti annak ni Jacob a naggapu iti away. Kasta unay ti pungtotda idi maammoanda ti napasamak ken ni Dina. Imbilangda daytoy a maysa a panangidadanes kadagiti Israelita.

⁸Kinuna ni Hamor kadakuada, “Ay-ayaten ni Sikem nga anakko ti anakyo. Pangngaasiyo ta ipalubosyo nga asawaenna.

⁹Mangaramidtay iti katulagan a mangipalubos nga agiinnasawa dagiti tattaotayo.

¹⁰Ditoyen ti pagyananyo. Mabalinyo ti agtaeng iti sadinoman a lugar a kayatyo. Mabalinyo ti agnegosio ken agtagikua iti daga.”

¹¹Kinuna ni Sikem iti ama ken kadagiti kakabsat ni Dina, “Pangngaasiyo ta patganyo ti dawatko ket itedko ti aniaman a kayatyo.

¹²Ibagayo no ania ti isab-ongko ken no mano ti pagbayadko, uray mano. Itedko ti aniaman a kayatyo no la ket ipalubosyo nga asawaek ni Dina.”

¹³Gapu iti panangrames ni Sikem ken ni Dina, adda sikap ti sungbat dagiti annak ni Jacob kadagiti agama.

¹⁴Kinunada, “Pakaibabainanmi no saan a kugit ti mangasawa iti kabsatmi.

¹⁵Umannugotkami laeng iti maysa a kondision: Agpakugitkayo, a kas kadakami, kasta met ti amin a lallaki kadakayo.

¹⁶No aramidenyo daytoy, mayatkami nga agiinnasawa dagiti tattaotayo. Agtaengkami iti dagayo ket makikaysakami kadakayo.

¹⁷Ngem no madikayo nga agpakugit, alaenmi ni Dina ket pumanawkami.”

¹⁸Nakita da Hamor ken Sikem nga awan pagdaksan daytoy a kondision

¹⁹ket saan a nagtaktak ti agtutubo a nagtungpal iti singasing agsipud ta ay-ayatenna ti anak ni Jacob. Ni Sikem ti kangrunaan a kameng ti familiada.

²⁰Inummong da Hamor ken Sikem dagiti kailianda iti pagmimitingan iti ruangan ti ili ket imbagada kadakuada:

²¹“Naimbag dagitoy a tattao. Palubosantayo ida nga agnaed iti lugartayo ket bay-antayo ida a mapan iti sadinoman a lugar a kayatda a papanan, uray ta nalawa ti dagatayo. Mabalintayo nga asawaen dagiti annakda ket mabalinda met nga asawaen dagiti annaktayo.

²²Ngem kayat dagitoy a tattao ti makipagnaed kadatayo ket makipagmaymaysada kadatayo no la ket makugittayo a lallaki a kas kadakuada.

²³Saan aya a kukuatayonto metten dagiti animalda ken amin a sanikuada? Ngarud, umannugottayo a mabalinda ti makipagnaed kadatayo.”

²⁴Immanamong dagiti umili iti singasing da Hamor ken Sikem ket nakugit dagiti amin a lallaki.

²⁵Kalpasan ti tallo nga aldaw, idi kapalteg pay laeng ti kugit dagiti lallaki, dua kadagiti annak ni Jacob—da Simeon ken Levi a kakabsat ni Dina—ti nangala kadagiti kampilanda. Simrekda iti siudad nga awan ti nakadlaw kadakuada ket pinatayda amin dagiti lallaki.

²⁶Pinatayda met ni Hamor ken ni anakna a Sikem. Innalada ni Dina iti balay ni Sikem sada pimmanaw.

²⁷Idi malpas ti panagpapatayda, nagsamsam dagiti dadduma a lallaki nga annak ni Jacob tapno ibalesda ti pannakaibabain ti kabsatda.

²⁸Innalada dagiti arban, dagiti baka, dagiti asno ken dadduma pay nga adda iti ili ken iti away.

²⁹Intalawda dagiti amin a napateg. Tiniliwda dagiti babbai ken ubbing ket pulos nga awan imbatida kadagiti balbalay.

³⁰Kinuna ni Jacob kada Simeon ken Levi, “Inrubodak. Ita, guraendakon dagiti Cananeo, dagiti Perezeo ken amin nga agnaed iti daytoy a daga. No agtitiponda a mangraut kadatayo, awan ti umanay a tattaotayo a mangsaranget kadakuada. Mabalin nga ikisapdatayo a sangafamiliaan.”

³¹“Dimi kayat a maibilang a balangkantis ti kabsatmi,” insungbatda.