Read Iloko Genesis 35 Bible Online

Genesis 35 - Iloko bible

Genesis 35

¹Kinuna ti Dios ken ni Jacob, “Agrubbuatka a dagus ta inka idiay Betel ket agnaedka sadiay. Mangbangonka iti altar sadiay nga agpaay iti Dios a nagparang kenka idi intarayam ni Esau a kabsatmo.”

²Kinasao ngarud ni Jacob ti familiana ken dagiti amin a naikuyog kenkuana. “Ibellengyo dagiti didiosen nga adda kadakayo,” kinunana. “Dalusanyo dagiti bagbagiyo kas mayannurot iti alagaden ket agkaweskayo iti nadalus a pagan-anay.

³Pumanawtayo ditoy ket intayo idiay Betel. Mangbangonak sadiay iti altar nga agpaay iti Dios a kadkaduak iti sadinoman a yanko ken tumultulong kaniak iti amin a pakarigatak.”

⁴Intedda ken ni Jacob dagiti amin a didiosenda ken dagiti aritos nga ar-aramatenda. Inkalina dagitoy iti sirok ti kayo a lugo iti asideg ti Sikem.

⁵Idi pumanawda, kasta unay ti buteng dagiti tattao kadagiti kabangibang nga ili ket awan ti nakaitured a nangdarup kadakuada.

⁶Dimteng da Jacob ken dagiti amin a naikuyog kenkuana idiay Luz (a maaw-awagan itan iti Betel) iti daga ti Canaan.

⁷Nangbangon sadiay iti maysa nga altar ket pinanagananna ti lugar iti El-Betel agsipud ta nagparang kenkuana ti Dios sadiay idi tinalawanna ni kabsatna.

⁸Natay ni Debora, ti babai nga agserserbi ken ni Rebecca, ket naitanem iti sirok ti lugo iti abagatan ti Betel. Daytoy ti gapuna a napanaganan dayta a disso iti “Lugo a Nagsangitan.”

⁹Nagparang manen ti Dios ken ni Jacob kalpasan iti panagsublina manipud Padan-aram ket binendisionanna.

¹⁰Kinuna ti Dios, “Jacob ti naganmo ngem manipud ita, maawagankan iti Israel.” Isut' gapuna nga Israel ti nagan ni Jacob.

¹¹Ket kinuna ti Dios, “Siak ti Dios a Mannakabalin-amin. Maaddaanka iti adu nga annak. Naindaklanto a nasion ti agtaud kenka ket sikanto ti kapuonan dagiti adu nga ari.

¹²Itedkonto kenka ken kadagiti sumarsaruno a kaputotam ti daga nga inkarik kada Abraham ken Isaac.”

¹³Ket pimmanaw ti Dios.

¹⁴Nangipasdek ni Jacob iti baton-lagip iti lugar a nakisaritaan kenkuana ti Dios, ket inkonsagrarna babaen iti panangbukbokna iti arak ken lana.

¹⁵Pinanagananna ti disso iti Betel.

¹⁶Pimmanaw ni Jacob ken ti familiana idiay Betel. Adayoda pay laeng idiay Efrata idi marikna ni Raquel a dumtengen ti panagpasngayna. Napalalo ti rigatna a nagpasikal.

¹⁷Kinuna ti partera, “Saanka nga agbuteng, Raquel. Lalaki manen ti ipasngaymo.” Marigatan unayen ni Raquel.

¹⁸Dandani mauyosen ti angesna ngem sakbay a nagsatan, pinanagananna ti anakna iti Benoni idinto a pinanaganan ni Jacob iti Benjamin.

¹⁹Natay ni Raquel ket naitanem iti igid ti dalan nga agturong idiay Efrata (ti agdama a Betlehem).

²⁰Nangikabil ni Jacob iti maysa a baton-lagip ni Raquel. Adda pay laeng daytoy a pakakitaan ti nakaitanemanna.

²¹Intuloy ni Israel (Jacob) ti panagdaliasatna ket nagkampo iti kasumbangir ti torre ti Eder.

²²Bayat ti panagnaed ni Jacob iti dayta a daga, napan kinaidda ni Ruben ni Bilha a maysa kadagiti inkabbalay ni tatangna. Naammoan daytoy ni Jacob ket kasta unay ti pungtotna. Sangapulo ket dua a lallaki ti annak ni Jacob.

²³Dagiti annakda ken Lea: Ruben, ti inauna, Simeon, Levi, Juda, Issacar ken Zabulon.

²⁴Dagiti annakda ken Raquel: Jose ken Benjamin.

²⁵Dagiti annakda ken ni Bilha a tagabu ni Raquel: Dan ken Neftali.

²⁶Dagiti annakda ken ni Zilpa a tagabu ni Lea: Gad ken Aser. Naipasngayda amin idiay Padan-aram.

²⁷Napan ni Jacob idiay Mamre a pagnanaedan ni tatangna nga Isaac ken nagnaedan met idi ni Abraham iti asideg ti Hebron.

²⁸Nadanon ni Isaac ti tawen a 180.

²⁹Lakay unayen idi matay. Da Esau ken Jacob nga annakna ti nangitanem kenkuana.