Read Iloko Genesis 36 Bible Online

Genesis 36 - Iloko bible

Genesis 36

¹Dagitoy dagiti kaputotan ni Esau (Edom pay ti naganna).

²Nangasawa ni Esau kadagiti Cananea: ni Ada nga anak ni Elon a Heteo; ni Oholibama nga anak ni Ana a lalaki nga anak ni Zibeon a Heveo;

³ken ni Basemat nga anak ni Ismael ken kabsat ni Nebayot.

⁴Inyanak ni Ada ni Elifaz; inyanak ni Basemat ni Reuel;

⁵ket inyanak met ni Oholibama da Jeus, Jaalam ken Kora. Annak ida ni Esau. Nayanakda amin idiay Canaan.

⁶Napan nagnaed ni Esau iti sabali a daga. Inkuyogna dagiti assawana, dagiti annakna ken dagiti amin a tattaona, agraman amin a baka ken sanikuana a naurnongna idiay Canaan.

⁷Pinanawanna ni Jacob idiay Canaan ta saanen nga umdas ti daga a mangbiag kadakuada nga agkabsat. Adu unayen ti arbanda ket dida mabalin ti agtipon.

⁸Napan nagnaed ni Esau iti katurturodan a pagilian ti Seir.

⁹Dagitoy dagiti kaputotan ni Esau a kapuonan dagiti Edomita iti katurturodan a pagilian ti Seir.

¹⁰Maysa ti anak ni Esau ken ni Ada; isu ni Elifaz. Lima ti lallaki nga annak ni Elifaz: Teman, Omar, Zefo, Gatam ken Kenaz. Maysa pay ti anakna ken ni Timna a maysa kadagiti assawana; isu ni Amalec. Maysa ti anak ni Esau ken ni Basemat: ni Reuel. Uppat met ti lallaki nga annak ni Reuel: Nahat, Zera, Samma ken Mizza.

¹⁴Tallo ti lallaki nga annak ni Esau ken ni Oholibama nga anak ni Ana, ti lalaki nga anak ni Zibeon: da Jeus, Jaalam ken Kora.

¹⁵Dagitoy dagiti tribu a nagtaud ken ni Esau. Ni Elifaz nga inauna nga anakna ti kapuonan dagiti sumaganad a tribu: Teman, Omar, Zefo, Kenaz, Kora, Gatam ken Amalec. Isuda dagiti nagtaud ken ni Ada.

¹⁷Ni Reuel nga anak ni Esau ti kapuonan dagiti sumaganad a tribu: Nahat, Zera, Samma ken Mizza. Isuda dagiti nagtaud ken ni Basemat.

¹⁸Dagiti sumaganad a tribu ti nagtaud ken ni Esau iti pannakiasawana ken ni Oholibama nga anak ni Ana: Jeus, Jaalam ken Kora.

¹⁹Nagtaud amin dagitoy a tribu ken ni Esau.

²⁰Nabingay iti nadumaduma a tribu dagiti sigud nga agnaed iti Edom. Dagiti kaputotan ni Seir a maysa a Horeo ti nagtaudan dagiti kapuonanda: Lotan, Sobal, Zibeon, Ana, Dison, Ezer, ken Disan.

²²Ni Lotan ti nagtaudan dagiti kapuonan da Hori ken Heman. (Adda babai a kabsat ni Lotan ket Timna ti naganna.)

²³Ni Sobal ti nagtaudan dagiti kapuonan da Alban, Manahat, Ebal, Sefo ken Onam.

²⁴Dua ti lallaki nga annak ni Zibeon: Aya ken Ana. (Ni Ana ti nakasarak iti napudot nga ubbog iti let-ang idi ipaspastorna dagiti asno ni tatangna.)

²⁵Ni Ana ti ama ni Dison a nagtaudan dagiti kapuonan da Hemdan, Esban, Itran ken Keran. Adda met babai nga anak ni Ana nga agnagan iti Oholibama.

²⁷Ni Ezer ti nagtaudan dagiti kapuonan da Bilhan, Zaavan ken Akan.

²⁸Ni Disan ti nagtaudan dagitoy a kapuonan da Uz ken Aran.

²⁹Dagitoy ti tribu dagiti Horeo iti daga ti Edom: Lotan, Sobal, Zibeon, Ana, Dison, Ezer ken Disan.

³¹Dagitoy sumaganad nga ar-ari ti nagsasaruno a nangituray iti Edom sakbay nga adda ari iti Israel: Bela nga anak ni Beor a taga-Dinhaba Jobab nga anak ni Zera a taga-Bozra Husam iti deppaar ti Teman Hadad nga anak ni Bedad a taga-Avit. (Pinarmekna dagiti Midianita iti maysa a gubat iti pagilian ti Moab.) Samla a taga-Masrecca Saul a taga-Rehobot-iti-Karayan Baal Hanan nga anak ni Akbor Hadad a taga-Pau. (Asawana ni Mehetabel nga anak ni Matred ken apoko ni Mezaab.)

⁴⁰Ni Esau ti kapuonan dagitoy sumaganad a tribu dagiti Edomita: Timna, Alva, Jetet, Oholibama, Ela, Pinon, Kenaz, Teman, Mibzar, Magdiel ken Iram. Ti lugar a pagnaedan ti tunggal maysa kadagitoy a tribu isu met ti naipanagan kadakuada.