Read Iloko Genesis 37 Bible Online

Genesis 37 - Iloko bible

Genesis 37

¹Nagtalinaed ni Jacob iti daga ti Canaan a nagnaedan ni tatangna.

²Daytoy ti pakasaritaan ti familia ni Jacob. Agtawen ni Jose iti 17 idi kumuykuyog kadagiti kakabsatna a mangipaspastor kadagiti kalding ken karnero. Isuda dagiti lallaki nga annak da Bilha ken Zilpa nga inkabbalay ni tatangna. Ammo ni Jose dagiti dakes nga ar-aramiden dagiti kakabsatna, isu nga ipulpulongna ida iti amana.

³Ad-adda ti panagayat ni Israel ken ni Jose ngem kadagiti dadduma nga annakna gapu ta nayanak idi lakayen. Inyaramidanna ni Jose iti atiddog a pagan-anay nga adda manggasna.

⁴Idi madlaw dagiti kakabsatna nga ad-adda ti panagayat ni tatangda kenkuana ngem isuda, ginurada ni Jose ket pulos a saan a nasayaat ti pannakilangenda kenkuana.

⁵Iti naminsan, nagtagtagainep ni Jose ket ad-adda manen a ginurada idi ibagana kadakuada ti tagainepna.

⁶“Denggenyo ti tagtagainepko,” kinunana.

⁷“Addatayo kampay idi iti taltalon nga agrepreppet kadagiti trigo idi pagammoan timmakder ti rineppetko. Linikmut dagiti rineppetyo ti rineppetko ket nagruknoyda.”

⁸“Kayatmo a sawen nga agarikanto kadakami?” sinaludsod dagiti kakabsatna. “Iturayannakamto kadi?” Ad-adda manen ti pungtotda kenkuana gapu iti daytoy ken iti saona maipapan kadakuada.

⁹Nagtagtagainep manen ni Jose ket imbagana daytoy kadagiti kakabsatna. “Nagtagtagainepak manen,” kinunana. “Nakitak kampay idi ti init, ti bulan, ken sangapulo ket maysa a bituen nga agrukruknoy kaniak.”

¹⁰Sinaritana met ken ni Jacob ti tagtagainepna ngem inungtan ti amana. “Ania a tagtagainep dayta?” kinunana. “Kayatmo a sawen nga agruknoykamto iti sangoanam—dakami ken ni nanangmo ken dagiti kakabsatmo?”

¹¹Adda apas dagiti kakabsatna kenkuana ngem pinampanunot ni tatangna ti maipapan iti tagtagainep.

¹²Iti naminsan, adda dagiti kakabsat ni Jose idiay Sikem ket ipaspastorda dagiti arban ni amada.

¹³Kinuna ni Israel ken ni Jose, “Kayatko nga inka idiay Sikem ta ay-aywanan dagiti kakabsatmo dagiti arban sadiay.” “Sisasaganaak,” insungbat ni Jose.

¹⁴Imbaga pay ti amana, “Kitaem no nasayaat met la ti kasasaad dagiti kakabsatmo ken dagiti arban. Agawidka a dagus tapno maammoak.” Pinarubbuatan ni tatangna manipud iti tanap ti Hebron. Dimteng ni Jose idiay Sikem.

¹⁵Idi agpagnapagna iti away, adda lalaki a nakakita kenkuana ket sinaludsodna, “Ania ti sapsapulem?”

¹⁶Insungbat ni Jose, “Birbirokek dagiti kakabsatko a mangipaspastor kadagiti arbanda. Dimo la ammo no sadino ti yanda?”

¹⁷Kinuna ti lalaki, “Pimmanawda ditoyen. Nangngegko a kunada a mapanda idiay Dotan.” Sinurot ngarud ni Jose dagiti kakabsatna ket nasarakanna ida idiay Dotan.

¹⁸Adayo pay la bassit ni Jose idi makita dagiti kakabsatna. Ngem sakbay a makadanon iti yanda, nagtutulag dagiti agkakabsat ket inkeddengda a patayen ni Jose.

¹⁹“Adtoyen ti managtagtagainep,” kinunada iti tunggal maysa.

²⁰“Patayentayo ket itappuaktayo ti bangkayna iti maysa kadagiti bubon. Ibagatayo a pinatay ti atap nga animal. Kitaentay man no ania ti pagbanagan dagiti tagtagainepna.”

²¹Nangngeg ida ni Ruben ket kayatna nga isalakan ni Jose. “Saantayo a patayen,” kinunana.

²²“Itappuakyo laengen ditoy a bubon iti let-ang, ngem saanyo a dangran.” Panggepna ngamin nga isalakan ni Jose kadakuada sana pagsublien iti amana.

²³Idi makaasideg ni Jose, tinengngelda sada inuksob ti atiddog a pagan-anayna nga adda manggasna.

²⁴Kalpasanna, napanda intappuak ti adingda iti naatianan a bubon.

²⁵Madama a mangmangan dagiti agkakabsat idi makitada a sumungsungad ti maysa a bunggoy dagiti Ismaelita. Naggapuda idiay Galaad ket mapanda idiay Egipto. Awit dagiti kamelioda dagiti kargada a rekado ken bangbanglo.

²⁶Kinuna ni Juda kadagiti kakabsatna, “Ania ti magangganabtayo no patayentayo ti kabsattayo ket ilemmengtayo ti pannakapapatayna?

²⁷Ilakotayo laengen kadagiti Ismaelita ket saanen a masapul a dangrantayo, ta kabsattayo met.” Immanamong dagiti kakabsatna.

²⁸Idi makaasideg dagiti komersiante a Midianita, inyaon dagiti agkakabsat ni Jose iti bubon sada inlako kadakuada iti 20 a bagi ti pirak. Inkuyog dagiti Ismaelita ni Jose idiay Egipto.

²⁹Idi mapan ni Ruben iti bubon, awanen ni Jose ket rinay-abna ti pagan-anayna gapu iti napalalo a ladingitna.

³⁰Nagsubli iti ayan dagiti kakabsatna ket kinunana, “Awanen ti ubing! Ania ti aramidek?”

³¹Nangpatayda iti kalding sada impasagepsep ti darana iti kagay ni Jose.

³²Impanda ti kagay ken ni amada. Kinunada, “Nasarakanmi daytoy. Kitaenyo man no isu ti pagan-anay ti anakyo?”

³³Nabigbig ni Jacob ti pagan-anay ni Jose, ket kinunana, “Wen, kukua ni Jose daytoy. Ay, pinatay la ketdi ti narungsot nga animal ti anakko. Awan duadua a narangrangkayen ti bangkayna!”

³⁴Rinay-ab ni Jacob ti pagan-anayna sa nagkawes iti nakersang a lupot. Adu nga aldaw a dinung-awanna ti anakna.

³⁵Napan liniwliwa dagiti amin nga annakna ngem saan a nagsardeng ti panagladingitna. Kinunana, “Matayak nga agladladingit gapu iti pannakapukaw ti anakko.” Intultuloyna ti panagladingitna gapu ken ni Jose nga anakna.

³⁶Kabayatanna, idiay Egipto, inlako dagiti Midianita ni Jose. Inlakoda ken ni Potifar, maysa kadagiti ofisiales ti ari ken kapitan dagiti guardia ti palasio.