Read Iloko Genesis 38 Bible Online

Genesis 38 - Iloko bible

Genesis 38

¹Iti dayta a tiempo, simmina ni Juda kadagiti kakabsatna ket napan nakipagnaed iti maysa a lalaki nga agnagan iti Hiran idiay Adullam.

²Sadiay, naam-ammo ni Juda ti maysa a Cananea. Sua ti nagan ti ama ti babai. Inasawa ni Juda ti Cananea.

³Naaddaanda iti tallo nga annak. Er ti impanagan ni Juda iti inauna;

⁴Onan ti maikadua ken Sela ti maikatlo.

⁵Adda idi ni Juda idiay Akzib idi mayanak ni Sela.

⁶Impaasawa ni Juda ni Er nga inauna nga anakna iti maysa a babai nga agnagan Tamar.

⁷Dakes ti kababalin ni Er. Saan a naragsakan ni Yahweh kenkuana ket pinatayna ni Er.

⁸Kinuna ni Juda ken ni Onan, “Inka kaiddaen ti balo nga ipagmo. Aramidem ti pagrebbengam kenkuana kas kabsat ti natay nga asawana tapno maaddaan iti kaputotan daydi kabsatmo.”

⁹Ngem ammo ni Onan a dinto maibilang nga annakna dagiti maiputotna, isu nga idi nagkaiddada iti ipagna, imbellengna ti kissitna iti daga tapno saan nga agsikog ti asawa daydi kabsatna.

¹⁰Saan a naragsakan ni Yahweh iti inaramid ni Onan isu a pinatayna.

¹¹Kinuna ni Juda ken ni Tamar a manugangna, “Agsublika pay laeng idiay balayyo, ket dika makias-asawa agingga a makadakkel ni Sela a buridekko.” Imbagana daytoy ta mabuteng amangan no matay met ni Sela a kas kadagiti kakabsatna. Iti kasta, nagawid ni Tamar iti balay ni amana.

¹²Naglabas dagiti tawen. Natay ti asawa ni Juda ket idi nalpasen ti tiempo a panagdung-awna, napan idiay Timnat a pakapukpukisan dagiti karnerona. Kaduana ni Hira a gayyemna.

¹³Naipadamag ken ni Tamar, “Mapan ni katugangam idiay Timnat tapno pukisanna dagiti karnerona.”

¹⁴Sinukatan ngarud ni Tamar ti pagan-anayna a kas balo, inabungotanna ti rupana sa napan nagtugaw iti ruangan a sumrek iti Enaim, maysan nga ili iti dalan nga agturong idiay Timnat. Ammona a maysa a baro ni Sela nga inaudi nga anak ni Juda, ngem saan pay nga impaasawa kenkuana ti katuganganna.

¹⁵Idi makita ni Juda, impagarupna a balangkantis ni Tamar ta naabungotan ti rupana.

¹⁶Inasitganna ti babai iti igid ti dalan ket kinunana, “Umayka ta agkaiddata.” (Dina ammo nga isu ti manugangna.) “Ania ti itedmo kaniak?” sinaludsod ti babai.

¹⁷“Ikkankanto iti urbon a kalding nga aggapu iti arbanko,” insungbat ni Juda. Immanamong ti babai a kunana, “Ala, wen, no la ket mangibatika iti pakakitaan a mangtedkanto kaniak iti kalding.”

¹⁸“Ania ti kayatmo nga ibatik?” sinaludsod ni Juda. “Ti singsing ken ti barikesmo agraman ti bastonmo,” insungbatna. Inted ni Juda ti dawdawaten ti babai ket nagkaiddada. Nagsikog ni Tamar.

¹⁹Nagawid ti babai, inikkatna ti dalungdongna sana inkawes ti pagan-anayna a kas balo.

²⁰Imbaon ni Juda ni Hira a gayyemna a mangipan iti kalding ken mangala kadagiti imbatina. Ngem saanna a nasarakan ti babai.

²¹Sinaludsod ni Hira kadagiti lallaki idiay Enaim, “Ayan ti balangkantis a babai nga adda idi iti igid ti dalan?” Kinunada, “Awan a pulos ti balangkantis iti daytoy a lugar.”

²²Nagsubli ni Hira ken ni Juda. Kinunana, “Diak nasarakan ti babai. Imbaga dagiti taga-sadiay a ni kaanoman awan ti balangkantis a babai iti lugarda.”

²³Kinuna ni Juda, “Bay-am nga idulinna dagiti imbatik a pakakitaan ti karik kenkuana amangan no katkatawaandata dagiti tattao. Uray ta inkagumaak a bayadan, ngem dimo met nasarakan ti babai.”

²⁴Kalpasan ti tallo a bulan, adda nangibaga ken ni Juda a masikogen ti manugangna. “Nagbalangkantis ngamin ni Tamar,” kinunada. Imbilin ni Juda, “Inkayo alaen sayo puoran a sibibiag.”

²⁵Kabayatan ti panangiruarda ken ni Tamar, pinaibagana iti katuganganna: “Ti akinkukua kadagitoy ti nangsikog kaniak. Kitaem no siasino ti akinkukua iti daytoy a singsing, daytoy a barikes ken daytoy a baston.”

²⁶Nabigbig ni Juda dagiti imbatina ket kinunana, “Awan basol ti babai. Siak ti nakabasol. Diak tinungpal ti pagrebbengak kenkuana—impaasawak met la koma kenkuana ni Sela nga anakko.” Saanen a kinaidda ni Juda ti babai.

²⁷Idi dumteng ti panagpasngay ni Tamar, singin ti sikogna.

²⁸Bayat ti panagpasikalna, rimmuar ti ima ti maysa kadakuada ket ginalutan ti partera iti nalabaga a sinulid tapno adda pakakitaan no sinno ti immuna a nayanak.

²⁹Ngem inyuneg ti maladaga ti imana ket ti kasinginna ti immuna a nayanak. “Nakiinnunnaka a rimmuar,” kinuna ti partera. Isut' gapuna a napanaganan ti maladaga iti Perez.

³⁰Naudi a nayanak ti nagalutan ti imana iti nalabaga a sinulid ket napanaganan iti Zera.