Read Iloko Genesis 39 Bible Online

Genesis 39 - Iloko bible

Genesis 39

¹Inkuyog dagiti Ismaelita ni Jose idiay Egipto. Idi dumtengda sadiay, inlakoda ni Jose iti maysa kadagiti ofisiales ti ari, ni Potifar a kapitan dagiti guardia ti palasio.

²Nagserbi ni Jose iti balay ti apona nga Egipcio. Tinultulongan ni Yahweh ket nagballigi iti aniaman nga aramidenna.

³Nadlaw ti apona nga adda ni Yahweh ken ni Jose.

⁴Naay-ayo ni Potifar kenkuana, ket pinagbalinna a katalek iti balay ken mangaywan iti amin a sanikuana.

⁵Manipud idin, binendisionan ni Yahweh ti entero a balay ti Egipcio gapu ken ni Jose. Rimmang-ayda a sangakabbalayan ket immadu ti apit iti talonna.

⁶Intalek ni Potifar ti amin ken ni Jose. Awanen ti pakaringgoran ni Potifar, malaksid ti taraon a kanenna. Nabaked ken naguapo ni Jose.

⁷Iti saan a mabayag, nakayawan kenkuana ti asawa ni Potifar. Ginargari ti babai nga agkaiddada.

⁸Nagkedked ni Jose, ket kinunana, “Kitaem, awan ti pakaringgoran ni apok iti balay ta addaak ditoy. Intalekna ti amin a kukuana iti aywanko.

⁹Adda turayko a kas kenkuana iti daytoy a balay. Sika laeng ti dina intalek kaniak ta asawanaka. Kasano ngarud nga aramidek ti kasta a kinadakes, ket agbasolak iti Dios?”

¹⁰Saan nga inkaskaso ni Jose ti inaldaw a pananggargari kenkuana ti babai.

¹¹Ngem iti maysa nga aldaw, idi napan ni Jose iti balay tapno aramidenna ti trabahona, nairana nga awan sadiay dagiti dadduma a babaonen.

¹²Pagammoan, ginuyod ti babai ket kinunana, “Kaiddaennak!” Nagtaray a rimmuar ni Jose ngem naigawid ti babai ti kagayna.

¹³Idi makita ti babai a nabati ni Jose ti kagayna, nagtaray a rimmuar iti balay,

¹⁴pinukkawanna dagiti babaonenna iti balay, ket kinunana, “Kitaenyo, ibabainnatayo daytoy a Hebreo nga insangpet ti asawak. Simrek iti kuartok, ket kayatnak a ramesen, ngem nagikkisak.

¹⁵Iti pannakangngegna iti ikkisko, nagtaray a rimmuar ket nabatina ti kagayna iti abayko.”

¹⁶Indulin ti babai ti kagay ni Jose. Idi sumangpet ti apo ni Jose,

¹⁷inulitna kenkuana ti imbagana kadagiti babaonenna. “Simrek iti kuartok dayta Hebreo a tagabu nga inyegmo ditoy, ket kayatnak a kaiddaen,” kinunana.

¹⁸“Ngem idi nagikkisak, nagtaray a rimmuar ket nabatina ti kagayna iti abayko.”

¹⁹Kasta unay ti pungtot ni Potifar.

²⁰Pinatiliwna ni Jose sana pinaipupok iti pagbaludan nga ayan dagiti balud ti ari. Sadiay ti nagyanan ni Jose.

²¹Ngem saan a binaybay-an ni Yahweh. Binendisionanna ni Jose, isu a nagbalin a nasayaat kenkuana ti guardia ti pagbaludan.

²²Pinagbalinna a mangimaton kadagiti dadduma a balud ken mangidaulo iti amin nga aramid iti pagbaludan.

²³Saan a nakibiang ti guardia ti aniaman a naipaannong ken ni Jose ta ammona a kaduana ni Yahweh, ket tultulonganna ni Jose iti amin nga aramidna.