Read Iloko Genesis 4 Bible Online

Genesis 4 - Iloko bible

Genesis 4

¹Kinaidda ni Adan ni Eva nga asawana ket nagsikog ti babai. Nangipasngay iti lalaki ket kinunana, “Babaen iti tulong ti Apo, naaddaanak iti anak.” Iti kasta, pinanagananna iti Cain.

²Iti saan a nabayag, nangipasngay iti sabali nga anak a lalaki, ni Abel. Nagbalin ni Abel nga agpaspastor, ngem nagbalin a mannalon ni Cain.

³Naglabas ti tiempo. Nangala ni Cain kadagiti apitna ket indatagna a kas daton ken ni Yahweh.

⁴Innala ni Abel ti inauna nga anak ti maysa kadagiti karnerona. Pinartina sana indaton dagiti kasayaatan a paset. Naragsakan ni Yahweh ken ni Abel ken iti datonna

⁵ngem linaksidna ni Cain ken ti datonna. Kasta unay ti pungtot ni Cain ket uray la nagrupanget.

⁶Kinuna ni Yahweh ken ni Cain, “Apay nga agpungtotka? Apay a kasta ti rupam?

⁷No naimbag ti inaramidmo, umis-isemka koma. Ngem gapu ta nagaramidka iti dakes, mayarig ti basol iti demonio nga agur-uray a mangkemmeg kenka. Kayatnaka nga iturayan ngem masapul a parmekem.”

⁸Kinuna ni Cain ken ni kabsatna nga Abel, “Intan agpassiar idiay away!” Idi addada iti away, dinuklos ni Cain ti kabsatna ket pinatayna.

⁹Sinaludsod ni Yahweh ken ni Cain, “Sadino ti ayan ni Abel a kabsatmo?” “Diak ammo,” insungbatna. “Apay, siak aya koma ti mangay-aywan iti kabsatko?”

¹⁰Ket kinuna ni Yahweh, “Apay a kasta ti inaramidmo? Um-umkis kaniak ti dara ti kabsatmo manipud iti daga ket dumawdawat iti panagibales.

¹¹Mailunodka ket dimon mabalin a talonen daytoy a daga, ta inungapna ti ngiwatna a nangawat iti dara ni kabsatmo idi pinataymo.

¹²No mulaam ti daga, awanto ti maapitmo. Awanto ti masnop a pagtaengam ket agalla-allakanto iti daga.”

¹³Ket kinuna ni Cain ken ni Yahweh, “Nadagsen unay kaniak daytoy a pannusa.

¹⁴Ita ta pinagtalawnakon iti daytoy a daga tapno adayoak iti imatangmo, agkalkallautang ken agalla-allaakto. Papatayennakto ti siasinoman a makakita kaniak.”

¹⁵Ngem insungbat ni Yahweh, “Saan a mapasamak dayta. No addanto mangpatay kenka, maibalesto kenkuana iti mamimpito.” Iti kasta, nangikabil ni Yahweh iti marka ken ni Cain tapno mapakdaaran ti siasinoman a saan a rumbeng a papatayenna.

¹⁶Pimmanaw ngarud ni Cain iti imatang ni Yahweh ket napan nagnaed iti daya ti Eden, iti lugar a maaw-awagan iti Nod.

¹⁷Naaddaan ni Cain ken ti asawana iti anak a lalaki a pinanagananda iti Enoc. Nangbangon ni Cain iti siudad sana impanagan iti anakna.

¹⁸Adda anak ni Enoc a napanaganan iti Irad. Isu ti ama ni Mehujael nga ama ni Metusael nga ama ni Lamec.

¹⁹Dua ti assawa ni Lamec, da Ada ken Zilla.

²⁰Impasngay ni Ada ni Jabal. Ni Jabal ti kapuonan dagiti agpaspastor ket agnaedda kadagiti tolda.

²¹Kabsatna ni Jubal a kapuonan ti amin nga tumutokar iti arpa ken flauta.

²²Inyanak ni Zilla ni Tubal Cain a nagaramid kadagiti amin a kita ti alikamen a bronse ken landok. Ni Naama ti babai a kabsat ni Tubal Cain.

²³Kinuna ni Lamec kadagiti assawana, “Ada ken Zilla, denggendak. Adda lalaki nga agtutubo a pinatayko. Kinabilnak isut' gapuna nga inuloyak.

²⁴No pito a biag ti maipatli a kas sukat ti biag ni Cain, pitopulo ket pito a biag ti maipatli no patayendak.”

²⁵Naaddaan ni Adan ken ti asawana iti sabali nga anak a lalaki. Kinuna ti asawana, “Pinaraburannak ti Dios iti anak a sukat ni Abel a pinatay ni Cain.” Ngarud, pinanagananna iti Set.

²⁶Naaddaan ni Set iti anak a lalaki a pinanagananna iti Enos. Iti dayta a tiempo, rinugian dagiti tattao nga aramaten ti nagan ni Yahweh iti panagdaydayawda.