Read Iloko Genesis 40 Bible Online

Genesis 40 - Iloko bible

Genesis 40

¹Iti saan a mabayag, adda saan a nasayaat nga inaramid dagiti dua a babaonen ti ari ti Egipto, isuda nga agiserserbi iti arak ken ti pangulo a panadero iti apoda nga ari ti Egipto.

²Nakapungtot ti Faraon kadagitoy dua nga ofisiales

³ket pinaipupokna iti balay dagiti guardia. Ditoy met laeng ti nakaipupokan ni Jose.

⁴Ni Jose ti dinutokan ti kapitan a mangasikaso kadagiti kasapulanda ket nabayag a nagtalinaedda sadiay.

⁵Iti maysa a rabii, iti uneg ti pagbaludan, nagtagtagainep dagitoy dua nga ofisiales. Agduma ti kaipapanan ti tagtagainepda.

⁶Kabigatanna, idi mapan agserbi kadakuada ni Jose, nadlawna nga adda pakariribukanda

⁷ket dinamagna no ania ti pakadanaganda.

⁸“Ammom,” kinunada. “Adda natagtagainepmi idi rabii ngem awan man la ditoy ti makailawlawag iti kaipapanan dagitoy.” Kinunana ni Jose, “Ti Dios laeng ti makailawlawag iti kaipapanan dagiti tagtagainep. Ibagayo kaniak dagiti tagtagainepyo.”

⁹Sinarita ngarud ti para-serbi iti arak ti tagtagainepna, “Adda kampay idi sangapuon nga ubas iti sangoanak.

¹⁰Tallo ti sangana. Apaman a nagbulong, nagbusel ket dagus metten a nagluom dagiti bungana.

¹¹Ig-iggamak idi ti baso ti ari, isu a pinurosko dagiti ubas ket pinespesko ida iti baso sako inted iti Faraon.”

¹²Kinuna ni Jose, “Kastoy ti kaipapanan ti tagtagainep: Tallo nga aldaw ti kayat a sawen dagiti tallo a sanga.

¹³Tallo nga aldaw manipud ita, wayawayaannaka ti ari, pakawanennaka, ket isublinaka iti sigud a saadmo. Sikanto ti para yawat iti basona a kas iti ar-aramidem idi.

¹⁴Ngem pangngaasim ta laglagipennak inton nasayaaten ti kasasaadmo. Isarsaritanakto koma iti ari, ket tulongannak a rummuar iti daytoy a pagbaludan.

¹⁵Kinapudnona, naitalawak iti daga dagiti Hebreo, ket uray ita nga addaak ditoy Egipto, awan ti ammok a naaramidko a nakaibaludak.”

¹⁶Idi makita ti pangulo a panadero a naimbag ti kaipapanan ti tagtagainep ti pangulo dagiti agserserbi iti arak, kinunana ken ni Jose, “Nagtagtagainepak met. Nakasusuonak kampay idi iti tallo a basket ti tinapay.

¹⁷Iti akingngato a basket, adda amin a kita ti tinapay a maipaay iti ari, ngem tuktoktoken ida dagiti tumatayab.”

¹⁸Kinuna ni Jose, “Kastoy ti kaipapanan ti tagtagainep: Tallo nga aldaw ti kayat a sawen ti tallo a basket.

¹⁹Tallo nga aldaw manipud ita, wayawayaannakanto ti ari sanakanto paputolan. Paibitinnanto ti bangkaymo iti kayo ket tuktoktokento dagiti tumatayab.”

²⁰Kasangay ti ari iti maikatlo nga aldaw, ket nangipaay iti maysa a padaya para kadagiti amin nga ofisialesna. Winayawayaanna ti agiserserbi iti arak ken ti pangulo a panadero, ket indatagna ida kadagiti ofisialesna.

²¹Insublina ti agiserserbi iti arak iti sigud a trabahona,

²²idinto a pinabitayna ti pangulo a panadero. Napasamak amin nga imbaga ni Jose.

²³Ngem saan a nalagip ti agiserserbi iti arak ni Jose. Nalipatanna a namimpinsan ni Jose.