Read Iloko Genesis 41 Bible Online

Genesis 41 - Iloko bible

Genesis 41

¹Limmabas ti dua a tawen. Natagtagainep ti ari ti Egipto nga agtaktakder kampay iti igid ti Karayan Nile

²idi pagammoan timmakdang ti pito a napipintas ken nalulukmeg a baka, ket rinugianda ti nagarab.

³Madamdama, timmakdang met ti sabali a pito a baka; nakukuttong ken nakaparparagpagda. Inasitganda dagiti nalulukmeg a baka iti igid ti karayan

⁴sada inalun-on ida. Ket nakariing ti ari.

⁵Nakaturog manen ti ari, ket adda sabali a tagtagainepna. Adda kampay idi pito a nabagas ken natangkenan a dawa a nagtaud iti maymaysa a puon.

⁶Iti isu met la a puon, nagtubo met ti sabali a pito a dawa nga eppes ken nagango gapu ta nalanetda iti angin-daya.

⁷Inalun-on dagiti eppes a dawa dagiti nabagas ken natangkenan a dawa. Nakariing ti ari ket nabigbigna nga agtagtagainep la gayam.

⁸Kabigatanna, nariribuk ti ari, isu a pinaayabanna dagiti amin a salamangkero ken mamasirib iti Egipto. Sinaritana kadakuada dagiti natagtagainepna, ngem awan ti makailawlawag ti kaipapananda.

⁹Iti kasta, kinuna ti manarawidwid kadagiti para-serbi iti arak, “Natan-ok nga ari, masapul nga ipudnok ita nga aldaw nga adda saan a naimbag nga inaramidko.

¹⁰Idi nakapungtotka kadakami—siak ken ti pangulo a panadero—pinaibaludnakami iti balay ti kapitan dagiti guardia.

¹¹Iti maysa a rabii, nagtagtagainepkami a dua, ket agduma ti kaipapanan dagiti tagtagainepmi.

¹²Adda agtutubo a Hebreo a tagabu ti kapitan a kaduami iti pagbaludan. Imbagami kenkuana dagiti tagtagainepmi, ket imbagana ti kaipapananda.

¹³Naaramid amin nga imbagana: insublinak iti saadko, ngem pinabitaymo ti panadero.”

¹⁴Pinaayaban ti ari ni Jose. Apaman a nairuar iti pagbaludan, nagibarbas sa nagsukat iti pagan-anay ket dimmatag iti ari.

¹⁵“Nagtagtagainepak,” kinuna ti ari ken ni Jose, “ngem awan ti makaibaga iti kaipapanan ti tagtagainepko. Naibaga kaniak a nalaingka kano a mangipatarus iti tagtagainep.”

¹⁶Insungbat ni Jose, “Saan a siak ti mangibaga, Natan-ok nga Ari, ngem ti Dios ti mangted iti nasayaat a sungbat.”

¹⁷Imbaga ti ari dagiti tagtagainepna: “Agtaktakderak kampay idi iti igid ti Karayan Nile

¹⁸idi pagammoan, timmakdang ti pito a napipintas ken nalulukmeg a baka ket rinugianda ti nagarab iti karuotan.

¹⁹Timmakdang met ti sabali a pito a baka a nakukuttong ken nakaparparagpag. Isuda ngatan ti kalaadan a baka a nakitak iti entero nga Egipto.

²⁰Inalun-on dagiti nakuttong a baka dagiti nalulukmeg a baka,

²¹ngem awan ti nagbaliwanda ta kulay-ong latta ti tianda. Kalpasanna, nakariingak.

²²Nakaturogak manen ket natagtagainepko pay ti pito a nabagas ken natangkenan a dawa a nagrusing iti maymaysa a puon.

²³Iti dayta met la a puon, nagrusing ti sabali a pito a dawa ngem eppes ken nagangoda gapu iti angin ti let-ang.

²⁴Inalun-on dagiti eppes a dawa dagiti nabagas. Imbagak ti tagtagainepko kadagiti salamangkero ngem awan ti makaibaga iti kaipapananda.”

²⁵Kinuna ni Jose, “Natan-ok nga ari, maymaysa ti kaipapanan dagiti dua a tagtagainep. Impaltiing kadakayo ti Dios ti dandanina aramiden.

²⁶Pito a tawen ti kaipapanan dagiti pito a nalulukmeg a baka ken ti pito a nabagas a dawa. Agpada ti kayatda a sawen.

²⁷Pito a tawen ti bisin ti kaipapanan dagiti simmaruno a pito a nakukuttong a baka ken dagiti pito a dawa nga eppes ken nagango gapu iti angin ti let-ang.

²⁸Kas imbagak, impaltiing ti Dios ti aramidenna iti mabiit.

²⁹Addanto pito a tawen ti kinawadwad iti entero a daga ti Egipto.

³⁰Sumarunonto met ti pito a tawen ti panagbisin ngem malipatanto dagiti amin a tawen ti kinawadwad iti entero a daga ti Egipto gapu ta madadaelto ti pagilian gapu iti bisin.

³¹Malipatanto a mamimpinsan ti tiempo ti kinabuslon ta nakaronto unay ti sumaruno a bisin.

³²Naulit ti tagtagainep, natan-ok nga ari, tapno maipakaammo nga inkeddeng daytoy ti Dios ket asidegen ti pannakapasamakna.

³³“Ita, masapul nga agbirokkayo iti masirib ken nasaririt a tao ket isaadyo a mangituray iti Egipto.

³⁴Mangdutokkayo met kadagiti dadduma nga ofisiales ket pakolektayo ti apagkalima iti apit bayat ti pito a tawen ti kinawadwad.

³⁵Masapul a maurnong ti amin a taraon iti dayta a panawen, maipempenda iti sarusar iti tunggal siudad ket maguardiaanda a naimbag.

³⁶Reserbanto dagitoy a taraon nga agpaay iti pagilian bayat ti pito a tawen ti bisin a dumtengto iti Egipto tapno saan a matay iti bisin dagiti tattao.”

³⁷Inanamongan ti ari ken dagiti ofisialesna ti singasing ni Jose

³⁸ket kinunana kadakuada, “Makasaraktayo pay aya iti kas ken ni Jose nga addaan iti espiritu ti Dios?” Ket kinunana ken ni Jose,

³⁹“Yantangay ta impakita amin ti Dios kenka dagitoy, awanen ti kas kenka a masirib ken nasaririt.

⁴⁰Isaadka a mangituray iti pagiliak ket tungpalendakanto dagiti amin a tattao. Sika laeng ti sumaruno kaniak iti kinaturay.

⁴¹Dutokankan a gobernador iti entero nga Egipto.”

⁴²Inikkat ti ari ti singsingna a nakitikitan iti marka ti pagarian ket inyusongna iti ramay ni Jose. Kinawesanna ni Jose iti linen a pagan-anay sana inukkoran iti balitok a kuentas.

⁴³Intedna ti maikadua a lugan ti palasio ken inikkanna iti guardia a mangipukkaw tunggal aramatenna ti lugan, “Waknitanyo ti dalan!” Ket nadutokan ni Jose a kas gobernador iti entero nga Egipto.

⁴⁴Kinuna ti ari, “Siak ti ari—ngem awan ti siasinoman iti Egipto ti makaaramid iti aniaman no awan ti pammalubosmo.”

⁴⁵Inikkanna ni Jose iti baro a nagan—Zafenat Panea—a nagan ti Egipcio. Inyasawana kenkuana ni Asenat nga anak ni Potifera a padi iti On.

⁴⁶Agtawen ni Jose iti tallopulo idi mangrugi nga agserbi iti ari ti Egipto. Pimmanaw iti palasio ket sinursorna ti entero a pagilian.

⁴⁷Bayat ti pito a tawen ti kinawadwad, nalabon ti apit iti daga.

⁴⁸Inurnong ni Jose ti amin a makan ket impempenna kadagiti siudad. Adda sarusar iti tunggal siudad, ket ditoy ti nakaikabilan dagiti trigo a naapit kadagiti talon iti likmutda.

⁴⁹Nakaad-adu ti apit nga irik. Mayarig ti kaaduda iti darat ti baybay. Idi agangay, insardeng ni Jose ti nagsukat gapu iti kaaduda.

⁵⁰Sakbay a dimteng ti panagbisin, duan ti annak a lallaki da Jose ken Asenat.

⁵¹Kinuna ni Jose, “Tinulongannak ti Dios a manglipat iti amin a rigatko ken amin a kameng ti familia ni amak.” Iti kasta, pinanagananna ti inauna iti Manases.

⁵²Kinunana pay, “Inikkannak ti Dios iti annak iti daga a nagtuokak.” Iti kasta, pinanagananna ti maikadua iti Efraim.

⁵³Naggibus dagiti pito a tawen ti kinawadwad a sinagrap ti Egipto

⁵⁴ket nangrugi ti pito a tawen ti panagbisin, kas imbaga ni Jose. Adda taraon iti entero nga Egipto idinto nga adda panagbisin kadagiti sabali a pagilian.

⁵⁵Idi awanen ti kanen dagiti umili, immasugda iti ari a maikkanda iti taraon. Imbagana kadakuada, “Inkayo ken ni Jose ket tungpalenyo ti ibagana.”

⁵⁶Nagsaknap ti panagbisin iti entero a pagilian. Linuktan ni Jose dagiti amin a pagiduldulinan iti taraon ket naglako iti irik kadagiti Egipcio. Kimmaro a kimmaro ti panagbisin.

⁵⁷Iti amin a lugar, kimmaro ti kasta a kasasaad agingga a napan dagiti tattao iti entero a lubong idiay Egipto tapno gumatangda iti irik ken ni Jose.