Read Iloko Genesis 42 Bible Online

Genesis 42 - Iloko bible

Genesis 42

¹Idi maammoan ni Jacob nga adda irik idiay Egipto, kinunana kadagiti annakna, “Ania ti kukuaenyo? Apay a dikayo agtignay?

²Nadamagko nga adda makan idiay Egipto. Inkayo gumatang sadiay iti kanentayo tapno ditayo matay iti bisin.”

³Napan ngarud idiay Egipto dagiti sangapulo a lallaki a kakabsat ni Jose tapno gumatangda iti makan sadiay.

⁴Saan nga impakuyog ni Jacob ni Benjamin a kabsat ni Jose gapu ta mabuteng amangan no adda dakes a mapasamak kenkuana.

⁵Malaksid kadagiti annak ni Jacob, adda pay sabsabali a tattao a napan idiay Egipto tapno gumatangda iti makan. Nagwaras ngaminen ti panagbisin iti entero a Canaan.

⁶Kas gobernador ti Egipto, naglako ni Jose iti makan kadagiti amin a tattao ti lubong. Iti kasta, isu ti napanan dagiti kakabsatna. Idi umasidegda kenkuana, nagpaklebda iti sangona a kas pammadayaw kenkuana.

⁷Nabigbigna ida ngem nagparang a kasla dina am-ammo ida. Sigugubsang a nangsaludsod, “Sadino ti naggapuanyo?” “Taga-Canaankami,” kinunada. “Umaykami gumatang iti taraon.”

⁸Nailasin ida ni Jose ngem saan a nairupaan dagiti kakabsatna.

⁹Nalagipna dagiti tagtagainepna maipapan kadakuada ket kinunana, “Espiakayo, ania? Immaykayo ditoy tapno ammoenyo ti pagkapsutan ti pagilianmi.”

¹⁰“Saankami nga espia, apo,” insungbatda. “Immaykami, dakami nga adipenmo, a gumatang iti taraon.

¹¹Agkakabsatkami ket mapagtalkankami a tattao.”

¹²Kinuna ni Jose kadakuada, “Wen, espiakayo. Immayyo kitaen no ania ti pagkapuyan ti pagilianmi.”

¹³“Sangapulo ket duakami a lallaki nga agkakabsat,” insungbatda. “Maymaysa ti amami ket agnaed iti daga ti Canaan. Natayen ti maysa a kabsatmi. Nagbati ti inaudi a kabsatmi iti ayan ni tatangmi.”

¹⁴“Pudno la ketdi ti kunak,” kinuna ni Jose. “Espiakayo.

¹⁵Kastoy ti pannakapadasyo: Isapatak iti nagan ti ari a dikay makapanaw no diyo yeg ditoy ti inaudi a kabsatyo.

¹⁶Ibaonyo ti maysa kadakayo a mapan mangala kenkuana. Maibalud ti dadduma agingga a diyo mapaneknekan a pudno ti saoyo. Ta no saan, iti nagan ti ari, pudno nga espiakayo.”

¹⁷Tallo nga aldaw a pinaibalud ni Jose dagiti kakabsatna.

¹⁸Iti maikatlo nga aldaw, kinunana kadakuada, “Managbutengak iti Dios ket ispalek ti biagyo iti maysa laeng a kondision.

¹⁹Saan kadi met nga imbagayo a mapagtalkankayo? Ala, paneknekanyo man ngarud? Maysa laeng kadakayo ti mabalud. Agawid ti dadduma kadakayo tapno ipanda ti taraon a ginatangyo kadagiti mabisin a familiayo.

²⁰Ngem masapul nga agsublikayo a dagus a kaduayo ti inaudi a kabsatyo. Daytoy ti pakaammoak a pudno ti ibagbagayo ket iti kasta, saankayo a maan-ano.” Immanamong dagiti agkakabsat.

²¹Kalpasanna, kinuna ti maysa ken maysa iti pagsasaoda, “Wen, nakabasoltayo iti inaramidtayo iti kabsattayo. Nakitatayo ti rigatna idi agpakpakaasi kadatayo ngem ditay naasian. Daytoy ti gapuna a maparparigattayo itan.”

²²Kinuna ni Ruben, “Dayta ket ti kunak idi kadakayo—diyo dangran ti ubing ngem didak impangag. Ita, maibalbales kadatayo ti ipapatayna.”

²³Dida ammo a maawatan ni Jose ti sarsaritaenda, agsipud ta no makisasao kadakuada, adda mangipatarus iti sawenda.

²⁴Pinanawan ida ni Jose ta saanna a magawidan ti panagsangitna. Idi nagkalma ti riknana, nagsubli iti ayanda. Innalana ni Simeon sana pinareppet iti sangoananda.

²⁵Imbilin ni Jose a makargaan iti irik dagiti sako dagiti agkakabsat ken maisubli ditoy ti kuarta nga inggatangda. Pinaikkanna pay ida iti kanenda iti dalan. Naaramid ti amin a bilinna.

²⁶Inkarga dagiti agkakabsat dagiti ginatangda nga irik kadagiti asnoda sada pimmanaw.

²⁷Idi dumteng ti rabii, nagsardengda iti maysa a lugar tapno aginanada. Maysa kadakuada ti nanglukat iti sakona tapno pakanenna ti asnona. Nakitana ti kuarta iti uneg ti sako.

²⁸“Naisubli ti kuartak!” imbagana kadagiti kakabsatna. “Adda ditoy sako.” Nagtibbayo ti barukong dagiti agkakabsat. Iti siddaaw ken butengda, kinunada iti tunggal maysa, “Ania ti inaramid ti Dios kadatayo?”

²⁹Idi sumangpetda idiay Canaan, sinaritada ken ni Jacob nga amada ti amin a napasamak kadakuada.

³⁰“Nagubsang nga agsasao ti gobernador ti Egipto,” kinunada. “Pinabasolnakami ketdin nga agsisiimkami iti pagilianna.

³¹Imbagami a mapagtalkankami a tattao ket saankami nga espia.

³²Impudnomi kenkuana a sangapulo ket duakami nga agkakabsat ket maymaysa ti tatangmi. Imbagami a natayen ti maysa a kabsatmi ket nabati ti buridek ditoy Canaan.

³³Kinuna ti gobernador: ‘Kastoy ti pakaammoak no mapagtalkankayo met laeng. Maysa ti agbati kaniak. Agawid ti dadduma tapno isangpetda ti irik kadagiti mabisin a familiayo.’

³⁴Ngem nainget ti bilinna nga agsublikami a kaduami ti inaudi a kabsatmi, kas pakakitaan a pudno ti sasawenmi. No tungpalenmi daytoy, inkarina a wayawayaan ni Simeon ket palubosannakami nga agnaed ken agnegosio iti pagilianna.”

³⁵Idi imbukbokda ti karga dagiti sakoda, nasarakan ti tunggal maysa ti kuartana iti bukodna a supot. Nagbuteng dagiti agaama a nakakita kadagiti kuarta.

³⁶Kinuna ti amada, “Kayatyo kadi a mapukawko ti amin nga annakko? Awanen ni Jose. Awan metten ni Simeon. Ita, kayatyo manen nga ipanaw ni Benjamin. Siak ti agsagaba.”

³⁷Kinuna ni Ruben iti amana, “No diak isubli kenka ni Benjamin, mabalinmo a patayen dagiti dua nga annakko a lallaki. Italekmo kaniak ni Benjamin ket isublikto met la kenka.”

³⁸Ngem kinuna ni Jacob, “Saan a mabalin a kumuyog kadakayo ti anakko. Natayen ti kabsatna ket isu laengen ti nabati. Iti daytoy a kinalakayko, matayak la ketdi iti ladingit no adda mapasamak kenkuana iti dalan.”