Read Iloko Genesis 43 Bible Online

Genesis 43 - Iloko bible

Genesis 43

¹Dimmegdeg ti panagbisin idiay Canaan.

²Idi maibusen ti taraon a ginatangda idiay Egipto, kinuna ti amada kadakuada, “Agsublikayo ket gumatangkayo iti sangkabassit a kanentayo.”

³Kinuna ni Juda, “Nainget ti panangballaag kadakami ti lalaki a dikam agparparang kenkuana no dimi itugot ti inaudi a kabsatmi.

⁴No ipalubosmo nga ikuyogmi ti kabsatmi, inkam gumatang iti taraon nga agpaay kenka.

⁵No madika, saankami a mapan gapu ta kinuna ti lalaki a dikam agparparang kenkuana no dimi ikuyog ti kabsatmi.”

⁶Kinuna ni Israel, “Apay nga inikkandak iti parikut? Apay nga imbagayo pay laeng nga adda pay sabali a kabsatyo?”

⁷Insungbatda, “Damag la ngamin a damag ti lalaki iti maipapan kadakami ken iti familiatayo. Dinamagna no sibibiagka pay ken no adda pay sabali a kabsatmi. Kasapulan a sungbatanmi dagiti saludsodna. Dimi impagarup a paalana kadakami ti kabsatmi.”

⁸Kinuna ni Juda ken ni tatangna, “Ipakuyogmo kaniak ti ubing ket agrubbuatkamin a mapan tapno awanto kadatayo ti matay iti bisin.

⁹Sungbatak ti biagna. Siak ti makaammo kenkuana. No diak maisubli kenka a sikakaradkad, agnanayonto a siak ti mangibaklay iti pammabasol.

¹⁰No dikam nataktak, nakapankami koman ket nakapaminduakami payen a nagsubli.”

¹¹Kinuna ni Israel kadakuada, “No nasken a dayta ti masurot, mangalakayo ngarud kadagiti kasayaatan a bunga ti daga nga isagutyo iti gobernador: sangkabassit a resina, sangkabassit a diro, rekado, piniones, ken almendras.

¹²Doblienyo met ti kaadu ti kuarta nga itugotyo ta isubliyo daydi inkabilda iti supotyo. Nalabit a nagbiddutda a nangikabil.

¹³Alaenyo ti kabsatyo, ket inkayon.

¹⁴Sapay koma ta tignayen ti Mannakabalin a Dios ti lalaki tapno kaasiannakayo ket palubosanna ni Benjamin ken tay maysa a kabsatyo. No dida makasubli ket mapukawko ida, agladingitakto ket awan ti mabalinko.”

¹⁵Ngarud, innala dagiti agkakabsat dagiti sagutda agraman kuarta a mamindua ti kaadu iti intugotda idi. Nagsublida idiay Egipto agraman ni Benjamin. Sadiay, dimmatagda ken ni Jose.

¹⁶Idi makita ni Jose a kaduada ni Benjamin, imbilinna iti adipen nga agay-aywan iti balayna, “Alaem dagitoy a lallaki idiay balay. Agpartika ket mangisaganaka iti pangngaldaw ta agkakapangankami.”

¹⁷Nagtungpal ti adipen ket impanna dagiti lallaki iti balay ni Jose.

¹⁸Nagbuteng dagiti agkakabsat idi maipanda iti balay. Kinunada, “Nalabit a nayegtayo ditoy gapu iti kuarta a naisubli iti sakotayo idi damotayo ti umay. Mabalin a kellaatendatayo a tiliwen, alaenda dagiti asnotayo ket pagbalinendatayo a tagabu.”

¹⁹Iti kasta, idi makadanonda iti ruangan ti balay, kinunada iti agay-aywan,

²⁰“Pangngaasim, apo, ta dumngegka. Immaykami ditoy idi a gumatang iti makan.

²¹Idi agawidkami ket nagkampokami iti dalan, linuktanmi dagiti sakomi. Nasarakan ti tunggal maysa ti kuarta iti bukodna a supot. Pulos nga awan ti naksay. Umaymi isubli kenka ti kuarta.

²²Nangitugotkami pay iti kuarta nga igatangmi iti ad-adu a taraon. Dimi ammo no siasino ti nangikabil iti kuarta iti supotmi.”

²³“Saankayo a madanagan,” kinuna ti adipen. “Saankayo nga agbuteng. Nalabit a ti Diosyo, ti Dios ni amayo, ti nangikabil iti kuarta kadagiti supotyo. Inawatko idi ti imbayadyo.” Kalpasanna, inruarna ni Simeon ket impakuyogna kadakuada.

²⁴Pinastrek ti adipen dagiti agkakabsat iti balay. Inikkanna ida iti danum a pangbuggoda kadagiti sakada ken pinakanna dagiti asnoda.

²⁵Kalpasanna, inruar dagiti agkakabsat dagiti sagut nga itedda ken ni Jose apaman a sumangpet iti aldaw. Nangngegda ngamin a kalanglangda ni Jose.

²⁶Idi sumangpet ni Jose, impanda dagiti sagut nga agpaay kenkuana iti balay ket nagpaklebda iti daga a kas pammadayaw kenkuana.

²⁷Nagdamag ni Jose iti maipapan iti salun-atda. Sinaludsodna, “Kumusta ti amayo nga imbagayo kaniak? Sibibiag ken nakaradkad kadi met laeng?”

²⁸Insungbatda, “Sibibiag ken napigsa pay laeng ni tatangmi, ti nanumo nga adipenmo.” Ket nagparintumengda a nagruknoy iti sangona.

²⁹Idi makita ni Jose ni Benjamin a kabsatna, kinunana, “No kasta daytoy ti inaudi a kabsatyo nga imbagayo kaniak. Bendisionannaka koma ti Dios, anakko.”

³⁰Natignay ti rikna ni Jose iti pannakakitana iti kabsatna. Makasangsangiten, isu a dinagdagusna ti simrek iti kuarto ket sadiay ti nagsangitanna.

³¹Idi agkalman ti pakinakemna, nagdiram-os, rimmuar ket imbilinna a maidasaren ti pangaldaw.

³²Naserbian a maymaysa ni Jose iti maysa a lamisaan ket sabali met a lamisaan ti nanganan dagiti kakabsatna. Sabali met a lamisaan dagiti Egipcio a mangmangan sadiay agsipud ta ibilangda a maibaba ti dayawda a makipangan kadagiti Hebreo.

³³Adda iti sango ni Jose ti lamisaan a pangpanganan dagiti agkakabsat. Naurnos ti panagtugawda manipud iti inauna agingga iti inaudi. Nagkikinnitada ket masmasdaawda no apay a kasta ti urnosda.

³⁴Naggapu iti lamisaan ni Jose dagiti taraon a naiserbi kadakuada. Naserbian ni Benjamin iti maminlima ti kaaduna ngem ti naited kadagiti dadduma a kakabsatna. Siraragsakda a nagpapangan ken nagiinum.