Read Iloko Genesis 44 Bible Online

Genesis 44 - Iloko bible

Genesis 44

¹Imbilin ni Jose iti agay-aywan iti balayna, “Punnoem iti trigo dagiti sakoda kas kabaelanda nga awiten ket sakbay a galutam dagitoy, ikabilmo ti kuarta nga inggatangda.

²Iti sako ti inaudi, ikabilmo pay ti kopak a pirak.” Inaramid ti adipen ti naibilin kenkuana.

³Kabigatanna, nasapa a nagrubbuat dagiti agkakabsat a nagsakay kadagiti asnoda.

⁴Dida pay nakaadayo iti siudad idi imbilin ni Jose iti agay-aywan iti balayna, “Kamakamem dagidiay a lallaki ket ibagam kadakuada, ‘Apay a dakes ti insubadyo iti naimbag?

⁵Apay a tinakawyo ti kopa a pirak a kukua ti apok? Daytoy ti kopa a pagin-inumanna. Isu ti ar-aramatenna a pagipadto. Nadagsen ti inaramidyo a krimen!’”

⁶Nakamakam ida ti adipen, ket kasta ti imbagana kadakuada.

⁷Insungbatda kenkuana, “Ania ti kayatyo a sawen, apo? Apay a kasta ti saoyo? Saanmi a maaramid ti kasta.

⁸Kas makitam, insublimi kenka ti kuarta a nasarakanmi iti uneg dagiti sakomi, uray no nakadanonkami idin idiay Canaan. Apay ketdin nga agtakawkami iti pirak wenno balitok iti balay ti amom?

⁹Apo, rumbeng a mapapatay ti pakasarakam kadakami iti nasao a kopa ket agbalinkami amin a tagabu.”

¹⁰Insungbat ti adipen, “Ala wen. Ngem ti laeng pakasarakak iti kopa ti agbalin a tagabuk ket mapalubosan dagiti dadduma.”

¹¹Dinagdagusda nga imbaba dagiti sakoda ket linuktan ti tunggal maysa ti sakona.

¹²Sinaggaysa ti adipen a binukitkitan dagiti sakoda. Inrugina ti sako ti inauna agingga iti inaudi. Nasarakanna ti kopa iti sako ni Benjamin.

¹³Rinay-ab dagiti agkakabsat ti pagan-anayda iti napalalo a ladingitda. Inkargada met laeng dagiti sako kadagiti asnoda sada nagsubli iti siudad.

¹⁴Adda pay laeng ni Jose iti balay idi sumangpet ni Juda ken dagiti kakabsatna. Nagtamedda ti sangoananna

¹⁵ket kinuna ni Jose, “Ania ti inaramidyo? Diyo kadi ammo a ti tao nga adda iti saadko maduktalanna iti inaramidyo babaen iti padto?”

¹⁶Insungbat ni Juda, “Ania pay koma ti masaomi kenka, apo? Kasano a makilinnawagkami? Ania ti ibagami tapno maipaneknekmi nga awan ti basolmi? Ti Dios ti nakasukal iti nakabasolanmi, apo. Ita, agbalinkamin a tagabum, dakami amin—saan la a ti nakasarakan iti kopa.”

¹⁷Kinuna ni Jose, “Saan a mabalin! Diak maaramid dayta. Ti laeng nakasarakan iti kopa ti agbalin a tagabuk. Mabalin nga agawid ti dadduma kadakayo iti amayo nga awan ti pakaan-anoanyo.”

¹⁸Immasideg ni Juda ken ni Jose ket kinunana, “Pangngaasim, apo, ta palubosannak koma nga agsao a siwawaya. Dinak koma kaunget. Natan-okka a kas iti mismo nga ari.

¹⁹Apo, dinamagmo idi no adda ama wenno kabsatmi a lalaki.

²⁰Insungbatmi nga adda tatangmi a lakay ken adda pay adingmi a lalaki a nayanak idi lakayen ni tatangmi. Imbagami a natayen ti kabsatna ket isu laengen ti sibibiag nga anak ti inana, isu nga ay-ayaten unay ni amami.

²¹Apo, binilinnakami idi nga alaenmi ti kabsatmi tapno makitam.

²²Inlawlawagmi met idi a narigat a mayadayo ti ubing ta daytoy ti pakatayan ti amami.

²³Ket kinunam kadakami a dikam agparang kenka no dimi ikuyog ti inaudi a kabsatmi.

²⁴“Imbagami amin dagitoy ken ni tatangmi idi sumangpetkami.

²⁵Iti saan a mabayag, imbagana nga agsublikami ditoy tapno gumatangkami iti taraon.

²⁶Impalagipmi kenkuana a saannakami nga awaten no dimi ikuyog ti inaudi a kabsatmi.

²⁷Kinuna ni tatangmi, ‘Ammoyo met a dua laeng ti anakmi ken ni Raquel nga asawak.

²⁸Napukaw ti maysa kadakuada ket nalabit a rinangrangkay dagiti narungsot nga animal ta diak pay nakita agingga ita.

²⁹Ita, no ipanawyo manen daytoy kakaisuna a nabati, no adda dakes a mapagtengna, awan duadua a matayak iti ladingit.’

³⁰“Ita, apo, no agsubliak a diak ikuyog ni Benjamin, awan duadua a matay ni tatang no saanna a makita ti ubing. Naisinggalut ti biagna iti dayta nga ubing ket gapu ta lakay unayen, mabalin nga ipatayna ti ladingit a yegmi kenkuana.

³²Maysa pay, inkarik iti amak a ti biagko ti sumungbat no diak maisubli kenkuana ti ubing. Imbagak kenkuana a no diak isubli ti ubing, siakto ti mangibaklay iti pammabasol iti unos ti panagbiagko.

³³Ita, apo, siak laengen ti agbati a kas tagabum ket palubosam ti ubing a makikuyog kadagiti kakabsatna.

³⁴Diak agawid no diak ikuyog ti ubing. Diak maitured a kitaen daytoy a didigra a dumteng iti amak.”