Read Iloko Genesis 45 Bible Online

Genesis 45 - Iloko bible

Genesis 45

¹Saanen a magawidan ni Jose ti riknana iti sangoanan dagiti agserserbi kenkuana isut' gapuna a pinapanawna ida iti kuarto. Awan sabali a kaduana idi ipudnona kadagiti kakabsatna ti kinasiasinona.

²Kasta unay ti pigsa ti sangitna ket nangngeg dagiti Egipcio. Naipadamag daytoy iti palasio.

³Kinuna ni Jose kadagiti kakabsatna, “Siak ni Jose. Sibibiag pay kadi ni tatang?” Ngem kasta unay ti panagbuteng kenkuana dagiti kakabsatna ket dida nakasungbat.

⁴Imbaga ni Jose nga umasidegda. Immasidegda kenkuana ket kinunana, “Siak ni Jose a kabsatyo nga inlakoyo ken naipan ditoy Egipto.

⁵Ngem dikay mariribukan wenno diyo pabasolen ti bagiyo iti panangilakoyo kaniak. Kinapudnona, ti Dios ti nangibaon kaniak ditoy nga umun-una ngem dakayo tapno maisalakan ti biag dagiti tattao.

⁶Maikadua pay la daytoy a tawen a panagbisin iti daga. Adda pay lima a tawen nga awanto ti maapit iti taltalon.

⁷Imbaonnak ti Dios ditoy nga immun-una ngem dakayo tapno ispalenkayo babaen iti daytoy nakaskasdaaw a pamuspusan ken tapno awan duadua a makalasatkayo, agraman dagiti kaputotanyo.

⁸Ngarud, saan a dakayo ti nangibaon kaniak ditoy no di ket ti Dios. Pinagbalinnak a kangatoan nga ofisial ti ari. Siak ti agaywan iti daytoy a pagilian. Siak ti mangituray iti amin nga Egipto.

⁹“Ita, dagdagusenyo ti agsubli ken ni tatang ket ipadamagyo kenkuana a pinagturaynak ti Dios iti amin nga Egipto. Ibagayo kenkuana nga umay ditoy iti kabiitan a panawen.

¹⁰Sadiay Gosen ti pagnaedanna tapno asideg kaniak—isu, dagiti annakna, dagiti appokona, dagiti karnerona, dagiti kaldingna, dagiti bakana ken amin a sanikuana.

¹¹No addakayo idiay Gosen, siakto ti makaammo kadakayo amin sadiay. Lima pay a tawen ti panagbisin ket diak kayat a mabisinankayo kadagiti familiayo ken ti amin nga animalyo.”

¹²Intuloy ni Jose, “Ita, makitayo amin, ken uray sika, Benjamin, a pudno a siak ni Jose.

¹³Ibagayo ken ni tatang no kasano ti kinaturayko ditoy Egipto. Ibagayo met kenkuana ti amin a nakitayo. Ala, darasenyo ti mapan mangala kenkuana.”

¹⁴Nagsangit ni Jose a nangarakup iti kabsatna. Nagsangit met ni Benjamin nga immarakup kenkuana.

¹⁵Agsangsangit pay laeng ni Jose a nangarakup ken nangagek kadagiti kakabsatna. Kalpasanna, rinugian dagiti kakabsatna ti nakisao kenkuana.

¹⁶Idi maipadamag iti palasio a dimteng dagiti kakabsat ni Jose, naragsakan ti ari ken dagiti ofisialesna.

¹⁷Kinunana ken ni Jose, “Ibagam kadagiti kakabsatmo a paawitanda dagiti animalda kadagiti makan ket agsublida iti daga ti Canaan.

¹⁸Alaenda ni tatangyo ken dagiti familiada ket yegda ida ditoy. Itedkonto kadakuada ti kasayaatan a daga iti Egipto ket addanto amin a masapulda iti panagbiagda.

¹⁹Ibagam met kadakuada a mangalada kadagiti kariton ditoy Egipto a pagluganan dagiti assawada ken dagiti babassit nga annakda. Ibagam nga itugotda ni tatangyo ket umayda ditoy.

²⁰Dida koma ilalaen dagiti sanikua a mapanawanda, ta tagikuaendanto ti kasayaatan a daga iti entero nga Egipto.”

²¹Nagtungpal dagiti annak ni Israel. Kas imbilin ti ari, inikkan ida ni Jose kadagiti kariton, kasta met iti kanenda nga agbiahe.

²²Inikkanna pay ti tunggal maysa iti bado a pagsukatan, ngem lima a pagsukatan a kawes ken tallo gasut a bagi ti pirak ti intedna ken ni Benjamin.

²³Pinaw-itanna ni tatangna kadagiti kasayaatan nga apit iti Egipto a kinarga ti sangapulo a kabaian nga asno. Inikkanna pay ti sangapulo a kabaian nga asno a nakargaan iti makan, tinapay ken dadduma pay a taraon para iti panagbiaheda nga agsubli idiay Egipto.

²⁴Pinarubbuatanna dagiti kakabsatna ket sakbay a napanda, binalakadanna ida a dida agaapa iti dalan.

²⁵Pimmanawda iti Egipto ket nagsublida iti daga ti Canaan.

²⁶Idi sumangpetda sadiay, kinunada ken ni Jacob, “Ama, sibibiag pay gayam ni Jose! Isu ti agdama a mangituray iti entero nga Egipto!” Naikuleng ni Jacob. Dina patien ti impadamagda.

²⁷Ngem idi imbagada ti bilin ni Jose ken idi makitana dagiti kariton a luganna a mapan idiay Egipto, simmubli ti ganaygayna.

²⁸Kinunana, “Sibibiag pay ni Jose nga anakko! Awanen ti sabali a dawatek. Masapul nga innak kitaen sakbay a matayak.”